لما قلت اخطر مشكلة فى السيراتو ....كان عندى حق
لله الامر من قبل ومن بعد
فى كتير من اعضاء القسم هنا عارفين المشكلة اللى كانت عندى فى العربية ومتابعين معايا التطوارت اول بأول وللاسف الشديد العيب رجع تانى بعد مرور شهر واسبوع بالتمام .
http://www.nilemotors.net/Nile/152992-a.html
http://www.nilemotors.net/Nile/155609-a.html
انا مصدوم ومذهول فعلا مش عارف اتهنى بالعربية لحد دلوقتى ويا سبحان الله فى نفس اليوم اللى رجعت فيه المشكلة معرفش ليه كنت حاسس ان فى حاجه هتحصل فى العربية وفعلا واقف فى اشارة لقيت الرجه اللى حفظتها واللى بترعب منها بجيب الغيار على التيبترونك لقيته على الغيار التالت .
المشكلة اكتشفتها وهى عاملة حوالى 2000ك ودلوقتى هى عاملة 7200ك
لا اله الا انت سبحانك انى كنت من الظالمين
اخر مرة كنت متابع مع مركز ابناء صبحى سند ودفعت عنده لحد الان 4000ج وعلى كلامه وانا بستلمها اخر مرة انه ميعرفش المشكلة اتحلت ازاى او باللفظ ( تقدر تقول معجزة )
اللى عمله من البداية كان شغل فى دفيراه الكهربا وبعد كده حساس وبعد كده تصليح الكنترول يونت وبعد كده تغير فلف بادى مع تغير زيت فتيس بالظبط زى ما الكتاب بيقول .
وطبعا كل ده تم فى خلال شهر بعد كل حاجه تتعمل اخد العربية اجربها بعدها بيوم او اتنين يرجع نفس العيب روحت الى هناك حوالى 6 مرات واخر مرة العربية كانت هناك لمدة اسبوع .
فى ناس هتقول وايه اللى خلاك تكمل معه ...؟
لانى مع كل مرة اخد العربية ادفع فلوس لحد ما المبلغ وصل الى 4000ج .
طبعا فى بعض الناس وزى العادة هتاخد مشكلتى دليل على انه عيب فى العربية ولكن فى كل مرة اقول انه عيب فردى لانه محصلش عند كل الناس وتانى حاجه بعد لف على حوالى 5 مراكز ان العيب ده اول مرة يحصل بالمنظر ده ولكن الكل اجمع انه عيب صناعه .....وجه معايا انا والحمد والشكر لله محدش يعرف الخير فين .
احنا داخلين على العيد وكل سنة وانتم طيبين وطبعا هروح للمركز تانى بكرة او بعده بالكتير ويارب تخلص على قبل العيد مع انى اشك فى كده .
اسف اذا كنت ازعجت حد بموضوعى ده ولكن لنفس المبدا من البداية حتى تعم الفائده على الجميع لو حصلت عند حد تانى ويارب ما تحصل .
اتمنى دعائكم فى ليلة القدر .
فكرتني بايام صعبه والله ربنا يعينك.....
انا مش عارف اقولك ايه بس و الله انى بجد اتصدمت و حزنت لما رجعلك الموضوع تاني .....
متزعلش هحكيلك مغامرتي بنفس مشكلتك بس مع الشيروكي علشان تعرف انك مش لوحدك
انا كان عندي في الشيروكي نفس المشكله واكتر منك - انا كانت العربيه مبتطلعش اولاني - عارف يعني ايه تبقى واقف في اشاره والعربيه تطلع على سرعة 20 كم مهما ادوس بنزين مفيش اكتر من 20 وبعد شويه الاقيها فتحت وجريت .... بس اول ما اقف في اشاره ابتدي استعد لشتيمت الناس اللي ورايا
عايز اقولك رحت للتوكيل قالي كنترول يونت مش هاقولك الرقم علشان انا رجعت من الخضه و البنطلون اتبل وحجات من ده كتير .
