الموضوع: مش لاقي عنوان ينفع

المشاركة الأصلية كتبت بواسطة ZALABANY

الحل الجزري كلنا نبيع العربيات ونركب تكاتك

تكاتك لا

ممكن غواصات هههههه

نرجع ونكمل
الحل اننا كلنا نشتري حاجه ونحطها في العربيه


الحاجه دي مهمه جدا




مش عارف ازاي العربيات ماشيه من غيرها




موجوده كتير في الافلام الاجنبيه




حتى سلفستر ستالوني معاه واحده




ماهو متخصص بقى




زهقتو ولا لسه؟؟؟

ماشي يا رجاله الحاجه دي هي shoot gun
واي حد يكبس عليك تروح مطلع الشوت جن بتاعك ومنشن عليه ومخلص
وكده حلينا المشكله ( حل جذري )
لو كل يوم خلصنا على 100 واحد يبقى على اخر السنه مش حنلاقي مصريين اصلا

ولكن
...
...
...
...
...
بما ان القتل جريمه يعاقب عليها القانون مضطرين ناخد حل منطقي شويه
(يعني موضوع الشوت جن ده تهريج محدش ينفذه مع انه حل مش بطال )

كالعاده سيبك من الكلام اللي فوق وركز في اللي جاي...

ممكن حد يشرحلي ازاي من امبارح محدش لاقي الحل؟؟
ده بسبب حاله من الشبوره الفكريه اللي مضلمه الدنيا وكلنا معندناش فوجات ههههه
الغريب فينا ان احنا دايما واخدين بالنا من المشكله ومن حل المشكله
المشكله بنكبرها
والحل بنطنش عليه

طب والله العظيم اقطع دراعي لو مكنتوش عارفين الحل


ماعلينا



الظاهر هو ده اسلوب المدارس واحنا واخدين عليه
حناخد الحل بالمعلقه
اولا الناس اللي قالت موضوع الاستيكر وقلنا ده يعتبر حل بس مش سليم
لان مينفعش نقسم البلد نصين
نص من ابو استيكر ونص ربنا يسهله
ولو كان ينفع كنا قسمنا الشوارع احسن

بس الحل ده مش مرفوض تماما
يعني ممكن نعمل حاجه قريبه ليه
مثلا يعني
حط استيكر مكتوب عليه كلام كويس
اكتب مثلا بسم الله
او حط دعاء
او بلاش دي ولا دي
عشان الناس فاكره ان كده العربيه حتبقى تاكسي
حط اي حاجه بتبين ان صاحب العربيه مش ماشي بالدراع
شخصيه لطيفه


يعني الزق استيكر سمايلي
مثلا يعني


حتقولي ايه لزمته حقولك قولي انت ايه لازمه العبارات المستفزه زي ..

If YoU TRY YOU WILL DIE
ناس كتير كاتبين الجمله دي على العربيه
وجمل تانيه ليها نفس المعنى
وجمل تانيه بتعبر عن مدى تفرده وجبروته في الشارع

سواء مكتوبه على عربيه فيات او عربيه هامر اتش 3
غالبا الشاب الفرفرور اللي سايق شايف نفسه شويتين

للأسف اللي محدش واخد باله منه في حكايه الاستيكرات دي انها تعتبر ثقافه عامه بين الناس مش وجهه نظر شخصيه للي سايق العربيه وفاكر نفسه باتمان ((يعني كلنا بنفكر بالطريقه دي )

نعمل احنا العكس ونبين للناس اننا ذوق وجرب ومش حقتلك ولا حاجه

ماهو محدش ييجي يجنني ويقولي ان اللي كبس عليه ولا راكن بالعرض وقافل الشارع ولا الي عمل واللي سوا
نازل مخصوص من بيتهم وحاطط في دماغه يقرف باقي الناس

وبرضو ميجيش حد يقولي اديله عذر


حل اي مشكله اننا نرجع المشكله لاصلها
نبسطها
ونفصفصها
عشان نعرف نفرتكها في الاخر

انا حكتب كام نقطه
هم الحل
يعني 1 و 2 و 3 وكده

وكل واحد يكتبهم في ورقه

الورقه دي .......

