اتخنقت من الجراج واللى فيه

**AirForces** · 13-09-2010 02:51 AM

سلام عليكم
انا بس عاوز افضفض معاكم لأنى مخنوق جدا من موقف نكد عليا فى العيد
انا بركن فى جراج قريب من العمارة هو عبارة عن حتة واسعة كدا على الشارع يعنى مش جراج مجهز وكدا المهم مكانش فيه غير دا اقرب واحد ليا
حصلى مواقف كتير فيه كنت بتخنق منها بس بكبر دماغى واقول مش مهم اهو الجراج أأمن برضو زى انى انزل الاقى الغطا مش موجود والسايس شايله عنده بحجة انه طار والعربية طبعا كوم تراب .. اخرة ما زهقت بقيت اغطيها واحشر الغطا فى الأربع عجلات عشان ما يتحججش ويقولى طار ..
بقيت الاقى إيه بقا الغطا متقطع بالعرض إيه اللى عمل فى الغطا كدا يا عم يقولى دى الكلاب يا باشا قولتله كلاب إيه دى اللى تقطع الغطا بالعرض كدا دى اكيد محترفة الموضوع دا حصل بتاع 5 مرات
وفى مرة نازل فى رمضان واتفاجئت بخبطة فى العتب ينهار ابيض دى العربية لسه زيرو وتتخبط فى الجراج كمان دا غير التجاريح والخرابيش والذى منه
قولتله هو انا بحطها فى الجراج عشان تتبهدل وتتخبط طب ما اركن فى الشارع احسن عمل عبيط ومش عارفين إيه اللى خبطها ويمكن خبط فى طوبة وقعد يعمل حوارات
قولتله طوبة إيه يا عم هو انا بركن جنب رصيف اصلا ( لأننا بنركن عمودى فى الجراج) ولا على اساس انه العربية واطية اوى والطوبة هتطول العتب
وعديت الموضوع وقولت بلاش اكبره ( خلى بالكوا انا كل اللى حصل دا وانا بتكلم بالعقل وبراحة وبالذوق )

جيت بقا اليوم اللى قبل الأخير من رمضان قولت اروح ادفعله الأشتراك قبل العيد عشان يعيدوا بقا وبتاع وروحت وقعد يقولى كتير خيرك وبتاع وانت لحقتنى قبل ما اسافر .. طيب انت مسافر مين اللى هيقعد بدالك يا عم عشان يطلعنى قالى متخافش يا باشا انا هقعد سايس هنا ومش عارف معاه مين واطمن.

قولتله متأكد العيد جاى وانا مش عاوز يطلع عينى على ما اعرف اطلع العربية لأنه بيحطوا وراها عربيات تانية مرة ملاكى ومرة نص نقل ومرة ميكروباص قالى لأ اطمن

جيت بقا فى العيد روحت انا ووالدتى للجراج ابص الاقى تاكسى متغطى وراكن ورايا وجنبى ميكروباصات يعنى الحل الوحيد اطلع التاكسى .. دخلت ادور على السايس فى الأوضة بتاعتهم وانده عليه ومحدش معبرنى كان عامل نفسه نايم وفين لقيت واحد بيرد عليا ويقولى السايس مش موجود طب انا عايز اطلع يا عم ازاى مش موجود يعنى قالى ماليش دعوة .. مالكش دعوة ازاى يا عم طب اطلع كلمنى هنا .. فين لما لقيت واحد طالع طلع عسكرى ولسه قايم من النوم الساعة 10 ورايح يلحق القسم .. قعدت انده تانى عشان البنى آدم اللى جوه يقوم يكلمنى قالى انا مليش دعوة يا عم مش انت السايس دلوقتى يبقا ملكش دعوة ازاى يقولى لأ السايس اللى لسه ماشى قدامك ..
هنا حسيت بأستفزاز وقولتله هو من امتى عساكر الداخلية بيحرسوا الجراج قالى دا مش عسكرى وعمل عبيط عاوز اقولكم انه شكله كان مبرشم
ووالدتى عمالة تيجى معاه بالذوق طيب طلعنا انسانية احنا مسافرين وبتاع ودا مفيش اى دم
من هنا بدأ صوتى يعلى وانفعلت والناس فى الشارع بدأوا ياخدوا بالهم وقولته يعنى اخبطلك العربية اللى ورايا عشان تستريح قالى ما تقدرش قولتله لأ اقدر بقا وانا عربيتى اتخبطت فى الجراج قبل كدا وانت السايس هنا دلوقتى ولو حصل اى حاجة لأى عربية انت المسئول قالى بص انا مليش دعوة .. بصراحة ما شوفتش تناحة كدا
والدتى قالته يعنى نروح نعملك محضر فى القسم دلوقتى قالها روحى .. فأنفعلت اكتر وكل دا ومغلطتش خالص وانا بتكلم قالى اتكلم عدل انت عارف انت بتكلم مين

ينهار مش فايت حتة واد مبرشم يقولى انت عارف انت بتكلم مين

قولتله لأ انا عاوز اعرف بقا انت مين قالى ملكش دعوة
اللهم طولك يا روح لجأت للذوق مفيش فايدة لجأت للتهديد برضو مفيش فايدة وفى الأخر قعدت ازق العربيات انا ووالدتى عشان نطلع وناس من الشارع جم ساعدوا ورجعنا التاكسى والغطا كان وقع وقعدنا نغطيه والناس يقوللنا سيبوه وانتو هتشتغلوا فى الجراج ..

