الموضوع: بطارية و مروحة و قميص..

من كام يوم نزلت ادور العربية و لقيت البطارية نايمة تماماً البطارية كانت كلورايد 70 امبير و بصراحة بطارية ممتازة فعلا قعدت معايا 3 سنين و شهرين تقريباً و للعلم عربيتى لادا 2105 المهم لغيت المشوار و بعدها بيومين جبت واحد صاحبى بعربيته و اخدنا البطارية القديمة و جبنا بطارية جديدة كلورايد برضه بس 55 امبير لانى سمعت انى السبعين بتتعب الدينامو لانه بيكون مصمم انه يشحن 55 بس و انت بتديله بطارية اكبر من قدرته و فعلا الكهربائى قاللى الدينامو عندك عايز يتكشف عليه المهم اجلت موضوع الدينامو دلوقتى و نزلت جبت البطارية الجديدة كلورايد 55 أمبير.

المهم بعد ما جبنا البطارية رجعنا ركبناها و فوجنا بأنى المروحة متكسرة تماماً و مكسرة القميص (القطعة البلاستيك اللى بتغطى المروحة من فوق) و صاحبى اللى كان معايا قال لى احمد ربنا انى البطارية نامت لانك كان ممكن تطلع بالعربية و امبير الحرارة يعلى و العربية تسخن و متاخدش بالك و العربية تجيب جوان بس انا و الحمد لله بكون واخد بالى من العدادات و المبينات.

المهم نزلت على الميكانيكى تانى يوم و العربية تعتبر شغالة من غير مروحة المهم جرى على الميكانيكى و الميكانيكى قريب منى و الحمد لله رحت هناك و قلت له حصل كذا كذا قال لى هات المروحة التركى الصفراء رحت عند واحد متخصص قطع غيار لادا و بيستورد او بيجيب المستورد الروسى قلت له عايزين مروحة صفراء تركى قال لى لا منصحكش بيها و اللى عندى الاصلى و طبعاً نفس خامة القديمة بس فرق اللون القديمة كانت سوداء الجديدة لونها سمنى كدة و فعلا نفس سماكة و تقل المروحة القديمة (كان نفسى انزل الصور بس الموبيل اللى معايا دلوقتى الكاميرا اللى فيه مش حلوة) المهم بعد ما رجعت للميكانيكى ركب لى المروحة و قال لى انفخ الرادياتير بالهواء و بعدين اغسله بالمية من برة فى البنزينة ليه معرفش (ممكن يكون عشان احنا فكين المروحة و القميص فبالمرة) المهم عملت كدة و رجعت له تانى و قال لى كنت فاكر القميص ده ممكن نلمه و يشتغل بس مش هينفع هات لنا قميص رحت جبت القميص برضه اصلى و ركبناه و الحمد لله على كدة.

و الدروس المستفادة بالنسبة لى و حبيت اقولها لكم:-

* انى الواحد دايما يفتح الكبوت و يبص على الموتور حتى لو حاسس انه مظبوط لانى المروحة الغريب انها معملتش اى صوت و انا سايق العربية لما اتكسرت و كسرت القميص.
* عينيك دايما على العدادات و المبينات زى ما قلت.
* الكشف الدورى على البطارية مهم جداً عشان متتفاجئش بيها.

و الأسعار كالتالى:-
- سألت عن السبعين أمبير كلورايد بـ 320 جنيه تقريباً و القديمة.
- الجافة بحوالى 450 جنيه تقريباً.
- الكلورايد 55 أمبير بـ250 جنيه.
- المروحة الأصلى 25 جنيه.
- القميص الأصلى 40 جنيه بعد 45 جنيه.
- مصنعية التركيب للمروحة و القميص 30 جنيه مع انى اكتشفت انها عملية هايفة جداً 3 صواميل فى المروحة و 3 صواميل فى القميص و بس و المرة الجاية لا قدر الله لو فى حاجة فى المروحة او القميص غالباً هعملهم بنفسى.

و أسف للإطالة بس حبيت اقولكم التفاصيل و آخر الأسعار.

لا لا مفيش داعى للقلق لانى زى ما قلت لك قبل كدة لو فى النص ده العادى عندى لكن لو عدى النص بقف و أشوف ايه السبب..
و لعلمك انت فى الامان لحد ما يجيب العلامة الحمراء او يقرب منها لكن طبعا مش كويس انك تنتظر لحد ما العربية تسخن لدرجة انها توصل لعلامة الخطر و مقلتليش انت معدل حاجة فى دورة التبريد و لا زى ما هى؟؟