الموضوع: طريق التوكيل

حضرتك تأمر يا باشا
بص هو فيه كذا طريق. بس أنا حجيبلك مثال إزّي توصل للمهندسين بس شوف اني طريق يناسبك للوصول للمهندسين واستخدمه.
الجزء اللي جي اختياري وممكن استبداله بالتحرير ثم المهندسين.
ممكن تروح عن طريق إنك تطلع الدائري اتجاه الجيزة والمنيب. وتنزل أول نازلة بعد ماتعدي النيل اسمها شارع البحر الأعظم. هتاخد شارع البحر الأعظم ده لغاية اخره هتلاقي نازلة يمين تنزل نفق صغير انزله وبعدين كامل في الشارع ده لحد متعدي تحت كوبري هيكون فوقك قطع الطريق بالعرض (كبري الجامعة) خش أول شمال وآخر الشارع اجباري يمين ده شارع مراد. كامل فيه طوالي وهتنزل نفق وتطلع لحد ماهتلاقي على يمينك النحيا التانية مسرح اسمه البالون امسك شمال هتلاقي u ترن سيبه بعده على طول داخلة شمال شارع اسمه أحمد عرابي
نهاية الجزء الاختياري

كمل فيه لحد اخره هتلاقي كبري سيبه وانزل تحته يمين وخش شارع السودان وبعدين خد أول U ترن وامشي في شارع السودان لحد ماهتلاقي منزل كبري بيصب في شارع السودان وإنت هتكون ماشي يمينه ( محور 26 يوليو نازلة شارع السودان ). أول يمين بعد ماالمنزل يخلص خشه (خلِّي بالك قوي من المكروباصات والتكتك ) هتعدي مزلقان قطر (مزلقان أرض اللواء) وبعدين هتلاقي نفسك اجباري ( الدنيا هيصة لا اجباري ولا حاجة ) يمين. كامل على طول ( شارع مرصوف بس فيه كام مطب عجب ) وبعدين هتلاقي التوكيل على شمالك بعد كيلو ونص تقريبا.

لما توصل بالسلامة نوصفلك سكة الرجوع.

المشاركة الأصلية كتبت بواسطة sherlock

زى ما قال جون او تاخد طريق اطول شويه , كورنيش المعادى تطلع دائرى و تاخد كوبرى المريوطيه لحد الوصله التانيه و تنزل نزله ميدان لبنان --- > شارع السودان و تكمل برضه على وصفه جون .

هيا اطول بس اعتقد اسرع علشان الزحمه وخد بالك من بعد ما تعدى مزلقان لحد التوكيل , الطريق كله تكتك و مطبات وحفر :(

تمام يا باشا أنا بس كنت لما باجي أنزل من نزلت ميدان لبنان بلاقي فيه امين واقف وعامل المنزل إشارة وكنت بقف فيها على الاقل نص ساعة فـمن ساعتها بطلت اروح من الدائري نزلت ميدان لبنان. بس نظريا السكة ديه أسرع بكتير بس منه لله الإنسان اللي فكر يعمل إشارة في منزل طريق سريع.

شكرا يا رجالة