الموضوع: استفسارات عن الإبيزا عايزة اشتريها

المشاركة الأصلية كتبت بواسطة john_samy_1

إزيك يا باشا عامل إيه؟ معلش ماخدتش بالي من الموضوع
أنا هرد علي حضرتك في المشاركة الاولانية
التوكيل في الصيانة أو تظبيط أي حاجة فوق الممتاز, وحتى الأعضاء اللي اشتكوا من عدم توافر قطع غيار للموديلات القديمة قالوا إن الكشف بتاعهم حلو وكانت معاملتهم حلوة. وحضرتك هتلاقي تقرير عن صيانة ال10,000 في توقيعي.

قطع الغيار موجودة بس اسعارها مختلفة. يعني الكماليات غالية زي مثلا كاسيت dvd أو جنوط. الحاجات التانية سعرها اغلي من الياباني والكوري بس معقول جدا بالنسبة للأوروبي وطبعا الحاجات ديه معمرة جدا. اصلها معظمها قطع فولكس الماني. عامةً فيه ناس كتير شغالين في قطع غير فولكس وسيات و سكودا بره التوكيل. بس أنا هدي حضرتك مثال في اللي أنا جربته فلتر الزيت بـ70 جنيه مثلا جوه التوكيل الماني. بره التوكيل فيه فلاتر انواع تانية بـ45 جنيه الماني برده.

اعادة البيع حضرتك هتخسري فيها لو حضرتك قارنتيها باي عربية كوري بس ده حال الأروبي عموما. عامةً أنا مشفتش ibiza 2010 للبيع مستعمل فـمش قادر أحكم قوي. بس برده العربية ديه شبابي والطلب هيزيد عليها خصوصا إن متورها حكاية ومفيش أي عربية 1600 ( من غير turbo ولا تعديل ) بيطلع منه عن تجربة.
وده تقرير عنها
http://www.nilemotors.net/nile/119447-2010.html

أنا هقول لحضرتك العيوب ونسيب المميزات فالاخر

• العربية زي ماالفئة بتاعتها بتقول ( super mini ) صغيرة في الشنطة. أنا بكون مراجع الكراسي اللي قدام قبل الآخر بسنة وبيقعد واريا 3 ومش بيشتكوا بس أنا عارف إنهم معندهمش براح قوي. بس رجليهم مش بتكون خبطة في الكرسي ولا حاجة من الكلام ده. بس عن تجربة مثلا الcerato فيها براح عنها.
• الشنطة صغيرة ولو ناوية تحطي فيها شنطة سفر يبقي لازم تلغي الكنبة اللي ورا وتتنيها عشان توسعي الشنطة.
• الموتور صوته رياضي وعالي مع الكبس. بس لحد 130 مع قفل الإزاز صوته هادي كل 10 كيلو زيادة صوته بيعلى بس زي ماالأستاذ حاتم قال قبل كده أنا بالنسبالي مزيكا. هو مش مزعج بس رياضي بس طبعا مع السفر مده طويلة فوق ال130 يجيب صداع في حدود 130 بيكون صوته واطي.
• رغم إنها عربية شبابي بس مفيهاش جنوط رياضية ولا حتى الطاسة بتاعتها شكلها رياضية
• مفتقد التكيف الclimate control عشان العربية تكيفها بياخد مثلا 10 دقايق علي سرعة 2 وتبقي العربية تلاجة. بقوم منزله تاني لواحد عشان ببرد, رغم إني مش عامله علي اقصي تبريد قبل الاخر بـحتة كده. وبعد نص ساعة مثلا ارجعه تاني ل2 عشان إزاز العربية عدي مش ملون وبيدخل سخونة. أنا نفسي في سرعة 1 ونص مثلا :c_laugh[1]:
• بس كده مفيش حاجة تانية مديقاني.

المميزات بقي اللي عجباني.

