الموضوع: لادا نيفا من مصر - جميع الكماليات

المشاركة الأصلية كتبت بواسطة mnmmnmmnmmnm

أنا و الحمد لله معايا لادا نيفا 2010 بقالها شهرين الحمد لله و عامل بيها 4000 كيلو متر حتى الآن و رحت بيها الساحل طريق العلمين و رجعت و الحمد لله زى الفل.
حا أقول لك المشاكل اللى قابلتها و رحت الصيانة أكتر من مرة عشان:
1- بيض العجل الأمامى غيرته على 300 كم بس الميكانيكى قالى عادى لأنها مشكلة تخزين مش قصه , إتغيرت فى الضمان و بدون مصنعية الحمد لله.
2- ولاعة السجائر مش شغالة غيرلى الفيوز فى الضمان و اشتغلت الحمد لله
3- رزعت الشنطة جامد جدا قفلها اتكسر غيرته ب 16 جنيه و 15 جنيه مصنعية الحمد لله.
4- غيرت غطاء البنزين بواحد فيه قفل لأن اللى موجود كان بيطلع ريحة بنزين ب 25 جنيه الحمد لله.
5- فلتر الزيت سرب جامد دهولى العربية إتغير فى الضمان و ماشية كويس الحمد لله.
6- ركبتلها جهاز إنذار ب 250 جنيه و الحمد لله شغال كويس.
7- عملتلها ظبط زوايا و الحمد لله ماشية كويس , أنا سافرت بيها الساحل و رجعت و هى بتحدف شمال و الحمد لله كله تمام.
8- فتيس الغرس ساعات بيعلق من آن لآخر بس ناوى أوديها فى يوم مخصوص إن شاء الله يشوفوه.
9- آخر مرة فى التوكيل واحد جايبها ملاكى اشتكالى مر الشكوى و طلع إنه عنده ريحة بنزين , قلتله حمدى لادا أول شارع دمشق مصر الجديدة عنده الغطاء بتاعها , وقالى طيب الفتيس مشروخ و بيخر زيت , ضحكت و قلت له أكيد حد كسره و هما بينقلوها خليهم يغيروهولك فى الضمان فضحك وقالى ما هما بيغيروه فى الورشة جوة قلتله ياراجل يا طيب طب ما الناس أهية عارفة أن النشكلة مش منك و بيصلحوها لعلمك كل العربيات الصينى مغيرة طنابير و مساعدين و هى لسه فى المخزن قبل ما تتسلم للعملاء لأنها بتيجى من الصين فيها عيوب صناعة و الفيرنا مساعدينتها ضعيفة بس الناس مصرة إنها مية مية فسيبك من الناس.
10- وأنا فى الصيانة سألت واحد معاه نيفا طلع سواق فى شركة أسمنت قال لى عربية زبالة لأنه غير بيض (فى الضمان) و غير اسطوانة دبرياج ب 100 جنيه على 2800 كم (عيب استخدام) و جايبها الصيانة النهار دوة عشان التكييف باظ بعد 25,000 كم , المهم إنه ما قعدتش نص ساعة و ندهوله عشان صلحوا التكييف , المهم يمين شمال طلع ان هوا اللى بيهينها لأنه بيركب شيروكى و تيوتا فا بيقرص عليها زيهم و هى مش بتاعة قرص لأنها مافيهاش تربو.

