كيفية إستلام جين 2 او بيرسونا - بالصور-

**midosalah** · 07-09-2010 02:14 PM

بسم الله الرحمن الرحيم
السلام عليكم ورحمة الله وبركاته
احلى تحية على كل البروتوناوية الجامدين
والى نفسهم يجيبوا بروتون وانا واحد منهم
ان شاء الله هنقسم الموضوع على ثلاث مراحل علشان اللى هيستلم يركز ويشيك على كل حاجه

هنبتدى ان شاء الله

المرحلة الاولى
نستلم المفاتيح بتاعة العربية هما بيكونو مفتاحين

بعد كده ناخد جولة حولين العربية

مهمة جدا الجولة دى لان انت هتشيك على دهان العربية
هتبص على كل قطعة من جسم السيارة على حدى
يعنى كل باب لوحده كل رفرف لوحده الكبوت كده يعنى

تبص على الدهان وعلى الصاج كويس جدا
تشوف الفورارق بين القطع وبعضها فى حاجع عالية عن حاجه
فى حاجه مفارقه عن حاجه فى اختلاف بين حاجه فى اليمين عن حاجه فى الشمال

جرب المرايات اليمين والشمال افتحها واقفلها فيها اى مشاكل كله تمام

بعد كده تبص على الازاز كله فى خدوش او حاجه

بعد كده الفوانيس (امامية خلفية شبورة غمازات) فى حاجه مجروحة او فيها شق صغير كده يعنى
كله تمام

الجنوط والكاوتش بصه سريعه كده على الاربع فرد

نيجى بقى للجزء اللى بعد كده
هتجرب تفتح وتقفل العربية من الريموت الإربع بيبان شغالين و كله تمام

طيب افتح بقى بالمفتاح اشتغل كده 100 100

هتدخل على التارة وتدخل المفتاح - الفتيس فى المور- بسم الله الرحمن الرحيم –
ندور العربية دارت كله تمام

خلاص كده؟؟؟؟ ........ لا كده المرحلة الاولى خلصت والحمد لله

المرحلة الثانية
معلش المرحلة دى طولة شوية ومهمة جدا جدا جدا

ننزل من العربية
طبعا العربية دايرة لسه.......
مش مشكله احنا بنجرب كل حاجه

نيجى لأى باب من الابواب الخلفية
نفتحه اتفتح تمام ......الاكره سليمة طيب اقفل الباب اتقفل تمام 100 100
طيب افتحه تانى ......... ايه هى شغلانه يا سيدى بس افتحه.....
كده انت اتأكد انه بيقفل ويفتح تمام والاكرة سليمة

ادخل اقعد جوا جنب الباب واقفل الباب معلش انا هتبعكو معايا بس استحملوا

ها هنعمل ايه تانى......
نجرب الازاز بيطلع وبينزل ناعم من غير خشونه او صوت غريب.....
طيب الحمد لله اقفل الازاز جرب المسوجر بيفتح ويقفل معاك يدوى تمام............اوك

طبعا احنا سيبين الباب مقفول لما دخلنا ليييييييه......
علشان نفتحه ونجرب الاكرة اللى جوا شغاله تمام

اقفل الباب وروح اعمل مع الباب التانى زيه بالضبط مع اختلاف بسيط قبل ما تنزل افتح الباب بتاع حامل الاكواب الخلفية.....شوفه كده على السريع
جرب الكنبة بتتفتح على الشنطه القفل بتاعها شغال............كويس اقفل بقى واطلع ادام

الباب بتاع الراكب الامامى
طبعا احنا عارفين افتح اقفل افتح ادخل
جرب الازاز............... المسوجر

الكرسى بيطلع ادام وبيرجع لورا وظهر الكرسى كمان شغال ادام ..... ورا ..... اوك يا باشا

الشماسة ودرج التابلو على السريع كده تمام

افتح الباب من الاكره اللى جوا شغاله.......اوك..... اقفل الباب
واتعالى بقى للتقيل يا معلم

باب السواق نقول تانى افتح اقفل افتح ادخل

لما ندخل بقى هنعمل حاجات كتير اوى
الكرسى – شوف الكرسى بيرجع ورا بيجى ادام بيطلع فوق وبينزل تحت الظهر بيرجع ورا ويطلع ادام
كله تمام طيب اظبط بقى الكرسى بالمرة على الوضع المناسب ليك هتسألونى ليه ان ابتديت بالكرسى هقولكو دلوقتى ....

نيجى بقى للازاز تجرب ازاز الاربع بيبان من عندك بيطلع كله بينزل كله اوك......

