انظمة trac و vsc .. ما هي ؟ و كيفية عملها ...

**BLOODY_STONE** · 30-08-2010 03:05 PM

نكمل بقى شرح بقيت انظمة تويوتا .. معانا نظامين جداد : نظام VSC او vehicle stability control
و نظام TRAC او Traction control

في الاول حنبدا ب vsc او ممكن نقول عليه بالعربي : نظام التحكم في ثبات او توازن المركبة ..

و ده نظام انا بحبه جدا جدا (بس للاسف شايلينه من الياريس الموجودة في مصر) (عشان كده الياريس مبتعومش بره)

النظام ده طبعا ليه فوايد كتير ... و ظيفته الاساسية ببساطة : لما تفقد السيطرة على العربية ( ماشي على تلج مثلا و حودت بسرعة او كنت ماشي بسرعة و كسرت الدركسيون جاااامد) يعني في اي موقف مفاجئ ميخليش العربية تعوم او تحود من ورة ولا تلف حولين نفسها لاقدر الله .. عن طريق التحكم الاوتوماتيكي في الفرامل (و الموتور نفسه احيانا) بدون اي تدخل من السائق ...

مكونات النظام :
1) حساس سرعة عند كل عجلة ...
2) حساس لمعدل الدوران : بيكون موجود في نص العربية و بيحس بمقدار دوران العربية حولين خط المنتصف بتاعها ..
3) حساس يحس مقدار دوران العجل الامامي والدريكسيون ..

طريقة العمل : نظام الVSC عمره ما يشتغل اطلاقا في القيادة العادية .. يشتغل بس لما يوصله اشارة بدرجة معينة من الحساسات اللي قلناها قبل كده .. و المعلومات دي بتروح للكمبيوتر الخاص ( بيكون متوصل مع ال ECU) و الكمبيوتر بيكون متوصل بنظام هيدروليكي متوصل على الفرامل و الموتور عشان يتحكم فيهم براحته .. طبعا الكمبيوتر بيحدد قوة و مدة الضغط على الفرامل و ممكن احيانا توصل انه يتحكم في الموتور و يقلل ال ار بي ام بتاعه .. العملية دي كلها طبعا بتتم في اجزاء من الثانية و من غير ما السواق يحس بيها اطلاقا ( يقعد يقولك بقى انا عربيتي جاااامدة و مش بتعوم و مش بتزحلق) و مش عارف ان ال vsc طالع عين ابوه ...

في طبعا نصيحة بنقولها للناس اللي عندها النظام ده : دايما اكشف على الحساسات و شغلها و متخدش ثقة كبيرة اوي عشان لو واحد من الحساسات دي باظ السيستم كله بالسلامة .. و ده ممكن يسبب الحوادث لا قدر الله ...

ده فيديو بيوضح اللي قلته بالتفصيل الممل :
[youtube]http://www.youtube.com/watch?v=xPxt6Pw00yA[/youtube]

تاني حاجة : نظام ال TRAC او نظام التحكم في قوة الجر >>>
ده نظام سهل و بسيط جدا .. و جه ببساطة : مثلا واحد واقف على ميه او زيت او تلج .. و داس بنزين جامد .. طبيعي ان العلجة اللي فيه الدفع تقعد تلف حولين نفسها و العربية واقفة في مكانها ..
كل الفكرة : النظام ده بيمنع الموضوع ده عن طريق برضه حساسات على الموتور و حساسات على عجل الدفع بتحس لما العجل بيلف بسرعة و مفيش زيادة في سرعة العربية و ده ساعتها بيشتغل اوتوماتيك و يقلل جهد الموتور و ال ار بي ام و يطلع العربية واحدة واحدة حتى لو دايس بنزين عالاخر ...
طبعا ده الناس بتوع التخميس و التفحيط و الكلام ده بيكرهوا النظام ده جدا جدا جدا لانه مبيخليش العجل يدور عالفاضي

في عربيات بتبقى مجهزة انك تقفل النظام ده ( زرار .. دوسه و خمس براحتك) , و ده كان عندي في الكابريس زمان ( الله يرحم ال 8 سلندر و 5000 سي سي بقى) و في عربيات بيكون موجود فيها عالطول و مينفعش تفصله الا من علبة الفيوزات و قرف بقى ...

شوية فيديوات برضه توضح :

[youtube]http://www.youtube.com/watch?v=YIxEjzfNPR4&p=C73115A78938D0FE&playnext=1& index=25[/youtube]

و هنا واحد بيحاول يعمل burnout و التراكشن بيمنعه هههههههههههههههههه

[youtube]http://www.youtube.com/watch#!v=oJTV0330yW0&feature=related[/youtube]

اتمنى انه يكون الموضوع عجبكوا ...

**BLOODY_STONE** · 30-08-2010 03:17 PM

ايه ده بقيت الموضوع فين ؟؟؟؟؟؟؟؟؟؟؟؟؟؟

**BLOODY_STONE** · 30-08-2010 03:27 PM

مش عارف بقيت الموضوع اتمسح ليه بس ده الباقي اهو :

نظام ال traction control او التحكم في الجر :

ده ببساطة : لما تكون واقف على ارض بتزحلق و تدوس بنزين جااامد طبيعي ان عجلة الجر تلف حولين نفسها عالفاضي من غير تغير ملحوظ في السرعة ... النظام ده بيمنع النقطة دي عن طريق برضه حساسات في العجل و الموتور و كمبيوتر برضه (يفرمل و يقلل ال ار بي ام و يخلي العربية تطلع واحدة واحدة حتى لو مفعص دواسة البنزين ) ...
ده فيديو واد بيعمل burnout و نظام التراكشن بيمنعه :

[youtube]http://www.youtube.com/watch?v=oJTV0330yW0[/youtube]

و ده فيديو يوضح الفرق ما بين لو في او مفيش VSC

[youtube]http://www.youtube.com/watch?v=hkXU8jtVw58[/youtube]

**BLOODY_STONE** · 30-08-2010 03:28 PM

الفرق بين عربية فيها و مفيهاش VSC في الواقع :

[youtube]http://www.youtube.com/watch?v=hkXU8jtVw58[/youtube]

**asemx1** · 30-08-2010 04:10 PM

احلى شغل يا باشا والله تسلم ايدك بس على فكره الياريس الكامله ال 2009 فيها تقريبا vsc والله اعلم
لانى لقيتها فى علبه الفيوزات ومحطوط الفيوز بتاعها
وبعدين جيت فى مره ومشيت بسرعه وحاولت انى اخلى العربيه تعوم منى جاااااااااامد لقيت مافيش فايده مش عايزه تعوم وعاضه على الارض
ولقيت فى ناس كتير بتشتكى من ثبات الياريس الفاضيه الى مش فيها abs والناس التانيه بتشكر فيها الى عندها abs
ولما جيت فى مره شيلت الفيوز لقيت ثباتها وحش جدا فى الملفات وحاسس ان ظهرها عايز يطيح والفرامل كانت وحشه جدا
وبرضو دا الله اعلم بس انا الحمدلله وبستر ربنا باخد ملفات على سرعه 120 و 130 الانسر بتعوم فيها على 110 او 100 وعن تجربه مع واحد صاحبى معاه سوبر اكشن العربيه لفت منه وخبط فى الرصيف