الموضوع: اسبراتير السيراتو

المشاركة الأصلية كتبت بواسطة amrelsaqqa

في العربيات الجديدة انسى الاسبراتير و الابلتين والكوندنسر و حتى المشط الالكترونى وتقديم و تأخير الكهربا وطبعا الكربراتير و العمة والرداخ والكلام القديم المنافلة ده :d

ويقولك العربية دى كربراتير ولا انجكشن
يعنى قديمة ولا جديدة ؟

في العربية القديمة كل حاجة شغالة بحاجات ميكانيكية ( سوست و مسامير وانابيب وحاجات واخدة ضغط هوا و حاجات بتقفل وتفتح زي الابلتين مثلا ... ) حاجات كلها ميكانيكية محتاجة ظبط ومش دقيقة وبتبوظ بسرعة ولو ظبطة الفابريكة ضاعت انسى خلاص ..




في العربية الجديدة كل حاجة مرتبط بشريحة الكترونية بتتحكم فيها اسمها كمبيوتر العربية ecu engine control unit
يعنى وحدة التحكم في المحرك


طيب وحدة التحكم في المحرك دى هتتحكم ازاى في العربية ؟
يعنى ازاى كمبيوتر هيدخل بنزين للموتور بدل الكربراتير مثلا او يظبط كهربة العربية وبناء على ايه ؟

تيجى هنا حاجة اسمها الحساسات sensors

كل حاجة ليها حساس بينقل للكمبيوتر معلومة معينة يفهم الكمبيوتر منها حاجة وياخد قرار معين يبعته لجهاز معين يقوم بدور معين (زي الرشاشات و طرمبة البنزين ووحدة الاشعال )

الحساساات دى ساعات تبقى عبارة عن مقاومة ريوستات بسيطة تعبر عن اي حاجة بتغير في الجهد الواقع عليها
وممكن تبقى اجهزة فيها مواد كيميائية حساسة لمواد معينة ( زي مثلا حساس الاكسجين ) .. الخ

من امثلة الحساسات

حساس الكرنك crank position sensor
ده بيبعت اشارة كهربية للكمبيوتر تبين عمود الكرنك واقف فين و بالتالى الكمبيوتر يعرف يعد عدد لفات الموتور ويقدر يعرف حركة عمود الكامة ( بدل شاكوش الاسبراتير ) وبالتالى مثلا يدى الاشارة لوحدة الاشعال انها تدى الشرارة للبوجيه في الوقت المناسب ( وبكدة استغنينا عن الاسبراتير باللى فيه )

طبعا حساب وقت الشرارة بيدخل فيه عوامل كتير ( مش ظبطة ثابتة زي ما كان في الاسبرااتير - و دى ميزة كبيرة)

العوامل الكتير اللى الكمبيوتر بيحسبها لوقت الشرارة بتدى افضل استفادة من المحرك يعنى بالبلدى طول ما الموتور شغال ، كمبيوتر العربية عمال ياخد بيانات من الحساسات و يعمل عمليات حسابية يقوم مثلا مقدم ومأخر الكهربا كل شوية اوتوماتيك حسب ظروف الموتور وسرعته والعربية وسرعتها ونوع البنزين و و وو بدل ما كان الاسبراتير مظبوط في وضعية واحدة وكل شوية يحتاج ظبط..


فطبعا بقى افضل من الاسبراتير لأنه ادق ومش محتاج ظبط ومش هيحتاج تغير ابلتين وكوندنسر كل شوية وتلاقى الشرارة ضعفت و العربية تزيد من استهلاك البنزين والكلام ده كله ..

ده جزء الكهربا ودور الكمبيوتر فيه

جزء البنزين

من اول ما العربية تدور في حساس اسمه حساس الايدل idle
ده زي بك السلانسيه في العربيات القديمة بيدى الكمبيوتر معلومة بحيث يظبط عدد لفات الموتور ع السلانسيه تلقائيا

و فيه مجموعة حساسات كتير مش هينفع نقول كل التفاصيل هنا
زي حساس الشكمان او حساس الاكسجين و ده وظيفته انه بيقيس نسبة الاكسجين في العادم و بالتالى يبعت اشارة للكمبيوتر انه يظبط نسبة الهوا والبنزين اوتوماتيك ( بدل مسمار الهوا و البنزين في الكربراتير )
وحساسات تانية زي الtps و الmaf

وبكدة ضمنا اننا هندخل خليط مظبوط 100 100 للموتور يدى افضل اداء وافضل استهلاك للبنزين بدل ما كان الميكانيكى بيظبط المسمارين بالسمع و كل شوية العربية تتبرجل وتحتاج ظبط تانى و الكربراتير يتسد و يرجع يتغير وشغلانة