تفهمها
تحفظها
تبرشمها

مش مشكلتي المهم انك تركب العربيه والكلام اللي مكتوب فيها يكون لازق في دماغك





حعملكم برشامه القياده السعيده
والله عايز تريح نفسك اعمل اللي فيها
مش عايز براحتك


حتقولي طب انا ايش عرفني ان الطرف التاني معاه البرشامه دي؟؟
حقولك حتى ولو مش معاه
انا يهمني انا اكون مستريح
واريح التاني بقدر الامكان
لو مفيش منه فايده بقى
يبقى انا في السليم وهو يضرب راسه في الكاوتش

معادنا 2 باليل عشان انا مزوغ وراجع الشغل تاني

المشاركة الأصلية كتبت بواسطة Soma_Sooma

مالك بس!!!
انت لسه شفت حاجه

حد بيسمع اغاني mtm ؟؟؟؟
ايه ده انا بس يعني !!!!!

ماشي

حته من اغنيه
( ممكن تنام متقومش وممكن تنزل متروحش ))
حكمه


وانت سايق في الشارع
اي عربيه معديه جنبك
حقه زي حقك بالظبط
عارف كده ولا اعرفك؟؟
اكيد عارف
وفاهم
ومستوعب

نعيد نقطه تاني عشان منتهش
انت بتسوق بأخلاقك
سواء اللي ماشي جنبك ميكروباص
او توكتوك
او s500 (دي عربيه مرسيدس )
بتسوق ب ايه؟؟؟؟

اسم الله عليك وعلى مقامك (اخلاقك )

طب فين الكلام ده ؟؟
مش موجود في الواقع ( ولا اللي موقعش)

يبقى حاجه من اتنين يا اما الشارع بتاع حد....
يا اما مفيش اخلاق عند حد


كده بسطنا المشكله

نخش عالفصفصه

اولا لازم تحترم اللي سايق وعمل حركه بالعربيه مش ولا بد
لانه مينفعش يبقى قاصد
ولو حركه غباء هو برضو مش قاصد
ماهو لو قاصد يبقى انت عملت حاجه الاول وهو بيحاول ( قال ايه ) يأدبك
سواء اللي سايق راجل او عيل او ست او حتى العربيه ماشيه لوحدها

حتقولي ليييييييييييييييييييييه؟
حقولك ما قلنا الشارع مش بتاعك ولا بتاعه وهو وانت ملكوش شارع اصلا
انت ذوق واخلاق وهو نزل وساب اخلاقه في البيت بتستحمى
امسحها فيا ابوس ايدك ونفضله

بس برضو مقصدش تاخده على قد عقله

اصلك مش حتاخد البلد كلها على قد عقلها

ولو موضوع المسامح كريم في السواقه بيخليك تحس انك ضعيف
تبقى غلطان
كده انت جامد
وزي الفل


مثال عالكلام ده لما ح يكبس عليك مثلا ويقوم مطلع ايده من الشباك وعاملك سلام ( بيعتذر)
ممكن سيادتك تروح تقول وانا اعمل ايه بأعتذراك ده ( مع حبه شتايم )
لا طبعا تعمل بيه كتير
اولا تراضي نفسك ( الراجل اعترف انه غلطان عايز ايه تاني ))
ثانيا تحمد ربنا انها جت سليمه ( وانك ملبستش فيه مثلا )

ثالثا ودي اللي محدش بيعملها ....
هو انك تتعلم متعملش زيه


ماهو مستحيل تكون مقتنع انك عمرك ما عملت زييه
لو بتقول في بالك ( طب انا عمري ما عملتها ) قوم هات مصحف واحلف عليه



قلنا بنسوق بأخلاقنا يعني مش بنسوق بأخلاق الناس

رابع حاجه قواعد المرور
اغلبنا طبعا مطلع الرخصه بواسطه (( انا بسوق من اولى اعدادي ومع ذلك سقطت في اختبار المرور 3 مرات ....خبره )

اهو اكبر غلطه اننا عارفين اننا واخدين السواقه ممارسه وبنتعلم مع الزمن
وفي الاخر يطلع الزمن بيتعلم علينا وعلى عربياتنا
ومع ذلك كلنا عندنا اقتناع مدهش اننا محترفين

قواعد المرور وأدابه معروفه
مكتوبه في الشارع
وانت عارفها
وفاهمها
وحافظها
مثلا

اولويه العبور للقادم من اليسار
ومع ذلك انت ملكش مزاج يعديك ((عربيتك اكبر مثلا وناوي تكسر اللي يعورك )

