الموضوع: الى كل اصحاب النوبيرا

انا معايا نوبيرا و لو اخترت تانى لكنت جبت بردوا نوبيرا

نوبيرا وتوكل على الله ومتحملش هم الصيانة عند اى مكانيكى يصلحها

النوبيرا سيارة محترمة جدا جدا فى صالونها و تصميم الموتور وحجمها و شنطتها و حاجات تانية كتير
وسيبك من كل اللى بيفتى ويقولك أوعى النوبيرا
عيبها الوحيد الوحيد العفشة ودى أمرها هايف جدا لأن سعر المقصات و الأتياش وبارات الدريكسيون والكلام ده رخيص
و أوعى حد يجيب جلب وبيض ويركبه بدل اللي في المقص اللي عنده والشغل ده لأنك حتدفع فوق المصنعية فلوس للخراط اللى حيركبلك الحاجات دى على المكبس ويبنطها لأن أصلا جوز المقصات بـ 230 جنيه ولو جبت أحسن حاجة اللى هى ctr بـ 330 جنيه (المقص بالجلب والبيض) بالإضافة أنه عمره أطول بكتير من أنك تغيير الجلب و البيض فى المقص القديم وأحسن بكتير وفى أوقات بيكون أرخص
نيجى للبارات والأتياش و بيض الطرف كل الكلام ده كلا فارغ مش حيعدى ال 500 جنيه وحيخليلك العربية حاجة تانية خالص حتحس إنك مبسوط بالعربية بصراحة ولو فى مشاكل فى المساعدين أنصح بس بالمساعدين ليابانى kyb ودى تمنها للآربع مساعدين 1040 جنيه (ده لو محتاجة)
وبالنسبة للنوبيرا الأتوماتيك ما تسمعش كلام حد. الفتيس محترم (بـــــــــــــــــــس) خلى بالك تكشف على الفتيس عند واحد بتاع فتيسات أوتوماتيك و يكون الجراب بتاع وير الفتيس مقفول وسليم من فوق ( من يمين الموتور فى خرطوم أسود حواليه ذى كافر أسود ذيجذاج )

ملحوظة هامة الفتيس الأوتوماتيك فى النوبيرا مش ذى اللى فى ال أوبترا أو ال النترا ( الآتنين كهربا بس دول على كمبيوتر وبتاع النوبيرا ميكانيكى) وده بيخلى العربية مش حامية ذى ما بيقولوا ودا عن كلام مهندس كان شغال فى أبو غالى

ـ نيجى للمهم عايز فيتيسك الأوتوماتيك يفضل ذيرو لازم تحفظ النقط دى:
ـــــ جراب وير الفتيس اللى واصل على بكرة وير الأكسلاتير يكون مقفول كله وخصوصا من الحته الذيجذاج اللى بتكون فى يمين الوتور بالضبط ( عشان دخول أي تراب أو مياه أو زيوت أو ماء وصابون من الغسيل أو أو حيدمــــــــــرلك الفتيس)
ـــــ تستعمل بطارية جافة ( عشان سوائل البطارية السائلة بتقتل الفتيس لو نزلت عليه خصوصا أنه تحت البطارية)
ـــــ تغيير زيت الأوتوماتيك بزيت محترم و ما تسترخصش و معاه الفلتر والجوان كا 40,000 كم ( علشان تحافظ عليه)
ـــــ ممنوع الكيك داون والقرص والعربية باردة أو على سرعات منخفضة جدا