نصائح التشغيل:
1- العربية ما فيهاش تربو فا ما بتسحبش بسرعة زى العربيات الجديدة اللى فيها تربو فا مهما حصل اطلع على مهلك و خليها تاخد سرعتها و حتلاقيها ما شية زيها زى أى عربية.
2- العربية سرعتها القصوى 130 كم فى الساعة حتى الآن و الحمد لله جبت 120 كم على طريق الساحل بشكل مستقيم لأن العربيات العالية بتعوم فاخد بالك.
3- ما تحاولش تجرى بالعربية أكتر من 80 كم خلال فترة ال 1,000 كم الأولى عشان تليين الموتور و يفضل لو تمشى بيها مسافات طويلة نسبيا 30 كم إلى 100 كم على سرعة 70 على الرابع إلى أن تعبر ال 1000 كم الأولى إن شاء الله
4- الخامس تجيبه بعد ال 90 و العربية على سرعة عشان ما يضربش منك , نصيحة من على النت لناس عاملة أكتر من 50,000 كم بيها.
5- غير مية الريداتير من أول يوم بمية موبيل الخضراء , حتوطى صوت الموتور و مش حا تسخن بسرعة.
6- لو سخنت منك فيه مروحتين بيشتغلوا على درجة حرارة 97 بينزلوها ل 90 و كل العربيات كده لازم تسخن فالى يقولك لادا بتسخن يبقى بيفتى لازم الموتور يبقى أعلى من 80 ل 100 عشان أفضل كفاءة
7- العربية بتستهلك 10 لتر لكل 100 كيلو متر , أنا بظبط العداد الصغير على صفر كل تفويلة و أسيبه لغاية لما تبقى عملت 300 كيلو متر و أفول , نصيحة بلاش تسيبها أكتر من كده لأنك ممكن ما تلاقيش بنزين باليل أو فى وقت زنقه , ملحوظة الجيب رانجلر بتستهلك 60 لتر لكل 300 كم , ال 4x4 ما تقارنهاش بعربية City Car سيتى كار 1100 أو 1300 أو 1500 أو 1600 لأن عزم الموتور أعلى فطبيعى الإستهلاك يزيد , فا انه زاد 2 ليتر بس فى النيفا دا شئ كويس و الحمد لله.
8- التوتر اللى حا تشوفه و تسمعه من زملائك فى العمل و أصدقائك لأنك دفعت 68,000 جنيه فى عربية لادا نيفا و المبلغ دوة كان ممكن تجيب بيه عربية محترمة جدا و جامدة جدا زى (فيرنا ! بيكانتو ! دايو لانوس !) أو عربية مستعملة استعمال نضيف (عاملة حادث و رشة برة و جوة و فوق و تحت موديل من 10 إلى 20 سنة فاتت و عاملة عامرة مرتين و متسقط ليها موتور ميكروباص تويوتا ديزل موديل 89) زى (رانجلر ! شيروكى ! لاند روفر !) حا يخليك تتوتر فا حا يخليك تضغط على العربية عشان تثبت لنفسك إنها كويسة فممكن تعمل بيها حادث أو تبوظها , عشان كده النيفا حا تخليك تعرف من هم رفاق السوء فالبتالى تقدر تزهد فيهم و تقاطعهم و انت مرتاح الضمير.

ملاحظات:
1- السيارة فيها إنجكشن و باور و تكييف
2- 1700 سى سى تكلفة الترخيص السنوى 1100 جنيه و الله أعلم بتنقص 15% كل سنة.
3- كل أسبوعين أو شهر إغسلها فى بنزينة محترمة غسيلل يدوى مش فرش سريعة
4- ما تغسلش الموتور بالمية فيه غسيل كيماوى من غير مية اغسل أول ما تستلم العربية إن شاء الله أو لا قدر الله لو حصل إن فيلتر الزيت سرب و دهول العربية زى ما حصلى , عدا ذلك ممكن تغسل الموتور كل 3 شهور 6 شهور أو سنة على حسب الظروف
5- لأنك زى حالاتى أول سواقة يا ريت تروح مركز سواقة و تركزقوى فى موضوع الدبرياج و النقلات و السرعات عشان لما تسوق النيفا تبقى ماشى عليها مظبوط و تعيش إن شاء الله.
6- راقب سيارات الجيش المصرى حتلاقى النيفا شغالة لغاية اليوم و الحمد لله و راقب الهامر اللى ما كملتش معاهم 10 سنين مش حتلاقيه و العربيات الدوبل كابينه الجيمس ماتت برضه و الشيروكى ضايع و الرانجلر بتاع الجيش بيبصوا عليا إزاى باسبقهم و هما مش قادرين يجيبوا 60 كم ودا لو العربية دارت أصلا و مشيت و طلعت على الأسفلت, مرة كنت باغسلها فى مغسلة قابلنى ظابط جيش على المعاش قالى يابنى دى عربيتك قلتله الحمد لله قالى إيه اللى خلاك تجيبها قلتله عربية كويسة و الحمد لله بتعيش و ربنا يبارك لى فيها آمين يا رب , قالى ربنا يفتح عليك بس العربية دية بهدلتنى فى الجيش و سواقتها متعبة قلتله بس عايشة لغاية النهاردة و انتوا فى الجيش بتبهدلوا العربيات مشاريع و عمليات و خلافه قالى عندك حق عموما ربنا يباركلك فيه هى بس تاخد بالك من الصيانات الدورية و الإصلاحات أول بأول و إن شاء الله تكون تمام.

