ياجماعه انا اكتشفت ان اللى مات عندى هو كات فيش وهو كان عامل زى القرموط على صغير لكن سمك الزبال عندى منه اتنين بس ممكن حد يقولى ايه الفرق بين الزبال والكات فيش وكمان ايه هو السمك اللى بينضف الازاز واللى بينضف القاع
عرض للطباعة
الاضائة كتير غلط و الاضائة قليل برضة غلط
لو الحوض بييجي علية ضوء الشمس او انارة قوية من الشباك قول لجارك ماينورش النور اصلا
ولو عاوز نور صناعي استعمل لمبات الاشعه الفوق بنفسجية (الجيرولوكس) دي فلورسنت و مش غالية بس بتدي نور محاكي لضوء الشمس و هي الوحيدة اللي تكفي السمك و الزرع ومش اكتر من 8 ساعات في اليوم علشان السمك يرتاح و ينام
تخيل نفسك صاحي 24 ساعه في اليوم
.... ماينفعش السمك حايرهق جدا من عدم النوم لان مالوش جفون او بالاصح اللي لة جفون منة بتبقى شفافة
بالنسبة لتنضيف الزجاج هات ليفة غسيل مواعين خشنة جديدة و كل ماتلاقي الزجاج مطحلب او مزملط مد ايدك و امسحه بالليفة (اوعي تجيب ليفة مطرحها صابون) لان المغناطيس دة انا مانفعش معايا ببصلة لانةمش بقوة الضغط المطلوبة عالزجاج
يعني يادوب بيمسح بالراحه, و فية ادوية بتتحط في المياة لمنع تكون لطحالب و هي غير ضارة للسمك بس تراعي النسبة بحساسية
بالنسبة للادوية في الشتاء لازم سخانات لتدفئة المياة و بتتضبط بحث ان الحوض يبقى في حرارة 28 مئوية
لو بردت السمك حايجيلة مرض النقط البيضاء الهوايت سبوت و ليها دواء
و لو السمك لقيتة علية (فطريات) فنجس (زي قطن ابيض على القشر) فية دواء لية برضة اسمة انتي فنجس
و فية ادوية لتآكل الزعانف و ادوية مطهرة للحوض لغسيلة زي البرمنجنات (البنفسجية)
الفان تيل صعب تفريخه
الاسهل الجوبي و المولي و السورد تيل دول اسهل سمك في التفريخ و اعتقد برضة الفايتر سهل نسبيا بس عاوز خبرة
انا كان عندي نتاية بلاك مولي عجيبة جابت 120 ولدة في مرة واحدة بس كانت خبرة و كبيرة الحجم و بطنها كانت قد السوداني اللي بقشرة ههههه
البلكو ستوميوس بيبقى بقة زي الماصة و بيلزق في الزجاج وو ينضفة
انا الكات فيش بياكل القاذورات اللي في القاع
كانت ايام
شوف الرابط دة كدة نتيجة بحث Google عن الصور حول http://www.aquazone-iq.com/%20af1.jpg
لتحميل كتب عن اسمال الزينة تحميل كتاب كتاب اسماك الزينة - بحث Google
عندك تشكيلة عجيبة من السمكاقتباس:
طب انا كده عرفت 3 انواع من السمك اللى عندى جولدن فيش وفان تيل وفايتر وكان فيه الزبال ومات بس انا لسه عندى انواع تانيه زى السمك اللى بيولد وبيبخ ولاده وده لونه اسود وسمك تانى صغير لونه اسود فى ابيض فى دهبى وعينيه طالعه لبره حد يعرف دول اسمهم ايه وطريقه التعامل معاهم ازاى وهل ممكن اجيب اكتر من فلتر كهرباء علشان النضافه وكمان لو عاوز اعمل شكل فقاعات جمالى انا قريت ان فيه مضخ الاكسجين فهل ده فعلا بيعمل فقاعات ولا لا ؟
الفايتر الذكر احيانا بيترفز جدا لو لاقي ديول تانية حواليه بيفتكرها ذكور كذلك الولود حيقطعوا ديله و ياكلوه
لو انثي يبقي ماشي الحال
بالنسبة للفتلر اقل حاجة عندك فلتر باور 2 كوباية 600-900 لتر في الساعة
اقل بلاش انما اكتر ممكن و جربه عند المحل علشان يكون هادي لان في انواع سيئة بتزن و مزعجة قوي
بالنسبة لتشكيل الفقعات انت بتركب في اخر الخرطوم اللي جاي من ماتور الهواء
لعبة او سكره او مسطرة بس ابقي جرب المساطر في المحل لان بعضهم مش بيجيب فقعات بطول المسطرة صح
