الموضوع: عايز تفضفض تعالا ادخل ممكن نساعدك

المشاركة الأصلية كتبت بواسطة shaddadfalcon1

احكيلكم حكايه مضيقاني ومش عارف انا المفروض اضايق ولا لأ

انا اتخرجت عام 2006 واشتغلت بعد التخرج ب 3 اسابيع علي طول وكان مرتبي حلو جدا واهلي كانو مبسوطين قوي ومش مصدقين
كانو فاكريني هشتغل ب 300 جنيه مثلا

كنت بشتغل في البيت اضافة علي شغل الشركه وكنت بجيب فلوس كتيير الحمد لله وكل حاجه كنت بقول عليها لاهلي وكنت بفرح قوي لما اشوفهم فرحانين بيا
لدرجه اني كنت باجي اخر الشهر واخلي ابويا وامي قاعدين وارمي المرتب في حجرهم وكنت بعد كده اخد مصروفي منهم كل شهر

شويه شويه حسيت ان الموضوع مضايقني وانا مش بعرف اصرف زي مانا عايز وبالتالي قلتلهم الفلوس هتفضل معايا وهديكم اللي انتو عايزينو
كده كده المرتب كله كان بيرحلهم لان كان علينا فلوس كتيير من فرح اختي وكنا بنوضب في شقتي
المهم انا كان نفسي اعيش بره البيت واشتغلي في القاهره عشان الشغل فيها احسن بس هما اصرو اني اعيش معاهم واتجوز في البيت وقد كان

اتجوزت وخلفت وحسيت اني مش عايش لاني كنت عمال اشتغل واصرف ومش بستمتع باي حاجه لحد ماحصل الأتي

كانو بيخططو لمرتبي وللبرامج والشغل اللي لسه هعمله ومكنش بيفضل معايا مليم وكنت بدخل جمعيات واذنق نفسي عشان اعمل اللي هما عايزينه

والدي اشتري نص فدان ب 50 الف من عمتي وانا اللي سددت تمنه وطبعا ده وقتها كان ممكن يجيلي شقه او علي الأقل مقدم شقه وطبعا الأرض دي مش بتاعتي ومحدش في البلد يعرف اني دافع تمنها لان الناس فاهمه ان اهلي هما اللي جوزوني وجابولي العربيه وكل حاجه

الأرض طبعا مليش فيها الا بعد عمر طويل ودي هتتقسم علي الكل مش ليا لواحدي

بعديها عربية والدي اللي بتصرف علي اليبت كانت عايزه عمره وديتهم 20 الف عشان يعملها وصلحها فعلا
السنه اللي بعديها اتخنق منها وباعها واشتري عربيه جديده ودفعت برضه فيها 15 الف ودخلت في جميعه ب 16 الف ودلوقتي العربيه تمنها خلص والحاله كويسه ومازلت بدفع قسط الجمعيه علما بان اهلي معاهم فلوس

محتش باي حاجه الا لما سبت البيت وطبعا بخناقه وزعل ورحت الاكسندريه ووبص علي حالي لقيتني معييش غير 4 الأف جنيه وبعديها بشهر والدي عمل عمليه واستلفت 3 الاف من واحد صاحبي عشان ادفع تمن العمليه

لقيت نفسي فجاه بقالي 4 سنين شغال زي الحمار وعندي عيلين ومعيش مليم ولا شقه ملك ولا حتي عربيه نضيفه

اهلي الحمد لله عندهم 3 فدادين ونص وعربيه نص نقل بس دايما بيطلبو مني فلوس وفاكريني معايا ملايين مش عارف ليه

كل ماييجي قرش عندهم يعملو بيه مصلحه او يشترو حاجات لاختي اللي هتتجوز السنه اللي جايه لسه وكل اسبوع الاقي والدتي شاريه با 3 الاف حاجات مش هتنفع بحاجه الا للمنظره فقط وطبعا اي ظرف بيحصل مش بيبقي معاهم فلوس وانا اللي بلبس

انا دلوقتي بحس اني حرام عليا اللي عملته ده لان ولادي اولي بيها لان في الأخر الفلوس اللي دفعتها دي هتتوزع علي الكل مش ليا لواحدي ولا لوالدي ووالدتي

انا بحبهم جدا ومش بقدر اقولهم لا بس في نفس الوقت حرام ابقي مش لاقي وهما عندهم ويعملو مصالح وانا مش عارف اعمل حاجه

ناس كتيير بتقولي اني اهبل وعبيط وناس تانيه تقولي كله بثوابه وانت ومالك لابيك بس بجد انا مكتئب

ياجماعه انا عمري مافسحت ولادي ولا مراتي ولا حتي بقعد معاهم وانا بعمل كل ده عشانهم وعشان اعملهم حاجه بس في الأخر الفلوس بضيع

انا لما بحسب الفلوس اللي صرفتها علي اهلي من 4 سنين بلاقي نفسي كان ممكن يبقي عندي شقه في مكان فخم وعربيه حلوه كمان لان الشقق اسعارها بقيت ضعفين تقريبا من 4 سنين

