الموضوع: تحذير من محل القبطان لفرش العربيات في ش. دمشق

المشاركة الأصلية كتبت بواسطة bassemraafat

أستاذ / كريم منير

بجد أنا بشكرك جداً على النشاط المذهل الموجود فى المنتدى ، وشكرى الخاص على تعبك إنت وأستاذ / حسام أوبتراوى فى موضوع شماسات السيارات المطبوع عليه لوجو المنتدى وعلامة شيفروليه ... وإن شاء الله تم تحديد ميعاد مبدئى بكره لإستلامها . بجد شكراً شكراً وربنا يوفقك كمان وكمان .

أستاذه / ساره

ولا يهمك فى موضوع فرش العربيه ده .... بجد أنا إتأكدت فى خلال 13 سنه من السواقه ومعاملتى لـ 3 عربيات فى الفتره دى إنى محدش بيتعلم ببلاش ، ومحلات الإكسسوار والصنايعيه وحتى التوكيلات فيهم الكويس وفيهم إللى ......... ، بجد حاولى بعد كده تسألى مره وإتنين وثلاثه لغاية ما تعرفى الصح فين ، وربنا يوفقك .

أما بالنسبه لموضوع الفرش ده إسمحولى أقيم بعض المحلات إللى إنتم أتكلمتم عنها :

1 - سبير كار :
العيوب : فعلاً معندوش تشكيله ترضى جميع الأذواق وكنت مركب فرش الهيونداى عندهم ، وكانت المشكله فى سرعة التركيب ( خلال ربع ساعه تقريباً ) ومش موصل كل الكلبسات الموجوده فى الفرش وعدم ظبط النقشه الموجوده فى القواعد مع نقشات الظهر ( بيسموه فى التنجيد " تحكيم " ) ... وكمان فرشه مش بيعيش كتير فى العربيه ( بيتهلك بسرعه ) ....
المزايا : أسعار أقل من غيره .

2 - محل القبطان : " سبب الموضوع " ناس كتير مرتاحتش فى المعامله معاه ، وعمرى ما كنت فى شارع دمشق وفكرت أعدى عليه مع إنى ساكن هناك تقريباً .

3 - جينز كار : متعاملتش معاه قبل كده ، بس من كلام الناس يدل إنه مكان محترم جداً .

4 - دوس لفرش السيارات :
المكان ده محدش جاب سيرته " أنا عارف " بس أنا لسه مستلم الأوبترا النهارده من عنده ، كنت بركب فرش جلد تفصيل هناك (( مع إنى بكره حاجه إسمها فرش جلد )) بس بصراحه ناس ممتازين جداً وأستاذ / عاطف صاحب المكان بجد ربنا يباركله .
العيوب : علشان الأمانه ، كنت طالب شكل خياطة معين فى الظهر والقاعده ... بصراحه متعملش وعرض عليا أستاذ / عاطف إنه يفك الفرش ويعمله تانى .. بس أنا لاقيت الفرش كده برضه شكله حلو ، وإتفق معايا إنى أروح فى أى وقت وأعدله لو حبيت وبدون مقابل ، أسعاره غاليه حبه بس تخرج من هناك مركب فرش خامتة وتركيبه وجوده عاليه جداً .

معلش طولت عليكوا كتير .... وفرصه سعيدة جداً ......

مبروك عليك الفرش الجديد
واضح انها مجازفه انك تتعامل مع اي مراكز خدمه او صنايعيه ..... الخ
بدون ما تسأل وبدون ما يكون في حد جرب قبل كده يفيدك ....... للدرجه دي مفيش امانه
كنت فاكره ان موضوع الفرش ده حاجه بسيطه وما اهتمتش اسأل قبلها ده غير اعتمادي
اني هاعمل الفرش في سبير كار وهو اسم كبير ومعروف وافتكرت انه كويس
وكان شىء مفاجىء بالنسبه لي انكم بتقولوا انه مش كويس هو كمان

المشاركة الأصلية كتبت بواسطة elakawy

حضرتك كنتي والله وفرتي المشوار ده ورحتي سبير كار اللي قدام وزارة الداخلية او اللي في شارع امتدار رمسيس نده تشكيلة كبيرة اوي لفرش العربيات لكل الانواع ده غير ان تركيبهم زي الفبريكة وناس محترمة جدا وفاهمة شعلها اوي .

انا كنت في سبير كار التجمع الخامس ومفيش عنده تشكيله كويسه

المشاركة الأصلية كتبت بواسطة bassemraafat

4 - دوس لفرش السيارات :
المكان ده محدش جاب سيرته " أنا عارف " بس أنا لسه مستلم الأوبترا النهارده من عنده ، كنت بركب فرش جلد تفصيل هناك (( مع إنى بكره حاجه إسمها فرش جلد )) بس بصراحه ناس ممتازين جداً وأستاذ / عاطف صاحب المكان بجد ربنا يباركله .
العيوب : علشان الأمانه ، كنت طالب شكل خياطة معين فى الظهر والقاعده ... بصراحه متعملش وعرض عليا أستاذ / عاطف إنه يفك الفرش ويعمله تانى .. بس أنا لاقيت الفرش كده برضه شكله حلو ، وإتفق معايا إنى أروح فى أى وقت وأعدله لو حبيت وبدون مقابل ، أسعاره غاليه حبه بس تخرج من هناك مركب فرش خامتة وتركيبه وجوده عاليه جداً .

معلش طولت عليكوا كتير .... وفرصه سعيدة جداً ......

دوس كويس بس غالي جدا انا رحت عنده عايز فرش لعربيتي قالي طب اتفرج على الخامات واختار الخامة اللي تعجبك طب الخامة دي هتمعل كام ؟ 2600 ليه هو دا جلد طبيعي؟ لأ دا حضرتك جلد صناعي بس من اسبانيا واحنا بس اللي بنستورده(أي هجص لأني شفت نفس الخامة في عربية واحد صاحبي)

تكملة لموضوع الفرش
كان ميعاد وصول الفرش يوم الثلاثاء بعد الفطار
وكان عندي شك ان ده مجرد كلام
وفعلاً اتصلت بالمحل امس زي ما اتفقنا علشان التركيب
وزي ما توقعت الرد كان مفيش فرش نفس اللون
بس انا تحت امرك وهأغير لك الجزء الخلفي الجلد للكرسي
قلتله طيب والجزء المقطوع من الأمام في القاعده
قال هنشوف له حل ونعمله مفيش مشكله
طبعاً انا فضلت اسيبه كده زي ماهو لأن ممكن الجلد يطلع مختلف
وكمان دي تاني مره هيقص الظهر فيها ومش هيعرف يظبطه
ودي كانت نهاية تعاملي معاه

ودي صور العيوب من وجهة نظري علشان الأمانه




صور ظهر الكنبه من الخلف



فتحة مقبض تحريك الظهر واسعه شويه



القطع في قاعدة الكرسي




ظهر الكرسي مش مظبوط على شكل الكرسي



الجزء المعالج بالأمير