جرب التحكم الكهربائى فى المرايات
المراية اليمين - يمين شمال فوق تحت – كله شغال طيب اظبطها كمان بالمرة
اعمل مع المرايا الشمال زى ما عملت مع المراية اليمين واظبطها كمان بالمره

عرفتوا بقى انا ابتديت بالكرسى ليه علشان لما اجى اظبط المرايات يبقى الكرسى مظبوط

خدو بالكوا العربية لسه دايره

نيجى بقى للطارة نجرب نطلعا ونننزلها من الدراع اللى بيظبطها وبعدين اظبطها على الوضع اللى يناسبنى

أجرب الكلاكس شغال طيب

**midosalah** · 07-09-2010 02:14 PM

المساحات - اجربها شغالة على كل السرعات
رشاشات الميه شغاله اوك المساحة الخلفية كله تمام ماشى

الأنوار – نجرب النور الصغير هينور معاه نور التابلو الاحمر الجميل
النور الواطى والعالى
الاشارات طبعا خلى حد يشوفهم معاك من بره دوس فرامل شوف النور بتاعه هات المرشدير شوف النور الابيض

حول تشوف الكنترول بتاع مواتير الفوانيس شغال بيطلع الفوانيس وينزلهم
ومفتاح ظبط إضاءة التابلوه

نيجى يمين شوية
طبعا تجيب معاك اسطوانه ام بى ثرى
تجرب الكاسيت الاربع سمعات شغالين
الراديو شغال

نيجى بقى لحاجه مقولنهاش هيا ايه ؟؟؟؟؟؟؟؟
المالتى فانكشن تجرب الزراير كلها .......الحمد لله كلها شغاله

الانتظار والفوجات

افتح التكيف
شييك على سرعات المروحه شغل زرار اغلاق دورة الهواء
جرب التكيف من جميع الفتحات
التكيبف شغال دقيقة.......... دقيقتين ........ واقفله

معلش قربنا نخلص
بص يا سيدى افتح الشنطه و تانك البنزين والكابوت من الداخل

وبكده المرحلة التانية خلصت ..... الحمد لله

تعبتوا معلش

المرحلة التالتة

نيجى بقى للمرحلة التالتة والاخيرة ان شاء الله

اخرج بره بص على الشنطه اللى انت فتحتها من جوا ارفعها

بص على الاستبن والكوريك وهتلاقى طبب الجنوط او هتلاقيهم راكبين فى الجنوط
وطقم عدة وطقم دواسات لو ملقتش حاجه اسأل عليها
وبعد كده واقفلها

- افتحها بالمفتاح واقفلها .........
- صحيح متنساش الاريال بتاع الراديو إسأل عليه هوا كمان لو مش موجود

غطاء تانك البنزين مفتوح اتأكد منه واقفله

الكبوت افتحه بصه سريعه جوا واقفله عارف هتقفله ازا ى
من على ارتفاع 30 سم وسيبه يقفل لوحده

بص سريعه على الانوار اللى شغاله الانتظار النور الاحمر كده يعنى
كله تمام الحمد لله

اركب
خد باللك كل ده والعربية لسه دايره لييييييييييه كل ده
علشان تبص على عداد الحرارة عند 90 او أقل شوية صغيرين اوى
ال ار بى ام على واحد او أقل شوية صغيرين
شوف لو فى اى لمض تحزيرية منوره
زى تشيك انجن ...... او ال ايه بى اس...... او اى لمضة من اللمض دى
..... كله تمام

بسم الله الرحمن الرحيم ........البس هات مارشيدير وارجع ورا
جرب الباركينج سينسور ...............شغال .......

طيب تمام البس الحزام واتكل على الله .........

كده الحمد لله عربيتك تمام

وربنا يباركلك فيها ويكفيك شرها

نصيحة :
اول الف كيلو حاول متقرص على الموتور
اقصى سرعه 90 كيلو
ار بى ام ميعديش 3 على اى غيار
فى ناس بتقول متشغلوش التكيف وفى ناس بتقول عادى

ملاحظات
اولا : انا لسه مستلمتش العربية ولا حجزتها حتى انا لسه بحوش بس ده اجتهاد منى وتجميع للمعلومات من هذا المنتدى الجميل ومتابعة تجارب الاعضاء اللى استلمو الحمد لله .
ثانيا : بعض الصور الموجودة مأخوذة من بعض صور سيارات الأعضاء ياريت ميزعلوش منى.
ثالثا : اى حد شايفنى غلطان فى حاجه ياريت يقول على طول علشان نصحح المعلومات انا زى ما قولت انا لسه بحوش يعنى مجربتش العربية على الطبيعه وذلك لكى تعم الفائدة على الجميع .

شكرا
أخوكم محمد صلاح