الموضوع: محتاج جهاز اسمه Kill-A-Watt لقياس استهلاك الكهربة - 750 فاتورة كهربة

المشاركة الأصلية كتبت بواسطة maadi

انا بردو معنديش غاز في المنطقه و مريت بنفس مشكلتك بالظبط بل عاندت مع كل من نبهني لموضوع السخان.
فاتورتي كانت بتعدي الألف و بقول للناس مليش أي متطلبات كهربيه سوى المكان اللي قاعد فيه يكون بارد (يا ريت لو مثلج) و شوية كمبيوترات...معنديش تلفزيون ولا غاوي إضاءه عاليه و إستخدامي للثلاجه و الغساله و المكنسه شبه معدوم.

لما وصلت الفاتوره في مره لألف و ربعما ئه و حاجه قلت طيب هجرب أطفي السخانات كان عندي أربعه منهم إتنين يكاد لا يستخدموا (واحد لحمام الضيوف و واحد لغرفة الغسيل. و الغساله أصلا بتسخن الميه لوحدها يعني مبتسحبش من السخان. و بغسل في الشهر مره لأني كسول). قلت من باب التجربه مش أكتر طفيت كله و قعدت أول أسبوع مستاء لأني بحب الوضوء و الإستحمام بمياه دافئه. ركبت بعد كده سخانين غاز (تكسير في الحيطه و صداع شراء أنابيب) فقط من أجل إسكات كل من قال لي " إطفي السخان الكهربا".
و أول شهر جت فلوس قرب الألف. يعني نتيجه مش مبهره أوي بس أفضل من الأول.. قالولي أصبر و شوف تاني شهر و بالفعل نزلت ل400 و كان أول شهر أقل عن 500.

السخان الكهربا رغم أنه شكله أليف و ملوش صوت إلا أنه جهاز سهتان قاعد يسحب كهربا و فلوس فإحذر منه حتى لو مش بتستعمله طول ما هو والع يفضل يسخن الميه و لما حرارتها تنخفض و هي مخزونه داخل الحله يرجع يشتغل و يسخنها تاني....كابوس.
أما التكييف فحلال فيه كل قرش فهو إبن حلال و بيتعب لتظبيط الجو الولعه.. بس إبقى إقفل الشباك و باب الغرفه. (حتى لا يطير الدخان)

معاك في كل حاجة قلتها عن التكييف,
وفعلا حجرب موضوع السخان ده إن شاء الله

المشاركة الأصلية كتبت بواسطة maadi

و عشان يبقى الواحد بردو جاوب طلبك الأصلي وهو وجود بديل لجهاز قياس سحب الطاقه الكهربيه يعمل على 220 فولت إليك الرابط التالي:

upm plug-in energy meter and electricity cost calculator (em338)

ولو حبيت تجيب منه صيني و تغرق السوق:

energy meter - energy meter manufacturers


بس بردو إطفي السخان :)

شكرا يا فندم

المشاركة الأصلية كتبت بواسطة maka

هو فيه بس بيتباع فين الله اعلم

لان انا اشتغلت على جهاز ممثل بيسجل ال kwh و كان مع شركة الكهرباء

و فيه حل ارخص تجيب بنسة امبير

و التلاجة و الديب لو شغالين على طول المواتير مش هتستحمل - ربنا يبارك لك فيهم -

انا لو منك هتاكد ان الشرايح مغليتش و اذا كان اطلب تغيير العداد و ياريت لو بديجيتال

ألف شكر حاحاول الاقيه بس معرفش أسأل فين

المشاركة الأصلية كتبت بواسطة a.saad

انت بتشغل التكييف ةالشباك مفتوح علشان مدخن شره
طيب مفيش جهاز ينقى الهوا افضل من دخان السجاير
كمان
لو خليت سخان واحد بس اللى شغال هيكون اوفر شوية

جهاز تنقية الهوا في رأيي غالي 700 جنيه +
كمان معرفش بيعمل حاجة ولا متحسش بيه خالص
وانا مش عارف, هل كل الاخوة المدخنين بتقفل الشبابيك والتكيف شغال ولا إيه؟
..أنا مقدرش أعمل كده.