الموضوع: اعظم واجمل وانضف توكيل فيكي يا محروسة !!!!

المشاركة الأصلية كتبت بواسطة ahmedfathy77

السلام عليكم ورحمة الله وبركاته

اولا طبعا اللى حصل لحضرتك ده خطا مش صغير ويدل ان الاستاذة اللى كلمت حضرتك او الاستاذ اللى استلم منك عربيتك مش عاوز اقول جهلة انما مقصرين فى شغلهم ومش عارفين الفرق بين الجين 2 والواجا وطبعا معاك حق فى القرف منهم .

بس انا بس كان عندى كام ملاحظة من واقع كلام حضرتك على اللى حصل عشان بس نعرف المشكلة فين بالظبط .

1- الخطأ اللى حصل خطأ ادارى مش خطا فنى حصل لا قدر الله فى عربيتك من موظفة الاتصال ومهندس الاستقبال اللى هما اكيد مقصرين فى حق نفسهم وفى شغلهم قبل ما يكونوا مقصرين فى حق حضرتك .

2- اعتقد ان مفيش حد فينا مبيغلطش كل ابن ادم خطاء كلنا وارد نعمل خطا فى شغلنا او فى حياتنا بس اللى اهم من الخطأ هو الاعتراف بالخطأ نفسه والاعتذار عنه ومحاولة تصليحه واعتقد ان مكالمة واحد زى المهندس امر لحضرتك كانت اعتراف بالخطأ وكلامه يدل فعلا ان انسان محترم مش مكابر وخير من يمثل التوكيل اللى بيشتغل فيه والحقيقة الموقف ده زاد من احترامى للمهندس امر اللى فعلا فى كل مواقفه سواء معايا شخصيا او مع ناس كتير اعرفها كان انسان فوق الوصف فى اهتمامه بشغله وبالناس ومشاكلها واعتقد ان دى اول مرة اشوف حد هنا فى المنتدى قال ان فيه توكيل ممثلا فى واحد فى منصب زى ده كلمه واعتذر له فى اى مشكلة حتى لو طلع التوكيل فيها غلطان واللى مش مصدقنى يدخل يشوف المشاكل مع غبور ومنصور.

3- حضرتك لو عاوز تغير عربيتك عشان شايف ان بروتون كلها مشاكل زى موضوع الاصوات والتزييق وكده احب اقول لحضرتك انى لغاية السنة اللى فاتت انا كنت بعتقد ان العربيات الامريكية واليابانية مفيهاش غلطة وطبعا الكمال لله وحده وان الكورى او الماليزى لا يقارن لغاية ما كلنا اتصدمنا باكبر عمليات استرجاع فى تاريخ السيارات حصلت السنة اللى فاتت ولغاية دلوقتى بتحصل ادت الى ان تويوتا العملاق الذى لم يخسر يوما اصيب بخسائر نظرا للمشاكل اللى ادت لحوادث مدمرة لملاكها كان نتيجتها ان رئيس الشركة حاكموه فى الكونجرس واتغرم وعملاق الصناعة الامريكية جنرال موتورز سحب كم عربيات لنفس الاسباب وغيره وغيره فى حين مشفناش لا بروتون عملت كده او كيا مثلا .
انا بقول الامثلة دى لحضرتك عشان بس نفكر نفسنا ان الكمال لله وحده ومفيش عربية مفيهاش عيب سواء كانت امريكية او صينية فاذا كان العيب مش مؤثر على اداء العربية فده كويس مقابل كل المزايا والامكانيات اللى فى العربية مقابل سعرها واظن حضرتك لما اشتريت الواجا كنت عارف ان فيه عربية تانية اسمها الصنى واكيد لما اخدت قرار الشراء قارنت ما بينهم ولقيت ان الواجا افضل فى حاجات كتير لان محدش فينا بيرمى فلوسه فى الارض .

