الحمد لله استلمت لوجان 2010

**nightsnipr** · 18-09-2010 09:34 PM

الحمد لله بعد تفكير حوالي 6 شهور و قرايتي لكل مواضيع المنتدي اللي اتكلمت عن اللوجان هنا قررت اني احجز اللوجان و بشكر كل الناس اللي شاركت في المنتدي بتاعنا عشان ساعدوني اني اخد قراري و ابعد عن شبح الكوري و خلصوني من عقده الفرنساوي (ليا تجربه سيئه جدا لمده سنه مع الستروين خليتني اكره الفرنساوي)
حجزت العربيه 2011 في التوكيل و كل يوم يدوني ميعاد و بعديها يتغير و بعد 3 اسابيع لما زهقت و عملت معاهم مشكله قالولي موجود 2010 نبيتي استلام فوري فقلتله ماشي هاخدها
بسم الله ماشاء الله العربيه فعلا زي ما بتقولوا عليها اكتر من ممتازه و مفيهاش غير العيب بتاع زنه دواسه البنزين - هي فعلا بتضايق بس بعد فتره بتاخد عليها
الدبرياج رااااااااااائع و ده سبب رئيسي في تغييري للستروين لاني بعيد عنكم عندي انزلاق غضروفي و الضغط علي الدبرياج كتير و خصوصا وقت الزحمه بيسببلي الالام بشعه
فعلا العربيه عاليه و مبتحكش في اي مطب مهما كنت محمل ناس في العربيه و ديه ميزه رهيبه
العفشه بتاعتها ساااااااااااااحره و انعم من عفشه الكليو و الهوندا سيتي و بجد كان ماشي علي ريش نعام
الشنطه عاليه شويه و هي بتضايق في الركنه بس مع الوقت الواحد ان شاء الله يتعود عليها
مرايات الجنب ممتازه فعلا و بتحسسني ان اللي في عربيتي القديمه كانت مرايه حمام
الصالون والشنطه بجد جنني و جنن كل اللي شافوها (اصحابي كتير منهم عايز يشتريها بس هما خايفين و قالوا يجربوا فيا الاول )
نور العربيه كانه زينون لدرجه اني لما بشغل النور و الواطي و الفوجات بلاقي كل اللي جاي في المقابل بيرعشلي يا اما بيشغل العالي و لما سالت واحد صاحبي كنت ماشي وراه بالعربيه قالي انه فعلا كاني مشغل العالي و ده بيكشف كل البلاوي اللي في شوارع المحروسه
الكاسيت و السماعات ممتازين و بصراحه مرضتش اغيره مع اني عندي كين وود بفتحه يو اس بي و ايه يو اكس و ام بي ثري بس بتاعها ممتاز و جبتله الاف ام تراسميتر بتاع راديو شاك و زي الفل
طبعا التوكيل لغايه دلوقتي مسلمنيش كل ورق العربيه ( انا مقسط مع التوكيل) و حاولت اروج استاجر نمر تجاريه النهارده من وسط البلد و سمعت المهزله التاليه
النمر التجاريه ممكن تتاجر بحوالي 75 - 80 جنيه في اليوم و بتسيب 300 جنيه تامين و بتكتب يا اما وصل امانه ب 20 الف جنيه او وصل امانه من غير مبلغ عشان يضمنوا حقهم
طبعا كنت هقل ادبي عليهم - معقوله اكتب وصل امانه علي نفسي لواحد زي اللي بتوع تاجير النمر دول سوري و ممكن الاقي نفسي محبوس بيه
قلت و الله ما راكبها لغايه ما يخلصولي الورق و ارخص رسمي و هركب الستروين تاني و امري لله
معلش طولت عليكم بس بجد انا بشكر كل الناس اللي ساعدتني في اتخاذ قراري بشراء اللوجان و اللي فعلا و هي ماشيه في الشارع مخليه كل الناس تبص عليها قوي

**nono533223** · 18-09-2010 10:43 PM

الفففف مبروووووووووووووووووك ربنا يديك خيرها و يكفيك شرها انا صراحة مقدرتش اصبر و ظبط نمر تجارية بس علي خمسين لحد مرخصت ربنا يباركلك فيها

**MoHaMed HaMeD** · 18-09-2010 10:52 PM

الف مبروك ورنا يباركلك فيها

**Dr.Karim Emam** · 19-09-2010 12:59 AM

ألف مبروك يا باشا
بس هو سعر 2010 بنفس سعر 2011 ولا فيه فرق؟

**ahmedbakr50** · 19-09-2010 01:40 AM

والسعر كام

**nightsnipr** · 19-09-2010 06:17 AM

الله يبارك فيكم كلكم
2010 تمنها 68000 يعني فرق 500 جنيه بس
بس انا الصراحه مقدرتش اصبر علي التوكيل لان حبالهم طويله قوي و ممكن افضل مستني شهرين كمان مفيش اي فرق بينهم و ده اللي شجعني اني استلم 2010