الموضوع: حكايتى مع التوكيل الافضل فى مصر و قميص مروحة الميجان....

الحكاية بدأت من حوالى اسبوع كنت مشغل التكييف و فجأة سمعت صوت عالى جدا من المروحة اول ماشتغلت السرعة التانية.صوت غريب و عالى زى مايكون ريش المروحة بتخبط فى حاجة و هى بتلف.قفلت التكييف فالصوت راح.المهم كل محكى لحد يقوللى دى المروحة بتودع خلاص و لازم تغيرها و تمنها حوالى 1600 جنيه.العربية عاملة 112000 كم.الحرارة مش بتزيد و المؤشر طبيعى جدا.
قلت اطلع على التوكيل و لظروف الشغل بتاعى مقدرتش اروح غير اول امبارح.طلعت على توكيل العامرية الصبح و شغلت التكييف و سمعتهم الصوت.دخلوا العربية و شوية جاتلى المهندسة اللى استلمت منى العربية و قالتلى دى مش محتاجة مروحة ولا حاجة دى محتاجة قميص مروحة و تمنه 540 جنيه.قلتلها تمام غيروه.
شوية و جاتلى تانى قالتلى القميص مش موجود دلوقتى قولتها طيب و بعدين قالتلى بكرة الساعة 11 الصبح تيجى حضرتك هايكون موجود و تركبه.و لو حصل حاجة هكلم حضرتك فى التليفون.
مشيت و انا متأكد ان الموضوع هايخدله كام يوم علشان يتحل مش بكره و لا حاجة.
الساعة 10 الصبح تانى يوم لقيت تليفون من المهندسة دى و بتقوللى القميص جه و تعالى حضرتك علشان تركبه.
و فغلا رحت لقيتها بتتأسفلى جدا انى جيت علشان الموضوع ده مرتين و ان هيتم التركيب حالا و بأقصى سرعة علشان ميعطلونيش اكتر من كده.
و فعلا فى خلال نص ساعة لقيتها جاتلى و مجهزة كل الورق و الفاتورة و بتقوللى اتفضل كده كله تمام.
ركبت العربية و شغلت التكييف و استنيت سرعة المروحة تعلى لقيت كل حاجة تمام و زى الفل.
فعلا توكيل و ناس فى قمة الاحترام و الادب
شكرا توكيل رينو

فعلا توكيل محترم جدا