النور العالي
ناس كتير بتشتكي

الكلاكس
الكلاكس ده مصيبه سوده
يا جماعه دي للتنبيه
مش للتأديب
خلى الكلاكس اخر حاجه ممكن تستعملها ((الا لو ماشي في زفه )
مش اي بنى ادم لازم توريلو ان الكلاكس بتاعك (ياباني )
طب خد الحكمه دي

صوتك العالي دليل على ضعف موقفك


وركب دي عليها ..
كلاكسك المستفز دليل على انك انسان معندوش دم ((او عنده بس لأسباب بايلوجيه فقط )


يبقى استعمال الكلاكس في اضيق الحدود
فهمنا؟؟


واحد كاتب مشاركه كويسه
ashrafsadany
عضو برونزي


انا الحمد لله فهمتك واعتقد الحل وانا اول واحد هحاول اتدرب عليه علشان انا عندى المشكله الى بتقلها انى هتعامل مع الناس الى فى الشارع انهم كلهم اصحابى وحبيبى هل انا كده فهمتك صح ولا فهمت نفسى ومشكلتى الله اعلم بس خواطر ممتازه احييك عليها

ولا اقولك انا فكرت شويه لاقيت انى مش هقدر علشان افتكرت بتوع المكروبصات والتكاتك ولاد التييييييييييييييييييييت الى معنهمش اخلاق ولادين

سواين الميكروباص دول حاله خاصه في السواقه

لكن زيه زيك في الاخلاق والدين
وان كنت ناوي تعاملهم وحش

استحمل وده يبقى خطأك انت


زميل تاني كاتب

Cars Sniper
عضو فعال

على فكرة انا تقريبا مابشتمش فى السواقة خالص ماعدا فى حالة ان واحد موقف الطريق(غبى يعنى) ويستاهل الشتيمة لانه قاصد كدة اما على الطرق ممكن اللى كسر مايكونش قاصد ولو قاصد بجيبه واروح باصصله بصة من اللى هى وكأنى باقوله"سبحان الله(مع التعجب بالايد كمان)!! ربنا يشفى" ...من غير شتيمة واحدة او حتى كلمة ,باحرجه وباحسسه انه مالوش فيها


طب ولو حد عملك كده؟؟ لو عايز تحرجه احرجه بأدب

تعالى جنبه وقوله بمنتهى الهدوء ...
ينفع كده يعني ؟؟؟ والله حيعتذرلك على طول
لكن تبصله بصه دي معلش يعني كلام فاضي وملهاش معنى ولا اي تأثير عليه


واحلى كلام كاتبه العضو

Eng.Geo
عضو فضي

فهمتك :(
بس كنت مركز لا سطر يقع يضيع الموضوع كله
انت وصلت لحتة عايز يكون الناس كلها زي رابطة ( مثلا تمبرا )
طاب ما المنتدي يعتبر كيان جامع للروابط ده
و لو حد شاف عربية حد عليها الأستيكر شوف بيبقي عامل أزاي
اذا عايزين نكبر منتدي نايل
أو نكبر الفكرة اللي عاملها نايل
انا معاك كدة ولا أيييه ؟

قلنا ده صعب يتحقق الا في حاله واحده بس
حاله الشده

حادث مثلا بتلاقي الناس كلها بقت خايفه على بعض
ومحدش فيهم في باله حاجه غير انه ينقذ الموقف


الناس كلها رجاله على فكره
ورجاله جدعان كمان

لكن لازم تحصل مصيبه عشان الجدعنه تبان
يعني بص على اي حادثه والناس ملمومه وانت تعرف ان لسه في خير



خلاص كده انا خلصت

اللي حيقولي فين الكام نقطه اللي حنكتبهم في ورقه ونبرشمها
حقوله اقرا المشاركات تاني ولو كتبت ورقه يبقى مفهمتنيش
لو معرفتش....
بيع عربيتك واركب تاكسي

واضحه زي الشمس
ومكتوبه
ومتكرره

كل واحد يسوق بأخلاقه مش بأخلاق اللي مضايقه

نكررها تاني

انا بسوق باخلاقي
انا بسوق باخلاقي

انا بسوق باخلاقي

انا بسوق باخلاقي

انا بسوق باخلاقي


انا بسوق باخلاقي

ننفذها
ونسوق بأخلاقنا
تنتهي المشكله

شغل مخك حتفهمني