4- حضرتك لو العربية مش عجباك ده حقك ولو عاوز تبيعها ده حقك برضه بس مش من حق حضرتك انك تتهم الناس اللى العربية عجباها او بتشكر فيها او شايفه ان مميزاتها اكتر من سلبيتها بانهم كدبوا عليك او على الناس لان الناس كلها هنا ناس اكتر من محترمة وبتخدم بعضها من غير حتى ما تعرف بعض وبيحاولا يحلوا مشاكل الناس بكل الاشكال وعيوب ومزايا العربية كلها معروفة وواضحة فى عشرات المواضيع السابقة وفيه ناس كتير مبسوطة جدا من عربياتها ومعندهاش استعداد تغير واذا غيرت هتغير لبروتون برضه فارجوا ان موضوع اتهامات التضليل والكدب اللى انتشر فى المواضيع فى الفترة الاخيرة يقف ولو الناس موقفتش الموضوع ده انا بطالب الادارة انها تاخد موقف من اتهامات الناس المرسلة دى اللى بتصيب الاعضاء سواء بقصد او من غير قصد لان لو كل واحد عشان متضايق شوية يدخل يكيل الاتهامات على الناس كلها عمال على بطال والادارة ساكتة يبقى المنتدى ده ميلزمنيش وميلزمش ناس كتير .

اسف على الاطالة

كلام مظبوط و محايد، ومن الاخر

المشاركة الأصلية كتبت بواسطة ayman_52

هل حضرتك عند علم بكام علبه دريكسيون تم تغيرها ؟؟؟ ونسبه العلب اللى اتغيرت الى نسبه مبيعات العربيه كام ؟؟؟؟

طب سيبك من اللى قال انه عيب فردى , هل حضرتك معاك عدد او عملت احصائيه للموضوع دا ... ياريت لو معاك تنزلها عشان فعــلا يكون كلام واقعى ومش مرسل ... وتقولنا كام واحد اتعمل عليه الاحصائيه دى

اظن انى من اكتر الناس اللى بتروح التوكيل , ومن اكتر الناس اللى بتابع المشاكل مع ملاكها وفى حياتى لا قولت على حاجه دا عيب جماعى ولا عيب فردى ... اللى بيطلع معاه مشكله بيدخل يقولها انما موضوع عشان كل واحد عنده مشكله مضايقاه و بيقعد فى التوكيل وبيتكلم مع كام واحد جنبه ويطلع عند كام واحد نفس المشكله فيرجع ويعمم الموضوع ... اظن هى دى المشكله

وصراحه لو حضرتك شايف اى حد فى المنتدى بيضلل او بيتكلم كلام غلط , تقول عليه عشان الناس تعرفه وتاخد بالها منه, واسمك حتى تكون كسبت ثواب فى الناس اللى بتضلل دى

انما للاسف فى موجه كده ماشيه بقالها فتره من تلقيح كلمات وصفات , الصراحه اقل ما توصف بانها بتصدر من اشخاص غير مسئوله , ومش عارف علاجها ان الواحد يسبهم يتكلموا كده ولا يوقفهم عند حدهم !!!

.

يا مون والله انا عارف انك زعلان علشان اللي بيحصل ده، بس براحة على نفسك، كله انشاء الله يتحل بالهداوه، و عارف ان محروق لما آل عليه حال المنتدى، كله انشاء الله يتحل من غير حرقة دم، احنا بنتعاون مع بعض لوجه الله، و لو كله حسبها كدا محدش هيزعل من حد، و بالنسبه لصاحب الموضوع عندك حق تزعل و تضايق طبعا و بس كل التوكيلات مش زي ما انت متخيل.

لا حول ولا قوة الا بالله العلى العظيم !! بس كدة

المشاركة الأصلية كتبت بواسطة momopersona

ههههههههههههههههه
قابل بئا يا اسلام باشا

ربنا معاك و معانا

ازاى تقول ان التوكيل وحش يا راجل
ده جميل خالص
وكل الناس اللى اشتكت فى المنتدى حاله فرديه او العيب فيهم


وحاسب بئا ممكن واحد يطلعلك اخطاء املائيه ونحويه فى كلامك
والتانى يقولك ممنوع تغلط فى مهندسه فى التوكيل وحرام عليك كده تخيل لو دى اختك او مامتك
والتالت العيب فردى بردو والناس اللى قابلتها فى التوكيل دى بردو فردى واللى بتسألها فى الشارع فردى واللى فى المنتديات الاخرى فردى


