الموضوع: تركب أوبل فيكترا 2007 ولا جولف 5 نفس الموديل أو أأقل سنة وليه ؟؟؟

انا مش بأجادل حد والهدف خدمه لكل الى هيحتاج الموضوع دا بعد كده وخدمة فى الاول صاحب الموضوع
العربيه مش بالف ولا الفين
انا بأنصح لوجه الله
الراجل صاحب الموضوع هنا فى مصر بشوارعها وميكانيكيتها
مش فى المانيا او اوربا
وبيسأل عن ظروف العربيه دى فى مصر

وانا بصدق شكرت الأخ SrOrR4EvER لأمانته ونصحه وقدمت له الشكر فى http://www.nilemotors.net/Nile/173116-93.html

لأنى كنت بأفكر فى أوبل فيكترا وعلى وشك شرائها
والأخ SrOrR4EvER نصح بأمانه ودا خلانى غيرت رائى عن الفيكترا فى الموضوع http://www.nilemotors.net/Nile/171784-a.html

المشاركة الأصلية كتبت بواسطة SrOrR4EvER

لو عاوز تكييف قوى فعلا فى الصيف ومتبصش على عداد حرارة ومتشتريش قطع غيار كتير ووقت ماتحب تبيع تعرف تبيع بسعر كويس بدون خسائر وعربيات ناعمة ومالهاش مشاكل تقريبا....يبقى ابعد عن الاوبل كلها على بعضها لأنى كل اللى فات دة عيوبها....وخليك فى الكورى...ولو عاوز فى اليابانى يبقى عليك وعلى الهوندا سيفك او النيسان صنى....

المشاركة الأصلية كتبت بواسطة SrOrR4EvER

صباح الفل ياباشا ومعلش على التأخير...
هرد على كلامك بعد اذنك..
طيب وطالما انا قدامى اركب عربية ممكن تتصلح بسهولة عند اى حد...ليه اسيبها واروح لعربية عاوزة كتالوج عشان تتصلح؟؟؟ليه اسيبها واروح لعربية عشان اصلحها لازم ادوخ السبع دوخات عشان الاقى الشخص المناسب...ودليل كلامى هنا المنتدى كل شوية مواضيع عن كهربائى كويس وعن طلب ميكانيكى كويس او مركز صيانة كويس او او او....ده معناه ان العربية دى معقدة....طب وانا بالنسبة لى كراجل زى معظم المصريين بشتغل وكل وقتى محسوب...ليه اقرف نفسى بعربية تخلينى اضربلها مشوار مخصوص فى اخر الدنيا عشان اصلحها؟؟؟فى حين ان قدامى عربية تانى لو واحد تحت بيتنا هيصلحها زى الكورى واليابانى مثلا؟؟؟؟؟؟؟؟؟
بص ياباشا هنا فى المنتدى على قسم الاوبل هتلاقيه كله مشاكل وده بيشتكى من كذا وده من كذا وده من كذا....
اما بقى روح لقسم اى عربية من الكورى وليكن على سبيل المثال الهيونداى لأنى روحت القسم وشوفت بنفسى وشوف الناس بتتكلم عن ايه....
هتلاقيهم بيتكلموا عن طقم فوجات وزينون واسبويلر وكماليات وحاجات غريبة....مفيش فيهم حد اتكلم مثلا عن موتور قفش....او عن موتور سخن زى مامعظمنا كركاب اوبل بنتكلم.....كلنا هنا بنتكلم عن مشاكل فيزياء وهما هناك بيتكلموا ازاى يدلعوا العربية....مااعتقدش مثلا ان حضرتك قابلت واحد صاحب عربية كورى وقالك انها بتسخن...فى حين ان 90% من ركاب الاوبل بيشتكوا من مشاكل مالهاش اول من اخر ....
اما بالنسبة لجزئية برة بيركبوا الاوبل فتعقيب بسيط جدا انهم فعلا كل الدول دى بيركبوا الاوبل ماعدا المانيا نفسها بيكرهوا العربية دى جدا هنا وانا ليا زوج خالتى شغال هناك من 20 سنة تقريبا كل مرة ينزل فيها يقولى ويأكد عليا ان العربية دى محدش فى المانيا بيحبها بسبب مشاكلها الكتير وكتر احتياجها للصيانة.....ويفضل يزن على دماغى انى ابيع وانا اكبر دماغى....بس فعلا لما عاشرت عربيات تانية بدون مشاكل عرفت الفرق.....
كمان برة ياباشا العقلية والامكانيات وطبيعة الطرق اريح بحيث ان اللى يحب يركب عربية زى دى هناك هيلاقى 1000 مركز صيانة يصلحها والطرق نفسها هناك جميلة وممتعة وتحسسك بقيمة العربية غير عندنا...
بكرر تانى ان الاوبل عربية ممتازة لكن محتاجة عناية خاصة وطرق خاصة والكلام ده مش عملى مع اغلبنا كمصرين...
تحياتى لك

