بسم الله الرحمن الرحيم
السلام عليكم ورحمة الله وبركاته،،

بصراحة محتار أحط الموضوع ده في الأكسيسوارات ولا في الورشة ،، بس هو غالباً يليق أكتر في الورشة عشان هو صيانة للعربية

المهم كنت عايز أنضف البوجيهات ،، و طرحت الموضوع هنا ،، و نصحني أحد الأعضاء بأستخدام منظف الكاربراتير ،، "أنا عربيتي أنجيكشان" بطريقة معينة ،، و هي أني أرش عليه على البوابة و بعد كده أدور العربية على السلنسيه و أمشي بيها مشوار حلو

جربت كده الحمد لله ،، الشكر لله أولاً و أخيراً ، ثم لأخي في الله العضو "ميدو اللي نصحني "، و أثرت معايا ،، حااسيس بالفرق ،، أي نعم مش أوي ،، بس على الأقل العربية فكرتني بسحبها ،، مكنتش بتسحب خالص قبل كده ،، المهم بعد معملت كده ،، كنت راايق قوي ،، و قلت يا سلام بقى ! منضف البوجيهات بالمرة ؟! ،، و أكيد السحب حيختلف ،، مسكت البلوور و نضفت فلتر الهوا ،، بعد مركنت تحت البيت ،، و جبت المفك بتاع البوجيهات ،، و فتحت الكبود ،، و بقول يا هادي ،، شلت الكابل بتاع الكهربة بتاع البوجيه ،، و بحط المفتاح و لسة بفتح ،، نزل واحد أخو واحد جاري و بيشتغل كهربائي سيارات الحوار كالتالي ،،

عمو : ايه يا حساام عامل ايه ،، بتعمل أيه يابني ،، حيرت العربية معاك

أنا / ولا حاجة عايز أنضف البوجيهات ،،
عمو : ليه العربية بتقطع معاك
أنا / لا !!
عمو : طيب مش بتدور من أول أو تاني مرة ؟!!
أنا / لا أبدا ،،
عمو : أمال ليه حتنضفها ،،
أنا قلتله كده ،، نضافة !! و عشان أفوق العربية لأن سحبتها أتكمت خالص ،، خاااالص بجد ،، و كمان دي البوجيهات الأصلية للعربية من أول مجبناها // "شاهين أنجيكشان 2006" و متغريتش خالص ،،

عمو : يبني البوجيهات الأصلية دي مش حتلاقي زييها ،، و كمان طالما محصلش حاجة من اللي فوق ده ، يبقى سيبهم ،، عشان مش تفكهم ،، تبوظهم و يرظبوا منهم ،، فكهم بالمرة لما تيجي تغيرهم ، و مهماً غيرتهم ،، آخر اللي حتجيبه يعيش معاك سنة ، بلاش تفكهم بدل ميرطبوا منك ، و تبوظهم ، و تكون جيت تكحلها عميتها ،،

أنا / بكلل بساطة ، رجعت كبل الكهربا تاني ، و قلت أسأل أعضاء نايل موتورز " أخوااني"

أولاً : هل حكاية منظف الكاربراتير دي فيها غلط ،،

ثانياً : هل عمو إبراهيم "الكهربائي أخو جاري" عندو حق ؟!!!

ثالثاً : تنصحوني بأيه ؟!!