الموضوع: عملت فرش عربية جديد عند جينز كار

المشاركة الأصلية كتبت بواسطة honda_lover

ربنا يخليك يا باشا منور بصحابه والله الاسعار دي انا عملتها قبل كده ومن قريب مش من سنين وطبعا حضرتك عارف ان الحرفيين حرمية نتيجة انه فاكر كل اللي جايله بيه وهو ميعرفش اللي فيها ولا الفلوس دي بتيجي ازاي ما علينا خلينا في موضوعنا اللي انا مستغربله ازاي جسملك الكرسي كده من غير ميشيل الفرش الاصلي ؟ اصل التجسيم ده لازم يكون فيه سيخ حديد كده ويدبله فالساقط بتاع الكرسي عشان كده انا قولت انه شالك الفرش الفبريقة وبالنسبة للجلد الطبيعي لو وحش او الصناعي احسن منه مكانش نزل فالـ بي ام والمرسيدس هو ممكن يكون الصناعي احسن في حاجات بس الطبيعي احسن بكتيير كفاية الشمس وتحمله ليها
و مبروك يا باشا علي الفرش الجديد ونصيحة بلاش تنضفه بالمية كتير علي قد متقدر عشان ميشققش مع الشمس.

الحرفيين فيها الكويس وفيها الزبالة
انا ساكن جنبها من 2002
يعني شوفت هناك اللي محدش شافه
وعرفت مين الكويس ومين الوحش
او على الاقل اعرف الويس واللي معرفوش بصنفه وحش الى ان يثبت العكس
لان الحرفيين كمنطقة بتعتمد على العميل (الطياري) اللي نازل يعمل فيها حاجة ويمشي
لكن اللي زي حالاتي بيكون واخد وضعه كويس جدا وعارفينه بالشكل والاسم وعارفين انا مين وبعرف اخد ايه وادفع كام
انا وكل اللي من طرفي عشان كدة مابيكتروش في الكلام
بالحق والادب والاصول ويكون مرضي وانا مرضي

الجلد الطبيعي الي بينزل في مرسيدس حاجة والعادي حاجة تانية
مع احترامي لكل اللي بتركبه ده يسوى فوق ال 25 الف جنيه :-)
اكيد التمن ده مش ببلاش وشغل مصانع تانية خالص

التجسيم من غير دق حديد ده الاحتراف زي ما قولتلك
بيخيط الفرش الجلد في نفس غرز الفرش الاصلي بالظبط عشاان لما يتشال مايعلمش في الاصلي
وعلى فكرة(امسك الخشب)
الفرش على الحقيقة احلى بكتيـــــــــــــــــــر من الصور
ولو كانت العربية دي كراسيها فيها شغل حلو في الفوم زي النترا وسيفيك 2007
كنت شوفت شغل تاني خالص
لكن كراسي الكرولا تقليدية جدا ف مش بتظهر جمال الشغل

اخر حاجة افضل تنضيف للجلد غسلة بمية وصابون كل شهرين او تلاتة
وبعدها على طول تترش عليه ملمع ارمراوول او اس تي بي ويتساب ينشف
ويتلمع مرة كل اسبوعين او شهر عشان مايشققش من الشمس

تحياتي

شكرا لذوقكم
هو شغلهم حلو فعلا
والجلد طبعا بيعرق والقماش كمان بيعرق لكن بردجة اقل قليلا
ولازم تهوي ضهرك في القعدة
ونصيحة لا افضل ابدا عمل جلد في قماش
ده خام وده خامة
ده تحمل وده تحمل
يعني عوامل التعرية هاتظهر في القماش قبل الجلد وتديلك ايحاء ان الفرش قديم
وكان احتمال الخياطة تفزر من بعضها عشان تماسك الخيط مع الاحمال والاوزان في القماش غير الجلد
الخامات انا بطلت اسئل بصراحة
لان مابقاش فيه امريكي والماني
كلها خامات جاية من حتة واحدة
لكن عشان الناس تفرق بين خامة تقيلة وخفيفة بقت تقول امريكي والماني وتركي وغيره

هما اشتغلو في بعض الابواب زي جين تو
بيمشو برالراحة وببطء عشان مايجربوش في عميل