الموضوع: خليها تصدى وموديلها يعدى (حملة الموسم)

Me too

كلامك تمام بس الجديد غالى علينا اوى

متابع باهتمام

طيب ياجماعه اولا موضوع الحاجات الزباله دي الي فارضه القوه الشرائيه عندنا ضعيفه وعلشان كده القديم هو الي ماشي هو والصيني اما بخصوص المكن الجديد فشوفو سعره بره كام + الجمارك وضريبه المبيعات + هامش ربح للتاجر تلاقي نفس السعر الي بنشتري بيه وبعدين هتصدي ازاي يعني اذا كان الوكيل مش بيجيب حاجه الا بالطلب علشان عارف الشراء ضعيف جدا في الحالات دي وعلشان عامل حسابه انه في يوم من الايام ممكن عمر يقوم بالحمله دي وحاجته متصديش هو احنا ممكن نقوم بالحمله دي علي الصيني علشان مالي البلد وممكن في الحاله دي كل فرد في الدوله يبقي معاه موتسيكل صيني ومش بعيد يوزعوه مع بطاقه التموين علي فكره سعر المكنه ال cbr 1000 موديل 2010 تقريبا في حدود 11 الف دولار يعني تقريبا حوالي 60 الف جنيه ولو تحسب الشحن والجمارك وربح التاجر هتلاقيها وصلت ال 100000 الف وكمان اعتماد المصانع اليبانيه علي الاسواق الامريكيه والاوربيه اما احنا اعتقد ناسينا في الموضوع ده

المشاركة الأصلية كتبت بواسطة zoom2zoom

اولا حمد الله علي سلامتك يا موورا واحب اضيف حاجه كمان ان الحمله دي مش مقتصره بس علي الموديلات القديمه بس الحمله علي مرحلتين مهمين اوي اول مرحله وهي اعدام الموديلات القديمه والمرحله التانيه وده الاهم هي القصد من كلمه خليها تصدي وموديلها يعدي علي ان التجار رافعين اسعار الموديلات الجديده جداااااااااا خصوصا انها بتتباع في بلدها باقل من كده بكتيييييييييييييييييييييي ييييييير جدا الغرض من الموضوع ان الناس اللي هتقبل علي شراء موديلات جديده اللي اسعارها ناااااااار طبعا لازم تصبر شوية ونعمل حمله وقف للشراء نظرا لغلو الاسعار وساعتها اصحاب المعارض والتوكيلات هيعملوا ايه لان هيجيلهم وقف حاااااال والبضاعه اللي عندهم هيقف حالها وهيضطروا انهم ينزلوا الاسعار وبكده انتا بتقول لصاحب المعرض او التوكيل خليها عندك تصدي وموديلها يعدي !!!!!!!!!
علي فكره الفكره منطقيه جدا واتطبقت حقيقي في السعوديه وحققت اعلي النتائج فا ليه مش نجرب فكره زي دي سواء كانت المرحله الاولي منها او التانيه وبجد لو كل واحد بدا بنفسه حتي ولو مش في الموضوع ده بس لكن في حاجات كتير صدقوني اكيد حالنا هيتعدل اكتر من كده وياريت نبقي عقلانيين بقي ونركن هوائيتنا علي جمب لاننا مش مدركين حجم الازمه الاقتصاديه !!