و في سكرات مستوردة بتطلع كميات خرافية من الفقاقيع الصغيرة بس طبعا غاليا و في مساطر فليكس ممكن تشكلها بس معرفش موجودة في مصر و لا ايه النظام
و السكرة هي الاير ستون اللي هي حجر الهوا
شكرا يا فندم على المعلومات الجميلة دى
وجزاك الله كا خير
ان شاء الله كدة هجيب فلتر بور وهغير اللمبة
وهيبقى فى مواعيد لتشغيل المور هشغلة من الساعة 10 الصبح لغاية 10 بليل
شكرا يا باشا تعبتك معايا كتير
بس تعمل اية بقى كلة فى سبيل السمك:36_1_1[1]:
والمواقع جميلة جدا خاصة اول موقع
طيب وبخصوص الاصداف والصخر اللى علية طحالب هعمل فية اية
انا سبتة برة الحوض وفرشهم فى الارض قلت اسبية كدة اسبوع ولا حاجة وابقى اغسلة تانى واحطة
انا كدة هجيب سمكتين استومس ووحدة كات فيش علشان النضافة صح كدة
لا يا باشا الحوض بيتحط فية سمكة واحدة بلاك استوماس و الكات فيش براحتك و على فكرة بلاش الفرش المكرونة دة وحش قوى افضل فرش بيبقى اسمة كسر رخام او جرانيت و دة كان بيتباع ب الكيلو بس فى المحلات حا يبيعة ب الكيس و على فكرة فية نوع معين من الخشب بيجى مستورد خشب مخصوص و شكلة تحفة حا ابقى أصورة و ارفع لك صورة دة بيتباع ب الكيلو او القطعة بس دة مش رخيص و لو جبتة فى انواع من السمك بيحبة جدا جدا و بيحس ب الامان و بلتف حولة و خصوصا سمك الريشة بس الانواع دى غالية و حساسة ما تشترهاش و انت لسة فى الاول كدة و اغسل الفرش كويس جدا جدا دة اول سبب من اسباب تلوث الحوض و نفوق الاسماك
ياجماعه الرابط أهوه عشان فى ناس كتير سألتنى عليه عالخاص
منتدي أسماك الزينه العام - منتدي رابطة محبي الحيوانات
وعلى فكره لو دورت وقريت فى الموقع ده مش هتحتاج تسأل عن أى حاجه وهوه فعلا موقع شامل وأنا أتعلمت منه كل حاجه
وبالنسبه للديكور اللى عليه طحالب يتغلى كويس فى ماء مالح ويتغسل بعد كده كذا مره
دة شكل الخشب الطبيعى الى بيبقى فى الحوض و طبعا اشكالة لا تحصى لانها طبيعية بتاعت ربنا و دة لما بتجيبة بتنقعة فى جردل مية الاول 4 أيام بيشرب المية و ينزل الوساخة و لون كدة و بعد كدة بترمية فى الحوض بيغطس لوحدة فى القاع لو عام على وش المية يبقى قديم جدا و متخزن و لازم ترجعة للراجل و تبدلة http://img69.imageshack.us/img69/552/230820101308.jpghttp://img823.imageshack.us/img823/1...0820101306.jpg
حضرتك الرخام بيتفاعل مع المياة و بيديها قلوية على المدى البعيد يعني ممكن يضر الاسماك
انا كنت باجيب خشب متحجر من اي صحرا دة بيبقى خشب (شجر) بس اتعرض للحرارة و الضغط و براكين لافا من الاف السنين فتحول الي صخور بس بيبقى شكلة خشب ودة هايل مالوش اي مشاكل و مش ممكن يعطن زي الخشب العادي لانة صخر
و موجود في محلات السمك كتير و موجود جوة القاهرة كتير و بيستخدموة في الديكورات
ازيك يا باشا عامل اية يا باشا بص حا اجاوبك على كل الى فى دماغك كسر الرخام دة انا بستعملة من مدة كبيرة بس أهم حاجة يتغسل كويس و انا لو صورت لك شكل الفرش الى عندى ممكن تستغربة جدا انا جبت من مصر و من تايلند و من الشارع و من السوق بالنسبة للأشجار المتحجرة لو فى حلوان مثلا ممكن تلمة من الشارع ببلاش او فى بعض الاماكن بس دة وزنة تقيل و شكلة حلو بس دة يختلف تماما عن الخشب الى انا مصورة دة الخشب الطبيعى دة بيبقى من نهر الامازون و بيدى بعض الانواع احساس باليئة الطبيعية و دة مش بيعطن لو حا تشيل الحوض خالص حط الخشب فى الهواء يوم حا ينشف و بس كدة و لما تحب تشغل الحوض سيبة فى المية نص يوم و حا يغطس لوجدة تانى فى المية أدهم باشا انا ربيت سمك من سنة 86 ههههههههههههه
