الحقوني العربيه عايزه عمره

**ZALABANY** · 11-03-2008 04:07 PM

عربيتي ال 28 اللي جايبها من 5 شهور بالظبط بدأت تبخر زيت من قدام الموتور وفوقه بالاضافه لأن سحبها بأه سيء جدا خاصة على المطالع
وديتها للميكانيكي قالى دي ممكن تكون محتاجه شمبر او عمره كامله ومش هايبان الا لما نفتح الموتور المهم وديت الموتور اتفتح امبارح الراجل قالى العربية معمولها شمبر قبل كده وكانت محتاجه عمره واتعملت كده عشان تتلم الخلاصه تحب تلمها وتبيعها ولا نعمل عمره كامله صح بأه قلتله توكل على الله ونعمل العمره عشان انا مش هاقدر امشي من غير عربيه دلوقتى بالإضافة اني مش عايز اصلبها وأبيعها واللي بعدي يلبس في الحيطه زيي الغريبه اني لما كشفت على الموتور وكبست فى البنزينه قالولى الموتور 70 %
لو أي حد عنده نصايح اخد بالي منها في قصة العمره دي ياريت يقولي ولو حد يعرف مكان مضمون اجيب منه الشمايز وقطع الغيار اللازمه للعمره
حاجه تانيه قالى لو سحب العربية وحش يبقى دسك واسطوانه وسمعت عن انه لو الدسك سليم ممكن اللاسطوانه تتملي هل ده صح وممكن يتعمل وتمشي ولا الخص واجيب دسك واسطوانه
معلش وجعت دماغكم

**thegoodhacker** · 11-03-2008 04:38 PM

بالنسبة لموضوع اسطوانة الدبرياج اشتريها جدبدة مع الديسك من نوع نضيف احسن
وممكن تكون هي دي سبب احساسك ان العربية دي مش بتسحب او مش بتطلع المطالع بسهولة
بالنسبة لموضوع الموتور - انت بتلاقي زيت الموتور بينقص بسرعة ؟ يعني كل يوم والتاني بتضطر تزود زيت للموتور نتيجة ان مستوي الزيت ناقص علي المسطرة ؟ لو كده يبقي فعلا الموتور خفيف ولازم يتعمل له طقم شنبر او عمرة كاملة - وفي الحالة دي انصحك انك تروح لميكانيكي شاطر اخر علشان ياكدلك الموتور محتاج ايه بالضبط ..... اما لو الزيت مش بينقص منك يبقي موتورك حالته كويسة

**Xpert** · 11-03-2008 05:06 PM

اسمع الكلام و اتصل بالميكانيكي قوله مش هانعمر .. اسرح شويه عند بتوع قطع الغيار و شوفلك موتور استيراد ... اي حاجه بقي مش هاتفرق ... ريجاتا 1300 او تمبرا 1400 ... او اونو او غيره ...
كان عندنا ريجاتا و لسه طالع من اسبوعين .. و ممكن اشفلك واحد اونو بس مش عارف كام سيسي ...
بس نصيحه .. هات موتور استيراد ...

**wisambasha** · 11-03-2008 05:29 PM

المشاركة الأصلية كتبت بواسطة zalabany2007

وسمعت عن انه لو الدسك سليم ممكن اللاسطوانه تتملي هل ده صح وممكن يتعمل وتمشي ولا الخص واجيب دسك واسطوانه
معلش وجعت دماغكم

نصيحة بلاش الشغل التجاري بتاع ملي الاسطوانة او الكبالن و حركات التاكسيات دي وخليك في الشغل النضيف. هات اسطوانه و ديسك و بلية نوع نضيف وظبت عربيتك.

:D

**Ahmed Anwer** · 11-03-2008 07:01 PM

مع اكسبرت ،،،

هات موتور استعمال كامل أفضل ،،

و في الآخر ممكن يكون اوفر أو ازيد بسيط

عن تجربة مع كذا عمرة

**hazem_khidr** · 11-03-2008 07:58 PM

هات موتور و ريح دماغك لاني حاسس ان الميكانيكي دا عاوز قرشين و خلاص
اولا المكنه جايبه زيت ما يمكن يكون اويل سيه بايظ مثلا .
سحب ضعيف برضه ممكن يكون اسطوانه بايظه.
حتت بقي ان العربيه معمول لها شنبر قبل كده دا اشتغلات لانها ببساطه حتي لو موديل عالي اكيد حتحتاج شنبر او عمره في الفتره دي احنا بنتكلم علي عربيات اخرها تسعينات مش عربيه موديل 2004 .
حتعمل عمره مثلا اوك بس ماعدش قطع غيار اصلي ايطالي ماعدش طقم البساتم الماهيللي و لا قطع الغيار الماريللي الاصلي بتاع الفيات ايام زمان .كله تايلاندي و تركي .

**SEATLOVER** · 11-03-2008 08:24 PM

ماتخدش كلام ميكانيكى واحد بس فى موضوع العمرة بالذات ..و لو رحت للآتنين تانيين و قاللولك عايزة عمرة ..كبر و بيع بناقص سعر العمرة ..وشوفلك عربية تانية فى نفس الاسبوع ..اسهل و اريح ليك

او لو مصمم تكمل ..هات موتور استيراد وريح دماغك .