السلام عليكم ورحمة الله وبركاته

من كام يوم العربيه كملت 25000 واتصلت احجز لقيت ميعاد قريب وبعد الفطار قولت تمام

الجديد انى بعد ماحجزت لقيت مسج على الموبايل بميعاد الحجز اليوم والساعه ورقم الحجز

وبعدها بيومين لقيت برضه مسج نذكركم بالميعاد يوم كذا والساعه كذا وللاعتذار اتصل قبلها ب 48 ساعه

قولت حلو ان فى تنظيم فى الموضوع

المهم ميعادى كان الساعه 9:10 ( شوفت الدقه ) ورحت الساعه 9 ودخلت ذهلت من المنظر

ال 5 حارات بتوع الصيانه مليانين عربيات , قولت دانا هاخلص الفجر يارب الحق اتسحر فى بيتنا

فضلت مستنى حوالى ربع او تلت ساعه وجه المهندس استلم منى العربيه وقاللى العربيه هاتخلض ان شاء الساعه 11 !!!!

قولت حلو جدا انا مكنتش متوقع كدا

ودخلت الاستراحه استنيت وقعدت اتسلى شويه على اللابتوب وشربت لاتيه ب 9 جنيه :)

العربيه خلصت على 11 وربع كدا ورحت ادفع واليكم التفاصيل

صيانة كل 5000 الاف 153 جنيه ( وخصم 10 % بمناسبة رمضان بقوا 137.7 )

فلتر زيت ب 14.09 ( موضوع الفلتر دا مضايقنى لانى غيرته عندهم مرتين قبل كدا وكان اخر مره ب 33.75 ازاى فجأه بقى ب 14 ؟ اكيد حطوا واحد مش اصلى او حطوا المصرى مش الكورى )

مواد مستخدمه 2.47 معرفش بتوع ايه

250 زيت موبيل 10000

ضريبه 10 %

الاجمالى 418

من العيوب المره دى انهم محاطوش الكيس البلاستيك على الكرسى ولا الطاره زى كل مره , معرفش ازاى مخدتش بالى من الموضوع دا غير لما روحت البيت , كان لازم ياخدوا كلمتين

من الحاجات الغربيه برضه انى شفت شيفروليه ابيكا مترخصه ملاكى

وكمان لقيت هامر اتش 3 داخله تعمل صيانه :)

عموما بشكل عام راضى عن الصيانه والخدمه

والحمد لله بعد 25000 واكتر من سنتين مفيش مشاكل ولا عيوب خطيره والاوبترا كانت اختيار موفق بحمد الله

وربنا يبارك للجميع وكل سنه وانتم طيبين