تحذير من اسكندرية في الصيف

**Islam_galal** · 09-03-2008 11:25 AM

مرت سنين طويلة في فترة المحافظ المحبوب تعلم فيها الإسكندرانيه أحترام قوانين المرور بشكل رائع و مختلف و واضح لكل من يعرفون اسكندرية من قبل

الآن الوضع اختلف ، فلزم تحذير كل من يزور اسكندرية بمناسبة اقتراب موسم المصايف

- الشوارع تقريبا كلها بااااااااااااااااااايظة.
- رجال المرور مش رجال و مش بتوع مرور وظيفتهم الأساسية (إن لقيتهم) العكننة علي الناس و إن جاز اللفظ ممارسة الظلم بتلذذ.
- الكلاكسات حدث و لا حرج.
- احترام الغير : لا يوجد
- عربيات كتير بتمشي من غير نمر أصلا
- الفيميه و اللوحات الخاصة كتييييير جدا علشان دايما تفتكر إنك مواطن عادي و حقير.

تفتكر مين و راهم

**fahd_628** · 09-03-2008 11:27 AM

+ انها بقت زحمة على طول :(:(:( مكنتش كدة خالص خالص

**HESHAM AMIN** · 09-03-2008 11:35 AM

المشاركة الأصلية كتبت بواسطة fahd_628

+ انها بقت زحمة على طول :(:(:( مكنتش كدة خالص خالص

+111111111111
دا لان زوارها بقوا كتير
امشى فالشارع وشوف نمر العربيات من كل المحافظات وخصوصا الخميس و الجمعة

**Moh.Fahmy** · 09-03-2008 11:46 AM

كأنكم بتتكلموا عن مكان تاني

فين يا جماعة الشوارع البايظة اللي انتو بتحكوا عليها دي البلد زي الفل انتو ناسيين ان اسكندرية عنوس البحر الابيض المتوسط
اكيد ماحدش فيكم راح العجمي قريب و لا مشي في شوارعها الناعمة الحرير اللي مافيهاش اي مطب طبيعي ابدا كل المطبات صناعية حكومتنا عاملاها عشان تحافظ علينا و علي ولادنا
المرور كله بيبقي في الشوارع الاربعة و عشرين ساعة يعني التواجد المروري كثيف جدا جدا عشان ما بنشوفش حد بيمشي عكس الاتجاه و لا بيكسر اشارة و طبعا و لا عسكري مرور او ظابط بيرتشي و لا اي حاجة من دي ابدا
طيب ده انا لسه شايف امبارح واحدة راكبة لانسر زي بتاعتي و شايفة نفسها شوية جاية من شارع بين شارع الاقبال و شارع شعراوي في اتجاه فيكتوريا يعني حتعدي فوق الحواجز البلاستيك و نمر عربيتها اربع ارقام العسكري اللي واقف لمحها بس ما سابهاش و عملها محضر و سحب منها الرخصة و العربية و قعدت تعيط يا عيني في الشارع و ندمانة علي اللي عملته ده
يا جماعة ده الالتزام كله في اسكندرية و النظام كله في اسكندرية و مافيش حد فوق القانون و لا حتي تحته
يعني ممكن لو انت قاعد علي كافيه من كافيهات الكورنيش و راكن ممنوع علي البحر و العربية اللي قدامك عربية مستشار و عليها بادج هيئة قضائية و تلاقي الونش جه و كلبش عربية المستشار ابو اربع نمر قبل عربيتك يبقي الواحد عايز ايه تاني
اكتر من كده يبقي افتري
تعالوا يا جماعة اسكندرية عشان تحافظوا علي عربيتكم و تنعموا بالنظام اللي احنا غرقانين فيه ده

محمد فهمي

**zorooo1986** · 09-03-2008 12:01 PM

المشاركة الأصلية كتبت بواسطة borgelharm

طيب ده انا لسه شايف امبارح واحدة راكبة لانسر زي بتاعتي و شايفة نفسها شوية جاية من شارع بين شارع الاقبال و شارع شعراوي في اتجاه فيكتوريا يعني حتعدي فوق الحواجز البلاستيك و نمر عربيتها اربع ارقام العسكري اللي واقف لمحها بس ما سابهاش و عملها محضر و سحب منها الرخصة و العربية و قعدت تعيط يا عيني في الشارع و ندمانة علي اللي عملته ده

كلامك جميل بس مش من حق العسكرى ولا اى حد غير اذا كان ظابط انة يسحب الرخصة

**Islam_galal** · 09-03-2008 12:22 PM

الراجل بيتريق
انت صدقت ، دي بقت شيكاغو سنة 1900

**goodwave** · 09-03-2008 01:19 PM

محمد فهمي.... الله يجازيك ضحكتني وخليتني اسرح في خيااااااااااااااااااال !!!