أسف على ردي لو ممكن يضايق أي حد بس خليني أديكوا رأيي من واقع خبرتي في السوق المصري
ومن واقع إحتكاكي بالتجار في مصر من أول تامر لوط وحتى تلاجه مرورا بالمعارض ثم قطع الغيار ثم الميكانيكيه
عايز أعرفكم نقطه صغيره
إنت بتتعامل مع أنزه تجار في مصر
بداية من ( أشرف خميس - حسام فوزي - محمود السعدني - شوقي السقا ) ودول تجار الريس ومستوردينه في بور سعيد حاول تطبق النظريه بتاعتك معاهم وأدي دقني لو نفعت ومتنساش إني صديق شخصي ليهم وزميل مهنه بس عارف إن الموتسيكل لو إتركن عنده ميت سنه مش هايزعله في حاجهولا هاتفرق معاه لإنه واقف عليه ببلاش
والي بيكلمك كمان عارف إمتى دول بينزلوا الأسعار وإمتى بيرفعوها وإمتى ياخد ال250 إفراج منهم بـ 11000 وإمتى ياخدها بـ 14000 مش كلام في الهوى يعني
مستوردين مصر الي هما ( أبوحوه - أحمد فهمي - أيمن فوزي - مدحت البكري - الماندو - تامر سعيد تامركو)
هل انت شايف ان النظريه دي ممكن تتطبق معاهم بعد ماشبعوا
الناس دي بتلعب بالسوق لعب
ويفهم كلامي أي حد بيشتغل في البورصه المصريه أو بيضارب فيها
لأنهم كده كده لو ماشتراش منهم الزبون هايشتري منهم التاجر الصغير الي بيجيب حته حته يتاجر فيها وطالما التاجر الصغير إشتراها بسعر عالي يبقى عمر سعرها ماهاينزل نهائي
وماتنساش إن في زباين بتشتري موتسيكلات مش فارقه معاها فلوس قد ما فارقه معاها حاله ممتازه ولو انت مش هاتشتري التجار مستنيين التاس دي تيجي تشتري
وفيه حاجه كمان عايز أقولكم عليها
بلاش تتحدوا الـ cbr بأي موديل تاني بالأخص في مصر لإننا حاولنا قبليكم وفشلنا وإتحديناه بالسوزوكي gsxr وفشلنا مع إن السوزوكي يدي cbr بالجزمه بس للأسف وإتحدينا الـ cbr بالكاوازاكي ninja نينجا والكاوازاكي zxr 400 و zx 9r وبردوا فشلنا لإن مصر شعب بيعشق التقليد
زي طفرة محلات الموبايل ودقيقة المحمول وطفرة السنترالات الخاصه وطفرة محلات الصابون والفطيره بالجبنه أو المربى أو السكر ام نص جنيه وموضة مكاتب تأجير السيارات وأخيرا موضة محلات البلاي ستيشن كله بيقلد بعضه يومين وبيعدوا
وحاولنا نجيب مكنه ولا مكنتين من بره إتفرمنا في حوارات الشحن والضرايب والجمارك وعايز أقولكم لدرجة إن مكنه 250 aero لو حد يفتكر الموديل ده سنة 1983 دخلوه مصر في الجمارك وإترخص 2005 واتعكست الأيه ووقف علي صاحبه بدل من 6000 جنيه وقف 15000 للأسف لأن التجار الي بنتكلم عليهم بيعرفوا يدخلوا الموتسيكل بالموديل الي هما عاوزينه والي انت مش هاتعرف تعمل زيهم طبعا لأنك جايب موتسيكل ولا موتسيكلين من بره يفتحولك الكاتالوج واشمط يامعلم المكنه الي التجار بيدفعولها جمارك 400 جنيه إنت تدفع عليها 4500 جنيه ومن غير كلام من عميل طياري مش فاهم الدنيا وتخيل الفرق ده لو في مكنه 900 ولا 1000 ياعيني إدفع يا مزجانجي
وإحذر كل الحذر من المكنه الإفراج الي ماتركبتش وسعرها أرخ ص من السوق بفرق كبير يعني السوق لو بـ 21000 إحذر من المكنه الي نفس الحاله وسعرها 18000 عشان هتلاقي فيها عيب مش هايعرفه إلا لو واحد محترف جدا لإن تاجر الريس بالزات مابيصدق يلاقي حاله نمره واحد عشان يشوط فيها أعلى مكسب ولو فيها عيب هايلبسها لأي حد كأنه بيعمل معاه واجب وإسألني أنا لأني شوفت العجب في المهنه دي وعايز أعرفم إن تاجر الموتسيكلات واحد في العالم كله بيلصم ويلبس في اليابان أو أمريكا أو مصر أو أي حته كله نفس الطبع
"إن جالك الطوفان حط ابنك تحت رجليك"

أسف طولت عليم وأتمنى يكون كلامي عجبكم
أخوكم / إبراهيم أسعد
من الناس الي اتفرمت والتجار لعبوا بيهم الكوره الشراب
وتحياتي