الموضوع: رأيكم فى مشروع مركز صيانة

المشاركة الأصلية كتبت بواسطة tananybasha

انا باشوف مكان جديد
و ان شاء الله هيبقى مفاجأة

هيبقى فى الأراضى المقدسة

يبقى أنا هستنى على العفشه شويه وأبقى أعملها عندك أنت وليثى

بالتوفيق بأذن الله

السلام عليكم ورحمة الله وبركاته
اخويا وحبيبى محمد طنانى
اخواتى الاعزاء الاوبلاويه
كل سنه وانتم طيبين الاول
اما بالنسبه للمشروع فهو مشروع ناجح وجيد جدا لكن عن نفسى لازم ندرس كل حاجه على حده وبالترتيب
1 - المكان لازم يصلح لعمل ورشه عشان القرف بتاع الحى والاشغالات ولازم يكون قريب من محلات قطع غيار ولو بسيطه وياريت يكون قابل للتوسعه
2 - نركز فى نوع او نوعين بالكتير من السيارات بس ده مايمنعش ان السبوبه لو جت فى نوع تالت ومقدور عليها قشطه
3 - نبتدى بحاجه الاول مثلا الميكانيكا مشيت العمليه فل نخش على الكهربا مشيت ميه ميه نجيب بقى شوية قطع غيار استيراد بسيطه مشيت تمام قوى نزود بقى قطع الغيار عشان دى المكسب فيها حلو وسهل وهى دى اللى هاتقوم المشروع تماما
4 - لقينا العمليه ماشيه نبتدى بقى نزود واحده واحده يعنى يبقى فى تصليح تكييف , عفشه , سروجى , سمكره
5 - مشيت اكتر تمام قوى يبقى فاضل فرن الدوكو و المغسله
ياسلام بقى لو الكلام ده جنب بعضه يبقى محتاجين لحتة ارض . لكن ممكن يبقوا قريبين .
طبعا الكلام اللى انا بقوله هايكلف كتير قوى وده عشان بنبص للمشروع ككل لكن لو ابتدينا واحده واحده مش هانحس بيه لانه هايمول نفسه يعنى لو ما اخدناش من المشروع فلوس الا المصاريف و وجهنا كل المكسب للتوسعه يبقى المشروع ده فى خلال 5 سنين هايبقى من اكبر مراكز الصيانه
نيجى بقى للمشاكل من وجهة نظرى
1 - تامينات وضرايب وتصاريح ودى امرها تقريبا سهل انت بس محتاج واحد محامى صاحبك حبيبك بس لازم يكون غتت ( فى الشغل بس لان نوعية الموظفين تسلتزم التعامل بغتاته ) هايخلصلك كل ده
2 - لو انت لوحدك اتكل على الله . بس لو هايبقى معاك شريك يبقى لازم تحط النقط على الحروف من الاول يعنى ورق مكتوب بينكو ومثبت . عشان النفوس بتتغير وكمان تحفظو حق ولادكو من بعديكو
3 - الدعايه والتسويق لازم تعمل حسابها بس ماتقلقش قوى لان تقريبا اعضاء المنتدى وانا اولهم هانبقى كابسين على نفسك يا اما تصليح او شراء او استشارات او شاى بس انا بحب عصير القصب
4 - مسألة الصنايعيه والاداره مش هانقلق منها قوى لانك اولا فاهم الصنعه فامفيش صنايعى هايستكردك وطبعا اكيد تبقى نايم هناك لان ده مشروع العمر لان مش بعيد على ربنا ( ان شاء الله يارب ) تاخد توكيل عربيات فى يوم من الايام .
هايفضل حاجه واحده ودى اهم حاجه واول حاجه واخر حاجه : الاستخاره والدعاء والتقرب الى الله ( مش قصدى صلاه وصوم وطاعات بس ) انا قصدى انك تتأكد انك هاتتسأل يوم القيامه عن كل مسمار ركبته او نسيته فتتعامل مع ربنا مش مع الناس

ويارب يارب يارب يوفقك يا محمد ويلا بقى اعمل المشروع بسرعه عشان عايز اصلح المخروبه بتاعتى
تحياتى يا محمد بيه
اخوك الصغنن وائل فرغلى