انا لفيت على كل من له علاقه بالشيروكي ( الهيئة العربيه - ابو غالي - عز العرب - اولاد سند - محمد عبد الوهاب - ابو سيفين - مكرم - الخ الخ الخ ) وكله يقولي انه الكنترول يونت بايظ لازم يتغير وجربت كنترول ومنفعش - غيرولي حجات كتير و برده مفيش فايده
مخلتش و الله يا ابو ليلى لغايه مكنت ابص للعربيه ولاقي دمعتي على خدي - انا من النوع اللي بيرتبط بالعربيه لدره اني بعامله معاملة ابني .
وكل ما اروح لحد ويبتدي يفك فيها ويفك الفتيس ويفتح بطن العربيه و الله كنت بحس انهم بيعملوا عمليه لابني و كنت بتقطع من جوايه.
وسمعت اراء ناس كتير ( يا عم بيعها دي عربيه نحس وانته خت خيرها ارميها او لبسها لحد - وشويه الاقي تجار مستعمل يتصلوا بيه ويقولولي هناخذ العربيه منك ونقطعها ونبيعها حتت انا كنت بشتمهم كانهم عايزين يمصمصوا عربيتي وانا عايش ) برده كانت حاجه جوايه بتقولي اصبر لعل الله يجعل لكل مخرجا ... و الحمد لله على كل حال .
وفي يوم واحد صاحبي شغال في توكيل جاجور قلي ان في مهندس معاهم فاتح ورشه في حدائق القبه وانه ممتاز - قلت هو جت على ده رحت ولاقتها ورشه عاديه جدا وهو شاب عادي محستش اي نوع من انواع العبقريه بس كنت مسلمها لله وزي ما قلتلك مجتش عليه - قالي سبهالي وعدي عليه كمان 4 ايام وحصل .
انا حاولت اشغل نفسي بالشغل و بعد معدت الاربع ايام قولت يا يتصل و يقول عربيتك ملهاش حل او ميتصلش علشان هو مش لاقي حل وعدى يومين كمان بقو 6 وبرده متصلش قولت اتصل انا بيه واروح اخد عربيتي كفايه عليه 6 ايام بيدور على حل - كان يقولي انه مش لاقي بدل مسيبني 6 ايام - وفعلن اتصلت -ايه يا هندسه كل ده بتدور على حل - لقيته بيرد في هدوء قاتل - العربيه خلصت - قولتله خلصت ازاي - قالي اتصلحت - قولتله ايه مسمعتكش - قالي خلصت من اربع ايام زي ماقلتلك - قلتله والله العظيم احلف - قالي وهو بيضحك و الله اتصلحت العيب كان في السينسيرز بتاعت الفتيس هما 3 لقيت 2 بيزين تعاله علشان تاخد عربيتك - قلتله حمامه
و الله وانا رايحله حاسس اني رايح اشوف ابني بعد ما عمل عمله وطلع منها وخف و ربنا شفاه .
مش هتصدق اول مرحت اركب العربيه كانت ايدي بتترعش وانا بدور العربيه واول ما دوست البنزين والعربيه طلعت حسيت ان 4100 سي سي اتنفضوا و ال6 سلندر زأرو زي اسد حر كان محبوس في قفص بقاله سنسن العربيه جريت وانا جريت معاها -اقولها اديني اكتر وريني عايز اسمع موسيقة ال 6 سلندر وهي تقولي انا تحت امرك اديني الاذن وريح رجلك على البنزين شويه وانا هعملك كل ما يخطرلك على بالك وفعلا كلامها صادق لفيت بيها يومها مصر كلها من مصر الجديده ل 6 اكتوبر ومن شبرا لحلوان ونا ماشي بقول الحمد لله الحمد لله من فرحتي بجد انا بكيت وسجدت شكر لله و حسيت ان ربنا شفالي ابني والحمد لله....... الحمد لله
متزعلش يا ابو ليلى كله بيهون ومتقطعش دعاك لله و املك في الله و خد بالاسباب ودور على الحل .......
فكرتني بايام صعبه والله ربنا يعينك.....