اهلا هشام باشا و كل سنة و حضرتك طيب
موضوع الرخام وقلوية المياة دة انا عارفة من زمان قوي و من بتوع الاسماك من اول ما ابتديت اربي اسماك سنة 81 او 82 تقريباً حاحاول اجيبلك عنة معلومة مؤكدة من بحث عالجووجل او ابحث معايا و نشوف
الاشجار المتحجرة كنت باجيبها من الصحراء في طريق السويس حيث كان عمل والدي هناك وقتها و كنت باجيب طبعا الاحجام الصغيرة و اللي عاملة اشكال طبيعيه جميلة
كان عندي منها مخزون عالسطح ههههههههههه
الخشب دة مكانش على ايامنا و ماشفتوش دلوقتي حتى برغم انا لسة باربي فايتر وسلاحف ترسة مائية للأولاد بقى ههه
تعرف انا كمان رحت تايلند من اربع سنين بس كانت اهتماماتي مختلفة عن الاسماك وجبت من هناك شغل ديكورات و تحف خشب تحفة زي رؤوس افيال و علب مطعمه بالعاج و شوية تحف عجب هههههههه
اكتر سمك شايع في تايلاند هو الفايتر بالمناسبة و بيعلمولة مسابقات قتال بين ذكور الفايتر على فلوس مراهنات يعني
الله دا انت زميل قديم بقى هههههههههههههه و الخشب المتحجر دة كنت انا بجيبة من اليراك القديم بتاع نادى الشمس ههههههههه و عندى منة كام حتة ليومنا هذا و على فكرة فى مدينة نصر ساعات بلاقية فى الشارع صدفة كدة كمان و حاليا عندى 3 احواض بس الاولاد كسرو 2 من المرجحة بجانب الحوض و بالنسبة للخشب الكبيعى دة فعلا ما كانش موجود زمان بس الى كان موجود علب الاكل المستورد ال تيترا اكيد انت عارفة و القراص الى كانت بتتلزق على الزجاج و عندى مواتير هواء ال رينا ال 101 و ال 301 اية رايك بقى ههههههههههههههههههههههههه هههههه
استاذ أدهم بما انك من الربين القدامى قولى يا باشا الكوخ الغطاء دة من كام سنة ههههههههههههه دة مخزنة عندى حتى اليوم و حا ابعت لك صورة اخرى على الخاص بها السماعة ال jbl http://img214.imageshack.us/img214/6...0820101325.jpg
ودة التترا القديم [youtube]http://www.youtube.com/watch?v=XpX4O8RjU_Q&feature=search[/youtube]
و دى الاقراص الى كنت بقول عليها بس انا كنت بلزقها بالضغط فى الزجاج و دى مغذية جدا و مفيدة جدا زى الدود الحى و اكتر كمان [youtube]http://www.youtube.com/watch?v=Xle8kL569MM&feature=related[/youtube]
اعلان عن التترا[youtube]http://www.youtube.com/watch?v=Ub1hGZdlgWk&feature=related[/youtube]
و السمكتين دول أنجل لونهم تحفة لان الى بيجى هنا الاسود و الفضى و الفضى فى أسود و لو بصيت حا تلاقى سمكة بلاتى لونها أصفر دى حامل يومين تتحط فى الحضانة تولد ان شاء الله ههههههههه[youtube]http://www.youtube.com/watch?v=zjr7BNIFVd8&feature=related[/youtube]
طريقة تفريخ سمك الفا تيل يدويا بس بلاش لانك ممكن تموت السمكة لو مش عارف بيعمل اية [youtube]http://www.youtube.com/watch?v=najz7wamDXY&feature=related[/youtube]
[youtube]http://www.youtube.com/watch?v=u7avOLxaGXI&NR=1[/youtube]و تفريخ سمك الكوى يدويا برضو
اول مرة اشوف انجل اصفر جديد دة
و الكوي دة مكانش على ايامنا برضة لو تفتكر
كان محلات السمك معدودة شكيب اللي جنب سينما روكسي, و نبيل صبري و رؤوف في شارع رمسيس
انا اول ما ربيت ربيت بلاتي
و بعدين جوبي و سوردتيل و مولي الكلام دة اعتقد سنة 79 او 80
السييرا دي ماركة منتجات كانت مشهورة برضة وقتها زي التيترا
و الاقراص اللي بتلزق دي طبعا كان لازم نستعملها علشان بتغدي كويس غير البودرة
