مواتير ال bm ؟؟؟؟؟؟

**link7200** · 11-03-2008 11:32 PM

ارجو الافاده
عايز اعرف القدره الحصنه فى المواتير 316 و 318 و320 و323 و325 وهل فى اختلاف فى الحصنه بختلاف موديلاتها من اول 1984 الى 1998 ؟؟؟
و هل لو سقط موتور ال 520 حيكون حصنته اعلى من 320 مع انهم الاثنين 2000 سى سى ؟؟؟؟
انا سمعت ان فى مواتير نيكل للبى ام ممكن اى معلومات عنها و خصوصا عزمها و عدد الاحصنه و السعر و استهلاك الوقود ؟؟؟؟
نأسف للاطاله ..

**bimmeraddict** · 12-03-2008 12:07 AM

أنت عندك بي ام عاوز تسقطلها ولا ناوي تشتري ولا اية؟
عموما كينج البي ام هنا xpert اسمع كلامة بالملي

**link7200** · 12-03-2008 12:17 AM

فى عربيه قدامى 84 فبريكه من جوا و رشه من بره
حالت الموتور زيروو و العفشه مدمره ممكن اخدها بسعر حلو و ازبطها على مزاجى

**Xpert** · 12-03-2008 01:15 AM

عموا المليجي جه يا رجاله ... كله يوسع ... وسع طريق .. بيييب بييب .. مش باقولك وسع يا كابتن ! ...
ايوا يا بوب ... اسال .. استشير ....
انت كده سؤالك عاام قوي قوي قوي قوي قوي للصبح لأن شوف بي ام صنعت كام موتور و كام مش عارف ايه ...
المهم لونج ستوري شورت .. بافتراض ان العربيه 316 او 318 4 سلندر ..
العربيه دي خرافه .. اديهاني علشان بادور علي واحده .. و ابقي خد فلوسها حين ميسره علشان العبد لله مفلس .. المهم ...
انت عاوز تسقط موتور .. نو بروبم ... المواتير موجوده و بيجيلنا دفعه مواتير حلوه .. الاول شرح و بعد كده نشوف ايه النظام .. و نعرفك علي البرنس اللي بنتعامل معاه لو احتجت حاجه هم ينظموك ...
الشرح الاول :
4 سلندر من الستينات لحد 1987
الموتور ال 4 سلندر اللي راكل فيها دلوقتي عملي جداً جداً جداً ... و هوه زيه زي موتور البيجو 504 .. تدعك فيه .. مايقولش لاء ..... ده اتصنع من الستينات لحد 1987
6سلندر برضه من الستينات بس احنا ناخد الاحدث (بينزل علي الفئه الخامسه و الفئه السابعه)
- اخوه الكبير علي طول ... نفس النظام و شرحه حته حديده كده ... بينزل منه 3 موديلات : 2800 سيسي 184 حصان ( من 1977 لحد 1987) .. 3000سيسي 190 حصان تقريباُ مش فاكر (من 1987 لحد 1992) .. 3500سيسي (ده بقي يا برنس الليالي اللي انت عاوزه ) .. و ال 3500 ده فيه منه موديلات كتيره :
3200 سيسي 211 حصان ( من 1977 لحد 1983) .. 3200 سيسي تيربو 252 حصان صعب تلاقيه (من 1977 لحد 1983) .. 3400سيسي 218 حصان (ده انا باركبه عندي حالياُ بس عربيتي الفئه السابعه القديمه .. نزل من 1984 لحد 1988) ونزل معاه 3400 سيسي 185 حصان لو كومبريشن ...و الموتور التيربو بتاعه 3400 سيسي 252 حصان برضه (1984 لحد 1986) و نزل بعد كده ال 3400 211 حصان من 1988 لحد 1993 .. تفرق بينهم ازاي : احنا نعرفه .. الصنايعيه ماتعرفش حاجه اصلاً في البطيخ ...
ال 6 سلندر الصغير : بينزل علي الفئه التالته و الفئه السابعه من 1979 لحد 1990
