أيهما لإضل الميرا - الماروتى - الكانشيل

**عزيز محمد** · 28-05-2007 03:12 AM

السلام عليكم ورحمة الله وبركاته

معلش أنا سالت السؤال ده فى كونتكت لكن لم اتلقى إجابات قاطعة وبصراحة حان وقت الشراء وأنا كونت راى لكن محتاج حد يأكد لى صحته أو يقتعنى بعكسه.

ظروفى هى: محتاج سيارة لى فقط (وليس للعائلة) اريدها صغيرة حجما وتكلفة وتعيش لمدة لا تقل عن 5 سنوات إن شاء الله، وأريد الا أقضى هذه السنوات الخمس فى زيارات متكررة للميكانيكى، ومعى فى حدود 25 الف

أنا مستريح اكثر للميرا للاسباب التالية:
1- يابانى 100% وبالتالى أتوقع ان تكون كفائتها أعلى
2- اشعر إنه من تصميمها أنها اكثر ثباتا من الماروتى (وده شعور شخصى بحت، يعنى ممكن يكون خطا)
3- اتوقع برضه أن تكون الكفاءة والعمر الافتراضى لقطع غيارها أعلى من الماروتى

مقلقنى منها حاجتين : إن اسعار قطع غيارها تكون غالية عليا، وإن المتاح منها بالسعر ده هو موديلات 90 وحتى 96 وخايف بكده تكون مستعملة زيادة عن اللزوم

يا ريت أبو عبد الله - باعتباره خبير الديهاتسو- ود/ أحمد - باعتباره كان يمتلك كانشيل اللى هى أخت الميرا- يدونى جواب شافى كافى على هذه المسألة

وجزاكم الله خيرا

**Dr Ahmed** · 28-05-2007 03:38 AM

الكانشيل الآن أفضل من الميرا لأن توكيلها وقطع غيارها مازالوا نشطاء (هاشم باص)

فلو ربنا وفقك لشراء كانشل أو ميرا مستعملة هتكون أفضل 100 مرة من الماروتى بلا أدنى جدال وعن تجربة...

أسعار قطع الغيار معقولة والأهم انها موجودة، وما تفتكرش أسعار قطع الماروتى رخيصة.. نفس الرينج

أستهلاك البنزين والزيت فى الكانشيل خرافى وفلتر البنزين والزيت ببلاش كده

كنت باطير بيها على 120 ووالله زى الفل فى الثبات (نسبيا طبعا) وأقصى حاجة جبت بيها 135 وخفت أكمل وكان عندها استعداد تكمل

كنت ساعات باخد معايا 4 وزن تقيل وعمرها ما اشتكت أو حسيت انها ضعيفة .. هى 850 سى سى وكانت معايا كأنها 1300 ، يعنى موتورها مناسب لوزنها تماما..

وعلى فكرة كانشل موتورها دايهاتسو والعفشة على ما اذكر يابانى والباقى ماليزى من أفضل الخامات ، وأنا أعتبرها فخر للصناعة الماليزية

فسواء كانشيل أو ميرا إختيار موفق، وكل موديلاتها المستعملة هتكون جديدة نسبيا، يعنى بعد 97

25 الف تجيب كانشل 98 بدون تكييف مانيوال

وبالتوفيق يا أخى

**mohamed el hussien** · 28-05-2007 04:10 AM

فعلا انا ناس بتحلفلي بالعربية دي
مع واحد صاحبي
صحابي سافروا بيها معاة العين السخنة
مركب خمسة في العربية
وبيقسمولي انة قفل العداد 160
وبيقولي انها بتقفل عداد عادي
وفي البنزين مش حاقولك
ولا كلمة

**Dr Ahmed** · 28-05-2007 05:03 AM

أنا برضه رحت بيها العين السخنة

نسيت أقولك ان قطع غيار الكانشيل والميرا تقريبا واحدة

**عزيز محمد** · 28-05-2007 11:25 AM

السلام عليكم ورحمة الله وبركاته

جزاك الله خيرا يا دكتور احمد، إنت كده كفيت واوفيت فعلا

وكمان وسعت اختياراتى بحيث انضمت الكانشيل إلى الميرا (باعتبارهم تقريبا حاجة واحدة)، وبكده إن شاء الله هيكون ايجاد واحدة حالتها كويسة أسهل نظرا لاتساع قاعدة البحث

بس مش فاهم جملة "الكانشيل الآن أفضل من الميرا لأن توكيلها وقطع غيارها مازالوا نشطاء"
هو توكيل ديهاتسو هيرفض يتعامل مع الميرا؟ ولا قطع غيارها مش هتكون عندهم باعتبار إنه مفيش منها جديد؟؟

**أبو عبدالله** · 28-05-2007 12:01 PM

لأ طبعا توكيل دايهاتسوا انا اعتبره من أفضل التوكيلات في مصر على الاطلاق ومش من مصلحته انه لا يتعامل مع القديم لنه بيعمل سوق فلازم ينشط القديم لأنه بيبنى عليه شراء الجديد .........
ولكن الميرا بتمسك سعر اكتر من الكانشيل
انا اصلا بلاقي ناس بتدور عليها ومحدش عاوز يبيعها

**عزيز محمد** · 28-05-2007 12:21 PM

السلام عليكم ورحمة الله وبركاته

جزاكم الله خيرا على حسن وسرعة الاستجابة
كده الحمد له إطمانيت لقرارى وواضح إن الميرا و الكانشيل مايتخيروش عن بعض وبالتالى فأى منهما هتفى بالغرض

باقى نقطة اخيرة (معلش أنا عشمى زايد شوية) هلى فيه نقاط معينة لازم أهتم بيها أثناء فحص السيارة (عيب شائع مثلا أو أجزاء بعينها بتدل على حالة السيارة) خاصة بالسيارتين، أم ان الفحص المعتاد الذى يتم إجراؤه لأى سيارة مستعملة يفى بالغرض؟؟

وهل فيه تعديلات أو قطع غيار خاصة ينبغى استبدالها بعد الشراء مباشرة؟ أم أن الأمر متوقف على حالة السيارة؟؟

**Dr Ahmed** · 28-05-2007 12:43 PM

لابد من الاطمئنان على الموتور والعفشة أولا بواسطة متخصص ، وسؤال صاحب السيارة عن تغيير سير الكاتينة ويجب تغييره هو والكاتينة لو لم يكونا تغيرا، ويستحسن الاطمئنان على الكبالن فى الملفات وتغيير الكاوتشات وتيل الفرامل والبوجيهات والفلاتر بعد الشراء، ودا فى أى سيارة

**عزيز محمد** · 28-05-2007 12:57 PM

السلام عليكم ورحمة الله وبركاته

جزا الله خيرا كل من تفضل بالإجابة على وكمان على النصائح الهايلة دى

إن شاء الله أتابع معاكم بعد الشراء (بس فى منتدى الديهاتسو)

وربنا يوفقك يا دكتور احمد فى امتحانات الدكتوراة

السلام عليكم ورحمة الله وبركاته

**mokhtar** · 27-08-2007 02:56 AM

السلام عليكم ورحمه الله وبركاته

العربيه البرودوا ماشاء الله عليها شديده اوى انا ماكنتش اتوقع انها تكون بتستحمل كده انا لركبتها مع واحد صاحبى وكنا 6 ايوه كنا 6 فى العربيه ومشغل التكييف وبيجرى على 110 والعربيه ثابته وكان العزل هايل ماكنتش حاسس باى حاجه من بره وعلى فكره تكييفها كويس جدا العربيه دى بجد جامده اوى شكلها لا يعبر عن امكانياتها

..MOKHTAR..