كل ماافتكر اللي حصل لي ده ببقي مش عارف اعمل ايه واقول ايه

بس يا باشا الموضوع اللى انت بتحكيه ده حصل مع والدى …. وانا معرفش انت عندك كام سنه بس انا برضه زى اخوك الصغير وهقولك على اللى انا شايفه من التجربه اللى انا شفتها قدام عينى على مدار السنين اللى فاتت …. بص يا سيدى بدايه الموضوع ان والدى الحمد لله هوه اللى عمل نفسه بنفسه من غير مساعده من جدى او حتى من اخواته مع انهم الحمد لله مقتدرين وعندهم ارض زراعيه وهوه اللى جوز نفسه واشتغل فى القاهره وبعد كده انتقل للغردقه
وانا ساعتها كنت عندى سنتين لما والدى انتقل الغردقه الكلام ده من 20 سنه …. بس كانت فيه مشاكل وكده بينه وبين جدى وجدتى علشان هما رفضوا يساعدوه فى زواجه وبعد فتره بسيطه من انتقاله للغردقه اتصلحت العلاقات ورجعت احسن من الاول والحمد لله والدى ساعتها كان دخله عالى جدااا… انا ساعتها كنت لسه صغير بس كان فيا ميزه انى كنت بفهم الانسان اللى قدامى ده جواه ايه بجد والله حاجه كده كانت بتجيلى من عند ربنا سبحانه وتعالى … بس وطبعا زى اى ابن بيحب ابوه وامه واخواته كان على طول والدى لما بننزل اجازه البلد فى اجازه الصيف او الاعياد والله العظيم مش عايز اقولك المبلغ اللى كان بينزل بيه كام انا فاكر منظر الشنطه ومنظر الفلوس وكان بيدى من الصغير للكبير فلوس فى ايده .. وانا مكنتش معترض على كده ولا والدتى علشان الحمد لله والدى مكنش حارمنا من حاجه ولأن دول برضه اهله بس بعد كده اكتشفت انى كنت غلط …. مع الزمن كان والدى بيكرر الموضوع ده انه على طول وباستمرار مبالغ رايحه لاهله بس معملش حساب الزمن كان اللى جاى على قد اللى رايح وبعد كده والدى ساب الشغل اللى كان فيه وانتقل لشغل تانى بمرتب اقل ومكنش معاه فلوس يعنى يدوب المرتب هوه اللى بيصرف منه ومع الرغم من كل ده برضه كان بيديهم فلوس بهبل وهوه مش حاطط قدام عينه المستقبل ومكنش بيتردد لحظه لو حد طلب منه فلوس وكان بيبعتله على طول بس هما لقوا ان الدنيا حلوه قالوا بس ده قاعد على جبل فلوس فى الغردقه طمع بعيد عنك بس والله انا والدى مكنتش بشوفه بالايام … مع كل ده هما اصلا مش محتاجين فلوس بس تقول ايه الجهل والطمع بس ومرت الايام وطبعا انا كبرت ومصاريفى كترت واخواتى برضه ووالدى طول حياته دى متعلمش ومعملش حساب الوقت اللى احنا فيه ده … بس فهوه كان ليه 3 فدان كان شاريه من زمان فى البلد ومكنش بياخد منه اى حاجه طول السنين اللى فاتت دى خالص .. ولما جه الوقت اللى محتاج فيه فلوس تخييل يحصل ايه … يعنى بعد كل ده المفروض اصلا من غير اى حاجه يردوا ربع اللى عملوا معاهم !!!!!!!!!!! لأ الاقى المعامله لما بنزل البلد اتغيرت ولما اتكلم مع اخواته علشان عايز ايجار الارض فين وفين لما وافقوا وبشروط كمان شوفت قله ادب اكتر من كده بجد انا فى الوقت ده صعب عليا والدى اوووى وانا طول المده اللى كبرت فيها دى وانا كنت بقوله الناس دى مش هتنفعك واهوه كلامى فى الاخر طلع صح ….. ووالله ممكن حد يقرا الموضوع ده وميصدقنيش بس والله العظيم الكلام ده حصل والله على ما اقول شهيد … وانا اسف لو كنت طولت … انا بقولك الكلام ده علشان بس متقعش فى اللى والدى وقع فيه انا والدى لو كان وفر ربع الفلوس اللى كان بيصرفها على اهله او كان شغل الفلوس دى فى اى حاجه فى شراء اراضى فى الغردقه فى الوقت اللى كان فيه هناك كان زمانه بدون مبالغه مليونير بس الحمد لله على كل شئ … بس اللى انا مستغربله لما الاهل يعملوا مع بعض كده امال الناس الغريبه اللى متعرفش بعض تعمل ايه ؟!!!!! بجد انا كرهت البلد دى ونفسى لما اخلص كليه اسافر بره علشان بجد ربنا يستر علينا السنين اللى جايا ومنقطعش فى لحم بعض علشان الفلوس … كل اللى انا اقدر اقوله انك متظلمش نفسك وولادك علشان بجد هتندم بعد كده وانت شايف الايام اللى احنا عايشين فيها دى عامله ازاى ما بالك بالايام اللى جايا هتبقى عامله زى ؟؟!! واسف لو كنت طولت عليكم بس بجد يا جماعه قبل ما اى حد يتخذ قرار ويقول اهلى وابويا وامى يفكر فى ولاده وبالذات لو كانوا اهلوا مش محتاجين يبقى ولاده اولى بكتيير لان لسه قدامهم حياه جايه
انا قولت افضفض شويه مع الناس اللى فى المنتدى الجميل ده بجد ربنا يدومها محبه بينا ان شاء الله …