انا في اواخر الجامعه كنت باربي اوسكار و بأكلة لحمه مقطعه حتت كان عدي حوض كبير للاوسكار فية يمكن دستة
ياجماعه انا الزجاج عندى من جوه مش نضيف لان المياه عندى اصلا ماكنتش نضيفه . ازاى انضف الزجاج من الداخل
يا باشا الراجل الى كان محلى جنب سينما روكشى الى هو شكيب دة مستورد كان بيجيب رسايل من برة مش محل و دة اول محل اشتريت من عندة و كان شغال فى المحل عندة 3 بنات الكلام دة فعلا من زمن انا وقتها كنت صغير و فية كام محل كدة بيجيبو رسايل لحسابهم فية محل فى سراى القبة جنب مدرسة سراى القبة بنات الراجل دة مستورد مش محل اى كلام و دة الى بجيب من عندة الخشب و على فكرة انا مرة عملت خوض سمك شرس كان عندى شيكلد و اوسكار و بيرانا هههههههه بس بيوسخو مية الحوض هههههههههههههههههه
عارف ياباشا
بس اول ما ابتدي اكان بيبيع للزباين عادي و مش مستورد بتاع جملة و لا حاجة و كانت بنتة الانسة زيزي (زينب) اللي كانت بتقف في المحل دايما وكانت لسة في الجامعه او متخرجه جديد
اللي اشد منة ناجي و رؤوف انطون اللي في شارع رمسيس وقتها كانوا هايلين و كنت زبونهم المفضل لسنين
دلوقتي المحل اللي في نجاتي سراج يمين من السراج مول بعد ما المحل اللي كان جنب ولاد رجب قفل و بس
دلوقتي انا مربي ترسة و باكلها جمبري ني متقطع
و جوز فايتر و شكرا ههههههههههه
تعرف من زمان و انا نفسي اربي ديسكس و كيسنج جرامي
اكثر الانواع هدوءاً
بس خلاص بقى الزمن دة انتهي
انا من سنة 87 او 88 لسنة 2010 ماربيتش سمك ومن شهرين بس عملت فسقية الترسة (سلاحف مياة صغيرة بتتربي في حوض بلاستيك بيضاوي) للاولاد و جبتلهم جوز فايتر
هههههههههههه عارف الترسة يا باشا انا بحبها جدا بص الديسكس غالى مش رخيص و حساس و دة بقى حا تجيبلة الحشب الى بقولك علية و الكيسنج جرامى جبتة و جميل بس برضو حساس شوية مش بيستحمل و الدوارف جرامى و الى رائع الجرامى المنقط دة مستورد رهيب فى الشكل برضو
ايوة الانواع دي كلها حساسة و هادية جدا ملائكية فعلا
و زمان كنت حاتجنن و اعمل حوض مياة مالحه و اربي فية حصان البحر و اسماك المياة الملحه
كان رؤوف انطون عندة منة في محلة اللي في شارع رمسيس كنت حاتجنن واعمل حوض بس كانت التكلفة كبيرة
لا ياباشا حصان "البحر" مياة مالحه و هو هادي جداً و بيتربي و سط السمك عادي فعلا
و الانثى بتبيض و الذكر بيخللي البيض في جراب في بطنة لغاية ما يفقس و يخرج منة الصغار
يعني الذكر هو اللي بيحمل البيض زي ما حنا اللي حاملين هم العيال كدة هههه
زي دة !!!
صورة حصان البحر - Google Search
زي دة !!!
صورة حصان البحر - Google Search
شكل دة كدة انا عارف حصان البحر هههههههههههههه بس ما كانش ملون [youtube]http://www.youtube.com/watch?v=A3XJF-uY8SQ&feature=related[/youtube]
و دة يا باشا بص حاليا ما بقتش اشوف منة خالص كان زمان و كان الواحد ب 10 جنية تقريبا[youtube]http://www.youtube.com/watch?v=8xiqYrIXweY&feature=related[/youtube]
موضوع تفريخ السمك دة طلع صعب شوية
انا مش هجرب دلوقتى
لاسباب كتير اولها انى معرفش الفرق بين الذكر والانثى
بس عايز نصايحك اعمل اية الخطوة اللى جية وكمان انا عايز اجيب سمك تانى اجيب اية يعيش مع الفان تيل واجيب كام وحدة؟
مع الفانتيل لازم انواع هادية مش الانواع اللي بتنقر ديول
ممكن مولي مثلا او جوبي او انجل
انما بلاش سورد تيل علشان حاينفر ديولة كذلك الفايتر