الموضوع: غيرت سير وبلية شداد السير لجيتا وباظو بعد شهر مازا افعل

المشاركة الأصلية كتبت بواسطة ehab_ramez

السلام عليكم
انا معايا جيتا 2007 ماشية 69000 زي الفل قلت اعمل الصيانة واغير السيور وكل حاجة محتاجة تغيير فاشتريت سير الكتينة+بلية الكتينة وسير الدينامو+بلية شداد الدينامو و بوجيهات و فلتر هواء وانا اشتريتهم من عند واحدمشهور قوي ويقال عنة انة امين وقطع اغيار اللي عندة اوريجانال ومع ذلك اكدت علية بكلامي لة(لو سمحت انا عايز كل حاجة اوريجانال مش مهم السعر)لقيت الراجل بصلي بكل فتور وقال لي كويس الحمد لله علشان انا دقيق شوية في موضوع الاصلي لكثرة سفرياتي وكلة طرق صحراوي المهم تم تركيب قطع الغيار وكلة تمام علي يدي خطوة خطوة ومشيت وانا حاسس اني انجزت
وبعد حوالي اسبوعين كنت في الغردقة وانا بدور الموتور سمعت صوت حاجة بتحك في حاجة ناحية سير الدينامو والموتور داير اتضايقت قوي وبقيت مش عارف العيب اية بس لما الموتور سخن الصوت راح وما ركزتش الا لما رجعت القاهرة وبعمل صيانة للعفشة وبعد الصيانة كان الموتور برد فلما دورت ظهر الصوت فسالت الفني قالي دي البلية خشنة قلت لة ازاي ياباشا دا احنا لسة مغيرنها من اقل من شهر من عند فلللللللللللللللللان اللي انتو طايرين بية السما قاللي محتاجة تتغير بس امشي دلوقتي و تعال وقت تاني علشان المحلات قفلت دلوقت وما فيش منها خوف
وبعد حوالي اسبوعين سافرت تاني ومعي الاولاد وقعدت بالغردقة اسبوع ويوم الرجوع دخلت البنزينة امون فسمعت اصوات خربطة عالية قوي فرحت لمركز صيانة بالغردقة واول ما فتح الكبود لقيت ريحة حريق ودخان جامد من السير وفك الفني البلية لقاها قافشة وسايحة والسير متفرتك فغيرناهم وشكرت ربنا ان الموضوع ما حصلش علي الطريق خصوصا اني كنت بالليل ومعايا الولاد
انا اسف اني طولت عليكم بس انصحوني ماذا افعل
اسكت ولا اعمل اية بس انا كل ما اتخيل اللي كان ممكن يحصل لو مشيت من غير ما اركز مع الصوت بس ربنا ستر

لا طبعا تسكت ازاى دة يا اما حرامى وعارف ان الحاجات دى مضروبة يا اما اهبل ومالوش فيها وبينضحك علية فى قطع الغيار

حضرتك تاخد الحاجات البايظة وترميهم فى وشة وتشوف هايتصرف ازاى طلع محترم وغيرهم يبقى خلاص ...لاقيتة مشغل اسطوانة دة عيب تركيب والكلام الاهبل دة يبقى تشتكية وتطلع عينة

عزيزي قطع الغيار الالماني عمرها طويل جدا ومعمره لابعد الحدود وده سبب انك اشتريت عربيه الماني من الاساس
رايي انك تروح للراجل وتقوله على اللي حصل عشان هو راجل غير امين وغشاش وتشوف ايه اللي يحصل وبرضه تشهر بيه في المنتدى وتبلغ عنه حماية المستهلك ده في حالة انه تنكرلك او قل ادبه . وبعدين قطعة الغيار دي غير مرتبطه اصلا بسؤ الاستعمال . يعني دي مغشوشه ميه في الميه . وتحرى الدقه في قطع الغيار بعد كده .