بس إنت يا محمد نسيت تختم وتقول " وشكرا ... محمد فهمي.... مراسلكم من مدينة الإسكندرية عام 2050"

lمش كدة ولا إنت محمد فهمي تاني غير إللي أعرفه؟؟؟؟ يا إخوانا محمد فهمي ممكن يكون سافر أمريكا وبيكتب من هناك ... اصل هناك بردة عندهم إسكندرية!

بمناسبة العجمي.... والله يا محمد من ساعة ما جبت العربية وأنا راكنها في الجراج ومالحقتش افرح بيها علشان التكسير والسير عكس الإتجاة وحرقة الدم.... ما خرجتش غير يوم واحد "بأمر الحكومة" ولعنت المحافظ والحكزمة الف مرة غير إني وقعت في حفرة زي الفل وسمعت صوت غريب في العربية من تحت! طبعا وشي جاب كل الالوان ورجعنا وحطيت العربية في الجراج تاني .... حتى إشعار أخر!

أستاذ إسلام.... اعتقد إن الشوارع حتتظبط في الصيف من حيث السفلتة والارصفة وأعمدة الإنارة "فقط" ولكن المرور فلا حياة لمن تنادي! والله بتعجب من مدينة صغيرة وبها ثلاث شوارع رئيسية فقط يوصلوا إلى اي مكان (الترام - ابوقير والحرية - الكورنيش) ومع ذلك غاب عنها الأمن المروري وإنتشرت فيها العشوائية والفوضى...... لكي الله يا إسكندرية!

**Ghamrawy** · 09-03-2008 01:27 PM

موضوع نط الحواجز اللى فى نص الشارع ده عادى جدا و 99% من الناس بتعمله و كان المفروض ان الحواجز تكون اعلى علشان تضرب فى المقصات و الكارتيرة او تكون زى اللى معمولة على البحر فى سيدى بشر صبة اسمنت محترمة اما الكارثة الكبيرة فعلا فهى المطبات و الحفر بصراحة انا طول عمرى عايش فى اسكندرية و عمرى ما شفت كم المطبات و الحفر دى قبل كده و يا سلام لو رايح اى مشوار فى اى شارع جانبى تكره عيشتك و اليوم اللى دخلت فيه الشارع + الناس اللى بتعدى البحر و تعد تترقص بين العربيات و الاسكندارنية عارفين ان كل يوم على الاقل واحد بيموت

**okky222** · 09-03-2008 02:47 PM

و هذا هو الحال عندنا فحلوان ( مطبات و طلع لها شوارع ) المهم و المفيد مافيش حد ابن حلال يدلنى على شارع بدون مطبات عشان العربية لسه زيرو ؟ و الأجر و الثواب عند الله .
و يجعله عامر

**Moh.Fahmy** · 09-03-2008 03:10 PM

و الله يا جماعة الواحد بيتكلم من همه اليومي
و الله انا من كتر ما بدعي علي المحافظ بيصعب علي لاني بقول اكيد مش لوحدي اللي بيدعي
انما حرام بصراحة تبقي عربية لسه زيرو و يتعملها ظبط زوايا بعد سنة
مقدر شعورك يا احمد بسيوني.. ربنا يعينك و الله انا بقالي فوق عن الاربع شهور ما روحتش العجمي بسبب تحذيرات الاصدقاء من اللي حاصل هناك انت حاول تمشي بالراحة قوي و ما يهمكش اللي وراك المهم انك ترجع بالسلامة بعربيتك و حاول قلل مشاويرك بيها لغاية ما يسفلتونا

بالفعل كل يوم واحد بيموت علي البحر او علي الاقل انا بشوف واحد كل يوم و خصوصا الاسبوع الماضي و بكل اسف اللي بيموت مالوش دية لان في معظم الاحوال نفق المشاه بيكون تحت منه فمش عارف اللي بيعمل كده حياته رخيصة عنده للدرجة دي ده احيانا بيبقي واحد و مراته و عياله و النفق علي بعد امتار منه مش عارف بيغامر بحياة عياله بالسهولة دي ازاي

و الله انا يوم الثلاثاء الماضي كنت بغسل عربيتي في بريدجستون و سلمتلهم الساعة 12 كنت حستلمها الساعة 3 و نص فقلت اقعد علي كافيتيريا شحتوت و كنت لوحدي كمان و عديت من النفق لان المنظر مرعب يا جماعة الكورنيش بقي واسع قوي و العربيات بترمح فمش ممكن تتحكم في الموضوع

ربنا يستر علينا جميعا و يبعدنا عن الحوادث

محمد فهمي