أخيرا العربية دية بنت حلال ما يسوقهاش إلا راجل عايز يعيش بيها و يقضى مصالح و أشغال و مش عايز يدفع فى العربية أكتر من تمنها ب 20 أو 30 ألف جنيه مصرى.
المهم بأمانة تقوى الله فى السيارة , تشغل فيها قرآن و تروح مشاوير شغل أو مصلحة و تمشى على مهلك 60 , 70 , 80 فى الطرق السريعة عشان رنا يسترها واحد رخم عليك تبصله من فوق لتحت و تجيب الأول و تمشى على أقل من مهلك مش تحرق العربية عشان تجيبة و توريه و تجيب غرز يمين شمال و تزنق و تشيع الناس , افتكر دى عربية ما يسوقهاش إلا رجل بمعنى الكلمة , لو اتقيت الله فيها إن شاء الله حا تكون معاك عروسة و ربنا يكرمنا جميعا و مبروك مقدما لو ناوى تشتريها إن شاء الله

أشكرك فعلا و بشدة ..ردك منطقى و موضوعى...جزاك الله كل خير. إليك تعقيبى:
1- مشكلة البيض: دى سامع عنها من قبل كده. و بيتغير فى الضمان و بعد كده يعيش. ممتاز.
2- مشكلة الفلتر: واضح إنه كان حظك بس ربنا يعوضك خير.
3- ولاعة السجاير: أنا مش بدخن و مش عايزها
4- رزعت الشنطة جامد جدا: الغضب و السرعة ممكن يحصلوا لأى حد و النتيجة مش حتختلف كتير فى أى عربية. يمكن حتى كان الصاج فى عربية تانية يبوظ
5- غطا البنزين بيسرب: ممكن يكون عيب صناعة شائع بسمش مشكلة كبيرة. أنا مغير غطا ال 126 ب 13 جنيه
6- ظبط الزوايا بعد مشوار لحد الساحل و العلمين: حقها!
7- فتيس الغرز بيعلق: كداب اللى يقوللك إنى عايزها أطلع بيها الجبل!! أنا عايزها مضادة لوزارة الطرق و الكبارى.
8- القرص على العربية و تليين الموتور: أنا مش بكره قد الناس دى
9- التوتر و قول السوء: اللى فاكر نفسه جيريمى كلاركسون و لا ريتشارد هاموند يورينى صفار شعره ... الأشقر (قصدى على الحلقة اللى كلها إفترا على الصناعة الروسى بحالها)

عشقا فى جمالك يا نيفا :)

دى صفحة ويكيبيديا للنيفا

Lada Niva - Wikipedia, the free encyclopedia

و دى ترجمة جوجل الركيكة ليها...بس أهى ترجمة

Google Translate

و دى صور المحبوبة..

http://img295.imageshack.us/img295/6...ack1x1600x.jpg


http://img830.imageshack.us/img830/8...x1600x1200.jpg

http://img210.imageshack.us/img210/7...taticx1024.jpg
http://img340.imageshack.us/img340/9...ladaniva14.jpg