الموضوع: باك سبيس يا نايل موتورزية

إحنا ليه لغة حوارنا تدنت كده؟

إحنا ليه بأه سهل علينا أوي نجرح و نهين و نغلط؟

ليه مش بنستعمل الزرار العجيب اللي في الكيبورد ده اللي اسمه Backspace؟

ليه ممكن نكتب حاجة و احنا عارفين كويس أوي إنها هاتضايق مننا ناس و هاتجرحهم و تعكنن عليهم و مش بنفكر ولا مرة واحدة قبل ما ندوس "إرسل مشاركة" إننا نراجع نفسنا أو نقرا اللي كتبناه و نشوف لو الكلام ده اتقال لنا هانزعل و لا لأ؟

طبعا انا مش عايزة أشير لموضوع معين، و إنما لا يخفى على أحد اللي حاصل في موضوع يخص الزواج و تحول لسجال مؤسف بين الجنسين و تبادل إتهامات و تجريح متبادل و طبعا الكل زعلان.

طيب ليه يا جماعة من الأول نوصل الموضوع للمرحلة دي؟ ليه ما نراجعش نفسنا قبل ما نقول كلام يضايق، و بالتالي اللي اتضايق هايقول هو كمان كلام يضايق و نبدأ في الغلط في بعض و بعدين يضطر المشرفين إنهم يقفلوا الموضوع عشان التجاوزات زادت عن حدها.

أنا لازلت مش عايزة أتكلم عن موضوع بعينه، إنما من الملاحظ في المنتدى في الفترة الأخيرة إن محدش بأه طايق لحد كلمة و لغة الحوار بأه فيها حدة و تحفز غير طبيعيين.

يا ريت يا جماعة نراجع نفسنا و نستغل فرصة إن الكلام هنا ع المنتدى ممكن قبل ما يطلع منك تراجعه بBackspace.. أما في الحياة الواقعية فللاسف مافيش الأوبشن ده و اللي بيطلع منك بتتحاسب عليه، فخلينا نتدرب على ضبط النفس هنا بدل ما نتعامل بنفس الطريقة برة المنتدى و نتمنى ان كل حاجة تطلع من بقنا ينفع يتعمل لها باك سبيس.