البي ام 320 و323 و 325 ... و ده ببساطه نازل في البودي بتاعك اوريجينال و اسمه ال 20 الابيض و ال 23 الابيض و ال25 الابيض ... ال20 الابيض حوالي 140 حصان و ال 25 الابيض 170 حصان ...
لو جبته تجيب ال 25 الابيض فيه ...
ال20 2000سيسي
-4 سلندر احدث شويه من 1987 لحد 1994 ...
المكنه دي باختصار .. اسمها ام فورتي .. لو قيتها في الحوض .. شيلها و ارميها في الزباله ...اللي يقولك ب 3000 جنيه قوله خد انت 3000 جنيه و حل عني .....
-4 سلندر 1800 16 صباب .. مكنه تمام و اسمها 318is
و دي 134 حصان .بس شحيحه شويه في السوق ...
-6 سلندر حديث : و ده نازل كله 24 صباب ....
الموتور الاسود في البي ام ... و ده اللي عنال يتطور مع الزمن ( الباقيين بيتطوروا برضه .. بس كله يتركب .. انما ده لو جبت حاجه غلط فيه ,.. كل عام و انتم بخير ...
ايه النظام فيه .. ده بقي فيه موتورين المعروفين فيه ... 20 اسود و 25 اسود ... و كله طبعاُ 24 صباب ... ال 20 منه 170 حصان .. و ال 25 منه 190 حصان .... الموديلات اللي تدور عليها : اي حاجه مايكونش البلوك بتاعها الومونيوم ..... الموديلات بتبقي : الفئه التالته و الفئه الخامسه من 1990 لحد 1994 .. بعد 1994 ماتجبوش ... هاتلاقي بلوكه زهر برضه لحد 1995 انما الكلاكيع الكهرباء علي المكنه كتيره ... و ده هاتحتاجه من فئه خامسه علشان الكارتيره ... علشان الكارتيه بتاعه الفئه الثالثه مختلفه .. انما مش مشكله ... هوه بيقفرق بس فس الكارتيره و طلمه الزيت .. و دول اخر ما تغلب هانجيب غيرهم و نركبهم و شكراُ ...
دي اسهل التسقيطات ....
معروفين بالاسم : 318 اي اس - 320/325 اسود - 320/325 ابيض - 335 ابيض .....
كده غطينا اللي في نطاق كيزانيتك البسيطه ... لو عاوز تفجر ... معاك برضه ... ندخل علي الام 3 و الام 5 و الفي 8 و الفي 12 و كله بيركب .....
بالنسبه للفرامل : كل التسقيطات التي تم ذكرها يكفيها فرامل ال 325 العاديه ( اللي هيا بتاعه البودي بتاعك و معلومه جانبيه ال 320 و ال 325 في الفرامل واحد)
بالنيبه للمواتير هل لو جبته من علي فئه خامسه او فئه ثالثه فيه فرق : لاء مافيش فرق .. الفرق بيبقي في الكرونه بس ان وجد ...
مواتير نيكل ؟ قصدك ايه ؟ فيه مواتير ابيض و اسود .. و فيه موتور البلوك الومونيوم بس مافيش نيكل ...
ندخل بقي للبيزنيس ... تاجر حبيبنا قوي قوي قوي بيجيب دفعات مواتير و شغال اساساً في الي ثرتي و الام فورتي و الدبانه .. جايب مواتير 320 اسود 6 سلندر 170 حصان العربيات كامله .. هوه التاجر عمل سعر خاص جداُ جداً ليا ... شوف لو عاوز اي كان هوك يو اب ... (علي فكره .. المواتير نمره واحد ... و ان لم تثق فيا .. مافيش مشكله اعتبرني ماقلتش ...)
بكده احنا لمينا كل اللي ينفع يتعمل ...
حدد انت عاوز العربيه ايه .. و شوف الانسب ليك .. و بكره هارد عليك تاني ..
تصبحوا علي خير جميعاً ...