دلوقتى انا لقيت جراج كويس ومنظم جدا وفيه امن بس عيبه انه بعيد عنى بس اضطريت اشترك فيه وبقيت حامل هم المشوار عشان انا مش جايب عربية عشان امشى
واللى خايف منه اكتر لا الواد دا يشوفنا فى اى حتة ويتعرضلنا...
وكل سنة وانتم طيبين

**omar-saad** · 13-09-2010 02:57 AM

معلش هية كل الجراجات كدة
تدفع فلوس وفى الاخر يتحرق دمك
بس بجد انتا غلطان على خبطة العتبة دى
كان لازم ماتسكش عليها
ومش مهم المشوار المهم ان عربيتك تبقى فى امان
وربنا يسترها علينا جميعا

**mahmoudysf** · 13-09-2010 02:57 AM

انا بصراحة بحسدك على صبرك وهدوئك رغم انى متغاظ منهم شوية
واللش مش فاهم جملة
خايف الواد ده يتعرضلنا

**A7MED_PHARMA** · 13-09-2010 03:03 AM

واد مبرشم يقولى انت عارف انت بتكلم مين

دي جامدة أوي..لو مكانك
وطالما هوا مش عارفك ..كنت تتقمص شخصية ظابط الشرطة وتعمل عليه فيلم
وإنت إلي تقوله مش عارف إنت بتكلم مين

هههههههههه
بيقولك مش عارف إنت بتكلم مين...معلش مش قادر أمسك نفسي من الضحك لما رسمت المنظر في خيالي

**AirForces** · 13-09-2010 03:16 AM

المشاركة الأصلية كتبت بواسطة A7MED_PHARMA

دي جامدة أوي..لو مكانك
وطالما هوا مش عارفك ..كنت تتقمص شخصية ظابط الشرطة وتعمل عليه فيلم
وإنت إلي تقوله مش عارف إنت بتكلم مين

هههههههههه
بيقولك مش عارف إنت بتكلم مين...معلش مش قادر أمسك نفسي من الضحك لما رسمت المنظر في خيالي

ههههههههه انا فى عز ما كنت منفعل كنت هضحك بس مسكت نفسى وقولتله على فكرة انا عمى لواء ( ودى حقيقة بس لواء جيش مش شرطة

) بس ولا اثر فيه ويقولى اعمل اللى تعمله وبايع القضية

**A.Saad** · 13-09-2010 03:41 AM

انت متوسط اللى بتديه للسايس الاصلى كام
اشتراك وتيبس ونظافة
كل حاجة لوحدها بس

**Soma_Sooma** · 13-09-2010 04:24 AM

بصراحة انت صبور قووووووووووووووووووووووى

انا لومنك كنت عملت جناية هههههههههههههههههههههههه

**mr_vampire** · 13-09-2010 04:40 AM

حلوة كلمة ( انتا مش عارف انتا بتكلم مين ده ) بس تحليلي للموقف ده : انه كان عامل دماغ جامدة اوي ودماغه وصلته انه بقي شخصية مهمة ومعاه فلوس كتير وخلاص هيعرف يعمل دماغ في اي وقت وبكل الاصناف الممكنة فانتا جيت فصلته وقفشته قفشة التنين فصحي بس ملحقش يفوق من الشخصية اللي تقمصها وبناء عليه ( انتا متعرفش انتا بتكلم ميييييييييييييين).

وحوار انه يتعرضلك ده متقلقش منها لو شافك فالشارع اصلا مش هيعرفك ده كان مساااااااااااااااااااافر ولسة راجع.

-

-

الموضوع: اتخنقت من الجراج واللى فيه

LinkBack

أدوات الموضوع

عرض

اتخنقت من الجراج واللى فيه - انشر الموضوع فى :

-

-

-

-

-

-

المواضيع المتشابهه

للخبراء واللى دماغهم عالية قوى ...

الموتوسيكلات واللى راكبينها

الفرق بين النترا خليجى واللى فى مصر

المطب واللى عمله

الحق الوبل واللى حصلها

الكلمات الدلالية لهذا الموضوع

المفضلات

المفضلات

ضوابط المشاركة