كلنا لها يا اسلام
ولو مش مصدق ابحث فى مواضيعى القديمه نفس السيناريو بالظبط بنفس الاعضاء بالظبط بردو

مش تشكيك فى حد
ولكن ليه انت غلط تعمم انما هما صح انهم يعممو العكس ؟؟
وليه حد ممكن يزعل من كلامك على التوكيل بس ؟؟

هافترض انك عجبك التوكيل ايه اللى يدايق لما واحد مايعجبوش ؟؟
ليه ترد عليه بالعكس فى عز نرفزته وكرهه للى حصل فيه (استفزاز مثلا) ؟؟

ماهو انا طبيعى لو كاره بنى اادم وبقولك ده وحش واذانى ولا سرقنى
تقوم قايلى ده احسن انسان فى الدنيا ده جميل خالص اكيد هاتنرفزنى صح !!
ياريت الكل يفكر فى كلامى

انت وانا وناس تانيين رأينا كده
و خط الدفاع البروتونى رأيه العكس
وفى الاخر مفيش دخان منغير نار ولذلك انا وغيرى متعاطفين معاك جدا و كرهنا التوكيل بسبب كلامك وكلام غيرك

اتمنالك الخير والله وربنا معاك فى اللى هاتقابله داخل المنتدى بعد عملك للموضوع ده

ايه اللى هايقبله ؟؟
هنضربه مثلا !!!

ولا هنلم من بعض 200 جنيه نجيب بيهم تورتة نديها لكريم منير و نقوله اوقفلنا العضو ده يا باشا و دى حاجة بسيطة كدة مش قد المقام !!

انا كنت ضد التوكيل تماما فى صيانة الـ1000 و معاه تماما فى صيانة الـ10000

عموما انا شايف ان محدش يشارك بقى تانى لأن مفيش حاجة مفيدة هتتقال بعد كدة كل المهم اتقال خلاص واللى هيتقال بعد كدة كلام شد و انحياز للاراء و مش هيقدم ولا هيأخر و بالنسبة للاخ صاحب الموضوع هو فعلا شاف كتير كدة و ربنا معاه و يساعده فى قراره اياً كان هوا ايه !

واللى مش عاجبه التوكيل يتعامل برة و اللى عاجبه يتعامل معاه بسيطة يعنى
او يغير العربية بس يبقى يقولنا جاب ايه عشان نبقى نعرف التوكيل الهايل الجامد اللى فى مصر

المشاركة الأصلية كتبت بواسطة eslamkasem

انا نفسي اعرف حاجه وحده دا توكيل ولا محل ولا سوق خضار

حسبي الله ونعم الوكيل في دا توكيل

انا كرهت العربية كره بجد بسبب التوكيل الفاشل دا

مفيش في واحد بيفهم اصلا من بداية انسه فاطمه الي اتصلت بيا من اسبوع وقالتلي هوا حضرتك كنت حاجز تعديل علبة الدركسيون للعربية جين تو ؟قوتلها حضرتك انا عربيتي واجا قالتي اه سوري اقصد واجا عموما يا فندم التعديل وصل خالاص وتقدر تيجي في اي وقت يناسبك حجزت الحد الي هو النهارده وخدت اجازه بمعجزه من الشغل

للعلم دي رابع زيارة للتوكيل المبجل المحترم ودا بسبب صوت التزيق الي مخلني شاري عربية ب90 الف وبسمع صوت من اول الف مخلني حاسس اني راكب بطه او توكتك بيزيق بدون مبالغة

المهم انا شكيت في مصداقية حكاية ان التعديل وصل اتصلت امبارح اكدت علي الهانم الي حجزتلي قالتلي اه يا فندم تعاله بكره التعديل وصل قوتلها للواجا قالت اه قولت يا فرج الله اخيرا هخلص من الكابوس دا

رحت التوكيل النهارده زي منا كنت عامل موضوع الصبح لما كنت هناك http://www.nilemotors.net/nile/181773-a.html