12-03-2008 01:33 AM

برنس البرانيس:D

**HISHAM80** · 12-03-2008 01:09 PM

ايه ياعم الحلاوة دى تسلم ايدك يا باشا

**link7200** · 12-03-2008 03:35 PM

معلومات دقيقه و غاااااااااااااااااااااايه فى الجمااااااااااااال
متشكرين جدا جدا جدا من هنا لبعد بكره
بس انت نسيت حوار استهلاك البنزين !! لو المكنه ال 170 حصان ام 2000 سىسى ؟؟؟ وهى كاربرتير ولا انجكشن ؟؟
وموضوع 6 سلندر دا قلقنى فى البنزين قوى علشان انا بسافر دائما مسافات طويله مثلا مطروح او الغردقه ....الخ وكنت عايز اسأل على تربو مناسب ليها بس بيديها اكتر من 40% من قوة الموتور ( والى أعرفه ان التربو بيقضى على المكنه بدرى بدرى) هل حيدمر المكنه فى قد ايه تقريبا او عدد كيلوات
و هل ينفع اعمله بديل للعمره ( السائل الى بيتباع يتحط مع الزيت ) مع العلم بتزكرتكم بكثرة السفر؟؟؟؟؟؟
شكرا ...

**link7200** · 12-03-2008 03:45 PM

تسيت اقلك على مسألة الثقه انا واثق فيك بس مش واثق بالنسبه للاسعار ؟؟؟؟؟؟ ممكن تدينى خلفيه وعن الموديل بتاع المكنه؟؟؟؟ و انت بتقول بيجيب العربيه كامله ياريت نبزه عن الكيلو مترات الى مشيتها؟؟

**Xpert** · 12-03-2008 04:00 PM

الكلام ده بقي انا مقدرش افيدك فيه ... ببساطه لأن انا من النوع اللي خامس و اخر الاكسراتير ... عداد البنزين ده مالوش وجود عندي .. المهم يقولي العربيه فيها بنزين ولا لاء ... و ده بالنسبه لاي عربيه باركبها ....مبدققش في استهلاك البنزين ... ده حتي النيفا بتاعه المعلم ركبتلها بيكات كبيره و فتيس سريع و بتاعه جري :d
المكنه اللي موجوده حالياً 200 سيسي 24 صباب 170 حصان تفريباً موديل 1991 بالنسبه للحاله زيرو و انا لعلمك مابنمرش غير علي المكن الزيرو ...بالنسبه للسعر و الموديل و التركيب ده ماتشغلش دماغك ..مواتير البي ام السابق ذكرها كلها انجكشن ...و اللي موجوده دي انجكشن بس نازله من علي 320 فهاتحتاج كارتيره و كلمبه زيت بس ماتشغلش دماغك ... و تقريباً فيه واحده نازله من علي 520 برضه ... (هيا نزلت بس مش عارف اتباعت ولا لسه)..بالنسبه لاستهلاك بنزينها مش عارف بس في المعقول قوي (انت بتتكلم عن بي ام و تكنولوجيا حديثه و بتاع ... لاحظ ان انا اللي عندي المكنه القديمه كمان و هاي كومبريشن 10:1 و مابفولش غير اقل حاجه 92 .... بس انا حاله خاصه لان انا معدل في الموتور ... ال 320 تحطله 90 طبعاً او 92 برضه)
بالنسبه للتيربو مانصحكش .. و لو عاوز تيربو يبقي تفك المكنه تخرط البساتم و تركب تربو و تغير نظام الانجكشن تركب ستاند الون و حوارات .... لو عاوز مكنه تلعب فيها اللعب ده موجوده بس هاتبقي 318 اي اس 1800 سيسي 16 صباب و المكنه دي نازله اصلاً فيها فورجد اينترنالز ...ده غير ان المكنه الموجوده كانت ضاربه جوان وش السلندر تقريباً ... كنا جايبين العربيه كامله لواحد كان عاوز الصالون و العفشه ...