الموضوع: ::مشكلة ثبات ال 127...أسباب و حلول::

من المتعارف عليه في سوق السيارات ان ال 127 سهله الانقلاب و مش ثابتة علي الأرض...و ده لاحظته اكتر لما بقرأ ردود الاعضاء في النقطة دي.

طوال ال4 سنين لامتلاكي ال127 لم اواجه مشكلة عدم ثبات السيارة تماما...(انا هنا مقصدش الغرز المتخلفة و الملفات علي 180:)) لكن كانت بتسد في الأوقات الصعبة مثلا واحد يكسر عليك جامد او واحدة تعدي قدامك فجأة...+ انها كانت في الطوالي علي سرعات عاليه 140 مثلا مش بحس اني فاقد التحكم فيها...

الموضوع ده انا قررت اكتبه عشان الناس تعرف ليه ال127 بتبقي مش ثابتة و ايه الحلول اللي ممكن نعملها عشان موضوع الثبات ده ..

أولا أسباب عدم ثبات ال127:

1- اختلاف خلوص السيارة من الامام الي الخلف...بمعني ان السيارة من الأمام تلاقي ارتفاعها عادي و من الخلف بتبقي مرتفعة بشكل ملحوظ..وده بدوره بيخلي مشوار المساعد الخلفي قصير...مما يؤدي الي سهولة فقدان التحكم و الاحساس بعدم استقرار السيارة.

2-أهم مشكله هي ان العجل الخلفي بيكون علي شكل / \....بمعني ان لما تبقي ماشي ورا العربية تلاقي العجل الوراني قالب لبره ....و أكيد شوفتوا المنظر ده...ده طبعا هو السبب الرئيسي لانقلاب السيارة لأن زاوية العجل بتبقي مش في وضع يستحمل الضغط عليها.

3- الكاوتش السئ و الضغط الغير صحيح....كتير من الناس بيتهاونوا في موضوع الكاوتش و بيركبوا أرخص الأنواع أو بيسيبوها لحد ماتجيب جاز...خصوصا من مالكي ال127

4- العفشة المتهالكة: خصوصا المساعدين و جلب المقصات الخلفيه

5-الزوايا...مش محتاجة كلام:)


دي كانت باختصار أهم الاسباب المؤديه لعدم ثبات ال127 ...طبعا فيه اسباب خاصة بال127 عموما و في أسباب تخص جميع السيارات علي حد سواء زي الزوايا و الكاوتش.

نيجي بقي للحلول (ملحوظة: جميع الحلول الواردة من تجربتي الفعلية)

1- أول و اهم حاجة تعملها تروح توطي العربية من ورا 2-3 سم حسب ارتفاعها...بحيث ان المستوي الامامي يبقي زي الخلفي...هتروح لعفشجي و هيفك الورق اللي ورا و يوديه لحداد يسخنهم و يدق عليهم....تكلفة الموضوع ده 40-50 جنيه

2-اظبط زوايا ورا و قدام عند حد محترم و خليه يقلب العجل الوراني ل | | بدل / \....انا كانت عندي عاملة \ / و ده كان مزودها ثبات اكتر.

3-راجع علي جميع أجزاء العفشة و خصوصا الخلفيه و غير اي حاجة مشكوك في امرها. و يفضل تغير المساعدين بمونرو

4-لو الفلوس متوفرة...عليك و علي طقم جنط 13 بكاوتش 165 علي 65

5- تركيب فلانشات بعرض 2 سم عشان نزود التراك ويدث...و العجل يبقي مرمي لبره سنة.


كل الحلول ديه مجتمعة هتخلي العربية مختلفة تماما...كنت باخد بيها الملفات الغبية بتاعة نفق التجمع مثلا علي سرعة 80 و مطبات الهواء و انت ماشي مبتخليش العربية تتنطط او تروح يمين و شمال

أرجو اني اكون افدتكم و وصلت ليكم معلومة كويسة :)

رحمة الله على أخيك .. ولكنها الأعمار أخي الفاضل .. لكل أجل كتاب .. ليس لنوع السياره دخل أو سبب .. كم هناك من حوادث مماثله بالمرسيدس والبي ام في والأودي والشيروكي والأنواع الفخمه الأخرى ...