المشاركة الأصلية كتبت بواسطة SrOrR4EvER

ياباشا عاوز اقول لحضرتك حاجة....اولا مينفعش تقارن مصر بألمانيا نهائى..لأن المانيا بلد الاوبل اساسا يعنى اكتر ناس يفهموا فيها ومع ذلك بكرر ان معظم الناس هناك العاديين مش مؤسسات حكومية مش بتفضل العربية دى....لأن مشاكلها كتير....ودى حقيقة محدش يختلف عليها....نيجى بقى بالنسبة لهنا فى مصر والكلام بتاع حضرتك فهرد عليك بحاجة بسيطة جدا انت نسيت ترد عليا فيها لما قولتها....قولتلك اشمعنى الاوبل بالذات اللى كلها مشاكل عند اغلب اللى راكبينها مع ان فيه عربيات تانى كتير فى نفس سنين انتاج الاوبل كورى ويابانى محدش اشتكى منهم بالطريقة دى؟؟؟؟؟؟ هتقولى عشان محتاجة عناية خاصة...هرد عليك واقولك طب وانا ايه يجبرنى انى اجيب عربية تحتاج كتالوج عشان تتصلح فى حين قدامى عربية تانى ميكانيكى تحت السلم زى ماحضرتك بتقول يقدر يصلحهالى؟؟؟؟؟ يعنى باختصار وجهة نظرى ان قدامى عربية بسيطة ومش معقدة وكماليات كتير ومش بتطلب صيانة كتير ومش كل شوية تصليح ليه اسيبها واسيب كل ده واروح لعربية عاوزة دكتور عشان يصلحها؟؟؟؟؟ ياباشا معلش مع كامل الاحترام لمة لمبة فى التابلوه بتبوظ بتنور بتروح مركز صيانة متخصص عشان تعرف العيب فين وياعرفته يامعرفتوش.....لما العربية بتسخن بتبتدى تحط خطة حرب عشان تعرف سبب السخونة ايه وتبتدى تدور وتمشى ورا كل حاجة وتفكر وتخطط عشان تعرف ايه السبب اللى خلى العربية تسخن..ياترى رادياتير ولا مراوح ولامراواح سرعتها مش مظبوطة ولا شكمان ولا وش سلندر ولا ايه ولا ايه ولا ايه؟؟؟..فى حين ان باقى العربيات مفيهاش المشاكل دى كلها والتعقيد ده كله......كل حاجة بتكون معروفة وسهلة....
حضرتك برده بتقول ان اغلب المشاكل دى بتكون فردية...طلب ليه اكتر عدد مشاكل فردية فى مصر موجود ف العربية الاوبل ومش موجود فى غيرها؟؟؟؟؟؟؟ بص حضرتك فى القسم هنا على كم المشاكل وبص فى باقى اقسام الكورى واليابانى على عدد المشاكل ونوعها وقارن وانت تعرف بنفسك.....
انزل السوق وقول ان معاك اوبل وعاوز تبيعها وابقى قابلنى لو بعتها بسهولة.وهتخسر كمان فى السعر...وانزل وانت معاك كورى او يابانى وقول هبيع ومش هترجع من غيرها وانت كسبان...
ياباشا انا بكلمك بشكل عملى على الواقع اللى احنا فيه مش مجرد بندافع عن حاجة وخلاص ومتنساش ان راكب العربية دى وعارفها مش لسة بفكر اشتريها...الاوبل عربية ممتازة جدا لكن مش لمصر ولا تنفع لظروف مصر...

المشاركة الأصلية كتبت بواسطة SrOrR4EvER

حاجة كمان نسيت اقولها....ان حضرتك متنساش ان الاوبل اللى بتنزل مصر هنا حاجة تانى خالص غير الى بتنزل برة...
دى مواصفات ودى مواصفات تانى خالص وطبعا انت عارف اننا هنا بتنزلنا ارداء واسوأ مواصفات فى العالم مع البرازيل....
سواء مواتير او دايرة تكييف متركبة بطريقة سيئة او تقفيل سىء...
وكمان وكيل حرامى فى الاسعار وقطع الغيار وتصليح زفت فى التوكيل...
كل دى عوامل بتخلى العربية هنا فى مصر مكروهة جدا ودى حقيقة اسأل عنها اى مواطن عادى راكب اى عربية عادية...
ويارب متكونش زعلان منى وانا مبسوط جدا بالكلام معاك

المشاركة الأصلية كتبت بواسطة SrOrR4EvER

لالا يازيزو باشا مين قال ان اللى بينزل هنا زى اللى بينزل برة؟؟
بص على العربيات المتقطعة هنا اللى نازلة من برة او بص على عربيات المعوقين وارد الخارج وشوف الفرق وقارن مابين هنا وهناك...هتلاقى الفرق كبير جدا...
هتلاقى ان هنا فى مصر بينزل موتور من اضعف المواتير على الاطلاق فى فئته مقارنة بوزن العربية اللى هو 1600 الموتور الاسود...
هتلاقى العربيات هنا بتنزل بادنى مواصفات الامان حتى الارباج مش موجود فيها...
هتلاقى نظام الكهرباء مختلف كتير عن اللى برة...
هتلاقى المشاكل هنا فيها كتير عشان التقفيل سىء وطبعا قصة الرقابة دى حضرتك عارف بقى شغل السبوبة والمصالح اللى على كبير اللى بتحصل عشان تعدى الحاجات دى....
ياباشا صدقنى ونصيحة عن تجربة جامدة جدا...
لاتثق فى 90% من المنتجات التقفيل المصرى...خصوصا الحاجات المعقدة منها زى العربيات الالمانى....

المشاركة الأصلية كتبت بواسطة khaled ayman

حضرتك تاعب نفسك ليه ؟
عمال تجيب فى لينكات لمواضيع ليا ؟
وتجيب لينكات لمشاركات للاستاذ سرور
عاوز تثبت ايه؟
عاوز تثبت ان اوبل وحشه
حااااااضر
اوبل شركه وحشه "كخه" اوعو يا جماعه حد يجيب اوبل لحسن دى شركه "كخه"

يا باشا كل سنه وأنت طيب
عيد فطر مبارك