موقف غريب جدا حصلى من فترة ومازلت حتى الان مش عارف اقرر اعمل ايه فيه ( متأسف على الاطاله مقدما )
الحقيقة الموضوع مش محتاج حل جهنمى يعنى بس كل ما هنالك ان فى كذا حل وكلهم غالبا صح ومش عارف اعمل ايه منهم
الموضوع انى فى وظيفه ما وعندى زميل على نفس الدرجة الوظيفية بالظبط لكن أقدم منى فى التعيين , اللى حصل اننا لينا مكتب فى غرفة ومكتب مديرنا المباشر فى غرفة تانية , اكبر بالطبع وانضف وبرستيجها احسن بكتير ومكيفه
مديرنا المباشر قدم استقالته وتم اسناد كافة مهامة الوظيفية ليا انا , لكن بدون ما اكون مدير يعنى بقيت اخلص شغله ويتابع معاى المدير العام وزميلى اللى كان معاى بياخد اوامره من المدير العام برده
لما مديرى المباشر كان موجود كنت انا الوحيد اللى من حقى استخدم مكتبه فلما مشى سلمنى كل متعلقات مكتبه برغم انه كان لو لمح فى يوم حد قاعد على مكتبه ممكن يصور قتيل , وقالى على باسوورد الجهاز بتاعه علشان استعمله
استلمت المكتب واستخدمته لمده اسبوع حتى انى غيرت الديكور وروقت الملفات وعملت اعادة ارشفه لكل الشغل , يعنى كل حاجه بتاعتى وشغلى الخاص اللى زميلى ملوش علاقه بيه دلوقتى من قريب ولا من بعيد
طبعا انا علشان بشتغل part time فممكن اقعد اسبوع واتنين مبروحش الشغل وبروح بس فى اوقات معينه لما يكون الشغل محتاجنى هناك , فى يوم كلمنى زميلى طلب منى باسوورد الجهاز بحجه ان الجو حر فى مكتبه ومكتبى الحالى مكيف فهو عايز يقعد فيه , كنت محرج جدا اقوله لا ومن غبائى اديتله الباسوورد
لما رحت المرة اللى بعدها لقيته قاعد على مكتبى ولما بقوله قوم علشان عندى شغل قالى معلش انا اسف وكدا بخلص بس حاجات وكدا فهشير لك الشغل على المكتب التانى اقعد هناك , برده بحسن نيه انا قولت يا عم هو فرحان بالقعده هناك مش مشكله يعنى لما اقعد انا هنا يوم
وبعدين لقيت كلام من زمايلنا ان فلان خلاص راح هناك وبقا مكتبه , فتانى يوم جيت قعدت على المكتب ولما جه قولتله اسحب شغلك كله من هنا بعد إذنك ومتقعدش هنا طول ما انا باجى تقدر تقعد بس ايام ما انا مش موجود ( عبط وحسن نيه برده )
ومن ثم الموقف المراد بقا , جيت الشغل بعد اجازة اسبوعين لقيت باسوورد الجهاز متغير , سألت ال IT قالى ان الجهاز كان متفيرس وفلان طلب اننا نفرمته وبعدين هو اللى غير الباس
اتصل بصاحبنا 3 ايام ورا بعض مبيردش على تليفونه وبيجى فى مواعيد غيرى علشان مشوفهوش , لدرجة انى دخلت للمدير العام قولتله اسمها قله ادب لما يغير باس الجهاز وانا مش عارف اشتغل فين وكدا قالى انا هتصرف
جيت بعد الموقف ب 3 ايام لقيت الاخ قاعد على المكتب , فبقوله قوم لقيت قلبه جمد وبيقولى ده مكتبى وانا متفق من قبل ما مديرنا يمشى انى هاخده مع المدير العام وانا اقدم منك وكلام من ده
ومن ثم فوجئت بأنه مسح شغل مهم جدا جدا جدا بتاعى من على الجهاز بدون نسخه وده لوحده عندى اهم من المكتب نفسه , الخلاصه انه متمسك بالمكتب وبيقول انه من حقه وعلشان مضيعش صيامى قولتله لما يجى المدير العام يفصلنا فى الموضوع ده
ملحوظه هامه , جنب المكتب متعلقات خاصه بشغلى انا بس وعلشان اروح المكتب التانى كل ما احتاجها هاجى اخدها وارجع تانى وهكذا , بجانب ان شغلى يتطلب مقابله ناس وهو مطلب متوفر فى المكتب الجديد ومستحيل فى القديم , ومن ثم اخيرا طبعا انى بمهام عملى الجديدة بقيت الشخص القائم بالمسمى الوظيفى ده لكن يمنعنى عن انى ابقى مدير او اخد اللقب بتاع الوظيفة انى مش موظف دائم
دلوقتى زميلى بيقول انه اتفق مع المدير العام على كدا وده لو صحيح يبقى بعد ما انا اشتكيت للمدير وهو مع ذلك قاله خد انت المكتب
انا المفروض هكلم المدير فى الموضوع لو قالى اقعد ده حقك ومكتبك من الاول يبقى حلو قوى
لو قالى لا هو يقعد وانت ارجع مكتبك مش عارف اعمل ايه , ما بين انى بقول انه اقدم منى وابقى عقلى صغير انى اخسر الشغل علشان مكتب وشغل هيافه
وما بين انى بقول دى مسأله مبدأ وهبقى قفا فى الشغل ومش هيبقى لمتعلقاتى هناك كرامه طول الوقت وكل مره هشوف زميلى ده هحس انه استكردنى فى حقى
انا الحمد لله الشغل ده لا باكل ولا بشرب منه ومش هيفرق معاى ب 3 تعريفه ماديا لو سيبته الصبح , بس هى مسأله كرامه , مع العلم انا شغلى أهم 20 مره من شغله لأنى انا اللى بعمل الاساس وهو الفرعيات , وانا اعرف اعمل كل شغله لكن هو ميقدرش يعمل اى حاجه من شغلى
يعنى لو تمسكت بموقفى هضغط على الشغل كله , لأن المكان كله الحمد لله لو مشيت هيقف على
هل فعلا الراجل ده يستحق المكتب لقدمه فى التعيين وانا اللى المفروض اخد المكتب الصغير وامشى حالى وخلاص , ولا الموضوع مش أقدميه واتمسك بموقفى ؟!!!
محتاج رأيكم بحكمه وعقل , ومتأسف جدا على الإطاله
المفضلات