المهم رحت وصلت 9.40 دقيقه لان الجو شبوره فظيعه المهم لقيت فعلا اسمي محجوز ودخلت علي الاستااذ الفاهم الواعي الخبره المخضرم الي متفوتش عليه اي حاجه الاستاذ محمد عبد الهادي قالي حضرتك حاجز تعديل علبة الدركسيون صح قوتله اه يا استاذ محمد في مشاكل تانيه الهم زكرت كذا مشكله علي الماشي كدا وبعدين من كتر فرحتي بالتغير سألت الاستاذ الواعي قوتله التعديل دا ازاي يا باشمهندس قعد يشرح بقي وبصراحه اتبسطت وقولت يااااااارب ارتاح وتتحل المشكله وقولت يا واد يا اسلام انتا كنت ظالم التوكيل ودي ناس كلمها زي السيف

المهم سلمت العربيه وخدت نسختي من امر التشغيل وفيه كلمة تعديل علبة دركسيون للواجا وقالي هتخلص الساعه 2 قولت ماشي

دخلت الاستراحه وفتحت النت ورغيت مع اصحابي

الساعه 12.30 قولت اشوف اخبار العربيه ورحت لحمد باشا قوتله ايه الاخبار ؟؟

قالي انا اسف مش انا اكتشفت ان مفيش حاجه اسمها تعديل علبة للواجا هيا بتتغير بس زي السجا لكن التعديل في الجين والبرسونا بس

قتولته نعم وانتا جاي تقولي الكلام دا دلوقت ؟قالي هو حضرتك الي حجزت التعديل دا قوتله لا والله انتو الي اتصلتو وقولتو قالي معلش بقي احنا مش هينفع نغير العلبة الا لو كانت بايظه ومبتوصلش زيت للعلبة نفسها احنا هنعمل ابزيم ونظبط العملية ومفيش اي صوت وهتطلع تجرب قوتله والله همشي وتاني يوم الصوت هيرجع حلف واقسم وبرقبتي وبرجلي وبعنيا لو حصل الصوت تاني


انا بصراحه اتصدمت وولدي كان معيا اتصدم وقالي منك لله انتا الي خلتني اشتري عربية توكلها ماشي بالبركه دول عالم .....

ولدي فكر يبع العربية وخلاص قررت اني مش هروح التوكيل تاني ابدا وهبيع العربية انا زهقت وبعت شكاوي لبرتون كير

كلامي الي فات كتير بس بجد مش قادر اعبر عن اي حاجه جويا من الي حصلت النهارده من غيظ وقرف وندم علي العربية دي

اسف اني طولت عليكم وعلي فكره بكره ان شاء الله هحط صورة امر التغشيل عشان الناس الي بتحب التوكيل وبتدافع عنو بكل استماته وبتعشق العربية وتكره اي كلمه عليها فعلا اقسم بالله العلي العظيم دي اسؤ عربية ركبتها في حياتي واكتر قرار خدته ونمدت عليه وحسبي الله في كل واحد شكر في العربية وقال كلام مش حقيقي عنها وقال ان علبة الدركسيون عيب فردي وهو عيب عن معظم الناس الي كلمتهم في التوكيل النهارده

انا مش هروح حماية المستهلك انا هبيع العربية وهجيب نيسان صني واسف اني طولت عليكم ويمكن اكون منفعل بس دا من الي حصلي بسبب العربية في ناس كتير هتهجمني بس هقولهم كلمه وحد حط نفسك مكاني لما تحس ان عربيتك لا تساوي قيمة ما دفع فيها

اه نسيت حاجه الصوت رجع وانا في نص الطريق

///////////معلش خليك ورا حقك ولما تاخدة بيع-------------- باالمناسبة قبل ما تشترى النيسان يا ريت تمر على قسم النيسان فى المنتدى وتقرا مشاركات الزملاء كويس---------انا شايفهم بيتكلموا عن مشاكل محددة ولكن دائمة ولم تحل وهى زيادة معدل استهلاك البنزين بشكل مبالغ فية وكذلك قسوة العفشة ---------- ومن مرورى على اقسام المنتدى الرئيسية اقترح على سيادتك المرور على قسم الميتسوبيشى فى اليابانى وقسم الbydفى الصينىوهاتان السياراتان فى نفس الفئة السعرية للصنى تقريبا