• العربية كلها الماني من جوه ويادوب التقفيل اسباني. ومبنية علي platform ثورة في نوعه من فولكس واجن وبنوا علية polo الجديدة اللي هي car of the year 2010 وكمان الaudi a1 الجديدة. يعني تكنولوجيا متطورة
• الثبات عالي جدا والعربية بتقفش في الارض. وفيها حركة مش موجودة غير فالعربيات الالماني إنك وانتي بتلفي الدركسيون العربية نفسها بتتحرك مع الدركسيون ( جربي تلفي الدركسيون علي الاخر والعربية واقفة وحضرتك تفهمي قصدي ) عشان تدي العربية ثبات في الملفات والغرز
• الفتيس ال7 سرعات حكاية في الشد وحكاية في الماشي بالراحة. البنزين لو حضرتك ماشي بالراحة من من غير تكيف علي طريق مفتوح زي الدائري مثلا مع شوية في وسط البلد بيكون 6 لتر لكل 100 كيلو. مع التكيف بيكون 7 لتر.
• العربية بتجري جدا. لو حاتيط الفتيس علي الs بتبقي وحش وبتطلع من تقريبا من أي حاجة ( أنا طلعت من 318 عادي ) بجد عربية جراية قوي
• تقفيل العربية والعزل حلوين, لو قفلتي الإزاز مع الكاسيت صعب قوي تسمعي حاجة بره (كنت هالبس عشان مش باسمع زمارة العربيات اللي عايزة تاكل غرز من جنبي).
• رغم إن العربية صغيرة بس مريحة جدا سواء قدام أو الكنبة اللي ورا, حتى مع السفر محدش اشتكي من الراحة أبدًا
• عربية مميزة وشكلها حلو قوي وبتديني برستيج كده وانا نازل منها قدام الناس. بجد عربية أوروبية شيك بشكل رياضي. أنا بعشق شكلها وبرستيجها
• كل حاجة تانية فالعربية كويسة مفيش حاجة باشتكي منها

وفعلا أنا موجهنيش فيها أي اعطال هي الibiza اصلا حتى القديم اعطاله قليلة أنا قبل مااجيبها كان عندي واحد صاحبي عندهم 2002 لما سألته عليها قاللي عمرنا ما عملنا حاجة فيها غير الصيانة الدورية ولا عمرنا اشتكينا من حاجة.
بجد عربية ممتازة وعمرك ماهتحسي إن هتعرفي تركبي بعديها غير seat ibiza برده
اتكلي علي الله وربنا يوفق حضرتك.

انا صاحبة الاستفسار الاولانى وبشكر حضرتك على الرد والتوضيح وكل الاخوة اللى ردوا على استفسارى وان شاء الله ربنا يقدم اللى فيه الخير

المشاركة الأصلية كتبت بواسطة John_Samy_1

معلش أنا كمان كنت عايز أشكر في الدهان والصاج بجد الاتنين قمة في المتانة. والفرامل انقذتني كتير وفعلا بتسعف بجد تحفة تانية.
وأي استفسار تاني أنا تحت أمر حضرتك.
سؤال بس كده بسرعة مش حضرتك كنت بتسألي عن Evo أو ابيزا 1.4 في قسم المقارنات؟

فعلا حضرتك انا اللى كنت بسأل وبقارن بينهم وبين الi30وبالفعل اللى فهمته من خلال قراءاتى لاراء حضراتكم ان الابيزا والإيفو افضل وانا برضه بأيدهم والايفو ممتازة بس مشكلة الموتور ال77 حصان شوية مش مشجعانى خصوصا لو حمولة العربية اقصد الركاب كاملة والتكييف مفتوح أعتقد ها يبقى كتير على موتو 77حصان يمكن يكون مناسب فى حالات تانية غير دى وعشان كده رجحت الابيزا وفى الاول وفى الاخر اللى ربنا قاسمه ان شاء الله هو اللى ها يكون . مع الشكر

المشاركة الأصلية كتبت بواسطة john_samy_1

لو كده حضرتك هاتي الibiza إنتي والاولاد هتتبسطو قوي حضرتك هتلاقيها ناعمة ومريحة وهما هيلاقوها قوية وأنتم الاتنين هتحسوا اد إيه هي محترمة.

جزيل الشكر لحضرتك وان شاء الله نجرب الاتنين ونشوفهم وان شاء الله الخيرة فيما اختاره الله.