حد ليه في الفوركس ؟!

**hemalotfy** · 30-08-2010 02:07 AM

يا جماعة الموضوع ده شاغلني من زمان ونفسي اجربه وحاولت ابدا لقيت نفسي مش فاهم حاجة في اي حاجة نزلت كورسات تعليمي وبرضو حاسس ان الموضوع عايز خبره قبل ما يحتاج معرفة
تنصحوني بايه ؟

**أحمد كمال** · 30-08-2010 02:33 AM

الحوار ده 99% منه فكسان و نصب و سيبك منه لو باقي على قرشك ..... نصيحة لوجه الله

اللي بيكسب من الموضوع ده محتاج راس مال كبير جدا عشان المكسب ممكن يبقى ملاليم (فعلا) في كل دولار او يورو مستثمر ..... يعني عشان تكسب مكسب عليه القيمة (ده لو ما خسرتش و لبست في الحيط) محتاج تحط مبالغ مهولة

**MaZaGAngeE** · 30-08-2010 04:14 AM

الفوركس ده استثمار في بورصة العملة و ليه قوانينه و أصوله و زيه زي بورصة الأسهم لكن معدل المخاطر فيه أعلى بكتير و كمان معدل الربحية عالي جدا و كتير من الناس بتخسر فيه عشان مش متعلمين أصوله كويس و انا واحد منهم ...
احنا بنخسر عشان بنضارب لأن رأس المال عادة بيكون رقم صغير حوالين ال 500 دولار و بالكتير 2000 دولار و شركة الوساطة بتديلك اضعاف رأس المال للمضاربة طول ما الرصيد بتاعك يسمح ..
من أكبر مشاكل الفوركس مواعيد عمل البورصات العالمية اللي بتغطي ال 24 ساعه على مدى 5 ايام في الاسبوع و ده بيصعب علينا المتابعه و كمان هتحتاج تتابع الاخبار اللي بتأثر على العملة و فيه ناس بتتاجر في وقت الاخبار وناس تانية بتبعد عن السوق وقت الاخبار ...
عموما كل واحد لازم يختار استراتيجية و يلتزم بيها ..
الفوركس مش نصبة ده عمل و تجاره و فن بس هتحتاج وقت كبير تدرس فيه و تجرب لحد ما ترسى على استراتيجيه تناسب شخصيتك و راس مالك
و ممكن تقرا اكتر في منتدى المتداول العربي او نادي خبراء المال و انت هتلاقي ناس كتير محترفين ممكن يساعدوك و انا موجود هتاك بنفس الاسم و لول عايز تسأل عن اي حاجة تحت امرك