بالنسبة لدخول البنزين نفسه للموتور

الكمبيوتر بيشوف سرعة العربية بشكل مستمر ( اكيد طبعا هنا في حساس بيبعتله سرعة العربية ) والحمل اللى على الموتور وعدد لفاته كام بشكل مستمر و بيبدأ يحسب في معادلات وفي الاخر يبعت الاشارة لطرمبة البنزين الالكترونية ( بدل رداخ البنزين اللى كان شغال بضغط هوا من الموتور ) تقوم واخدة بنزين ع القد بالظبط من التنك وتبعته للرشاشات
يدخل الخليط مظبوط للموتور
وبكدة العربية تقدر توفر في البنزين وفي نفس الوقت تاخد البنزين اللى هى عايزاه مع السرعة

وهو ده الانجكشن يعنى حقن الوقود
العربية بتاخد بنزين كأنها بتاخده من حقنة
يعنى على القد بالظبط و بدقة عالية و بأي كمية صغيرة او كبيرة


مش زي زمان كان يا اما تلاقى بيكات السرعة واسعة في الكربراتير
تقوم العربية تسحب حلو بس تاكل بنزين

يا اما الكربرااتير بيكاته ضيقة تقوم موفرة شوية في البنزين بس السحب يضعف ..


يعنى الكمبيوتر بيقدر يدخل بنزين قليل جدا او كتير جداا حسب ما االعربية عايزة بالظبط

ويقدر يظبط الكهربا زي ما العربية عايزة بالظبط

بناء على ده كله ..

الكمبيوتر لما دخل العربية خلاها احسن و ادق و اسهل في الصيانة للمتخصصين


ومواتير السي سي بتاعها قليل بقت تدى قدرة حصانية اعلى و صوت الموتور اهدى والعمر اطول وقدرنا نستخدم بنزين اوكتان اعلى ( 92 و 95 ) يدى اداء افضل وتوفير اكتر للبنزين

وبما انه كمبيوتر بقى ممكن يتوصل بأي كمبيوتر تانى عن طريق كبل معين في العربية ولو في اي عطل للعربية تعمللها scan على جهاز اسمه اسكانر يعرف العيب فين بالظبط ( العيب في انهى حساس او انهى جهاز ؟ )
بدل ما الواد بلية يفتى ويقعد يجرب وتدفع فلوس قد كدة في تغيير حاجات كانت سليمة



كمان مبقاش حد يروح للميكانيكى كل شوية يظبط الكهربة ويرجع يظبط الكربراتير ويجيب طقم اصلاح ... و الكربراتير يتاثر بالاسبراتير والشغلانة دى كلها ..

من الاخر العربية ظابطة نفسها بنفسها وفيها مخ بيفكر


بس طبعا عيوب النظام الجديد
ان الميكانيكية القدام ماكانوش فاهمين اي حاجة خالص في العربيات دى وبيعتبروها معقدة جدا وكانوا بيخافوا يشتغلوا في اي حاجة فيها ( وعشان كدة كرهوا العربيات الجديدة في الاول لأنها قطعت عيشهم و خوفوا الناس منها )

بس دلوقتى في ميكانيكية كتير طوروا نفسهم وبدأوا ياخدوا دورات ويروحوا التوكيلات يشتغلوا ويتدربوا فيها ويجيبوا اجهزة اسكانر في ورشهم و الموضوع بدأ يحل محل النظام القديم تدريجيا - يعنى العيب ده بدأ يتحل بعد ما كان في الاول الصيانة في التوكيل فقط ده ان عرفوا كمان !



العيب التانى ان كمبيوتر العربية ده غالى جدا لو باظ ممكن يوصل سعره لأكثر من 10 الاف جنيه (و استيراد كمان) بس طبعا هو نادر جدا انه يبوظ


وطبعا العيوب دى اللى اتحلت كلها مع الوقت ما تجيش حاجة خالص مع كل الامكانيات الجديدة والفرق الرهيب اللى بقى بين العربيات الجديدة و القديمة


اسف للتطويل بس انا حبيت ادى نبذة لأن الموضوع يستاهل

تسلم أيدك وكتر خيرك
المشاركات الى زى دى الواحد بيفتقدها وبيشفها كل فين و فين الصراحه
شكرا

المشاركة الأصلية كتبت بواسطة midosalah

تسلم يا باشا كلام زى الفل
انا حسس بالضبط انك بتتكلم على عربيتى
ادعولى أغير قريب ان شاء الله

كله باوان يا غالي وربنا يوفقك للخير و يرزقك باحلي من الي معاك مليون مرة