هل الإلنترا الجديدة واطية وبتخبط بكثرة فى المطبات

**alrabeh** · 17-03-2008 12:42 AM

ارجو الرد من ملاك الإلنترا
السيارة شكلها عاجبنى جدا و الكل بيشكر فى أدائها ولكن ............
صديقى معه الإلنترا من سنة وعاوز يبيعها بعد ما قلبه اتقطع عليها من كتر تخبيطها فى المطبات
هل ده عيب فى عربيته ولا العيب عيب شوارع وده فى كل العربيات الجديدة
الموضوع ده فارق معايا كتير خصوصا كده يبقى الواحد مش حيركب حد فى الكنبة
وتبقى الشنطة الواسعة مالهاش لازمة
ولا إيه رأيكم

**hshaqlouf** · 18-03-2008 10:37 AM

السلام عليكم
بص ياعم أنا لسه جايب العربيه من حوالى شهر و نص تقريبا و الحمد لله العربية زي الفل (تسارع, ثبات, باور أكثر من رائع وكمان الارتفاع عن الارض , و حاجات تانيه كتير)
اما بالنسبة للارتفاع عن الارض فأنا بأعتبرها من الفئة الاولى مثل الياريس و الكورولا وده كان من اهم الاسباب اللي خليتني أشتريها بس انت عارف احنا في مصر والمطبات يقوم عملها بشكل عشوائى وغير منظم والعربية ده زي أي عربية تانيه مهما كانت عالية بس لو مركب أتنين أو أكتر في الكنبه ممكن العربية تحك في المطبات العالية
وأخيرا ده رائيى المتواضع

حماده

**mido777** · 18-03-2008 10:47 AM

انا معايا العربية من حوالى 10 شهور والعربية ماشاء الله زى الفل

بس هيا فعلا واطيه وبتحك فى المطبات بس لم تكون الكنبة الخلفية فيها 3

لكن فى العاى مش بتحك فى المطبات

**alrabeh** · 18-03-2008 06:24 PM

شكرا لكم جميعا على الرد
ولكن الراجل اللى معاه العربية بيقوللى ان ساعات بتحك فى المطبات وهو راكب بمفرده وما فيش معاه حد
بصراحة انا خايف جدا احط فوق المائة الف جنيه وفى النهاية احس اننى حوقف العربية ومش حركبها غير فى الطرق السريعة

ارجو المزيد من التوضيح من حضراتكم ومن السادة الأفاضل باقى أعضاء المنتدى

**mhalawa** · 18-03-2008 08:18 PM

الفكرة مش أنها واطية..... الفكرة ان قاعدة العجلات تزيد عن 2.60 متر و بالتالى المطبات اللى مش عريضة و عالية ممكن تخبط لان المطب يكون فى منتصف السيارة أثناء أستقرار العجلات على الارض

**mido111** · 20-03-2008 06:02 PM

lw 5ayef awe mn el mattabat mmken te7awel ta5od el matab 3agala 3agala.

**elayat** · 21-03-2008 06:58 AM

بمناسبة المطبات على طريق سوهاج أسيوط الزراعى فى كام مطب كده والله لو عربية هامر هاتحك فيها والله بجد الصعايدة يستاهلوا النكت إللى بتطلع عليهم:d:d:d

**alrabeh** · 22-03-2008 01:16 AM

لما كلمت مبيعات غبور قالوا ان السبب الرئيسى فى موضوع الحك فى المطبات هو عدم ضبط هواء الإطارات
هل يمكن ان يكون هذا الكلام صحيح؟؟؟؟؟

**fahd_628** · 22-03-2008 02:35 AM

لما كلمت مبيعات غبور قالوا ان السبب الرئيسى فى موضوع الحك فى المطبات هو عدم ضبط هواء الإطارات
هل يمكن ان يكون هذا الكلام صحيح؟؟؟؟؟

صحيح بس مش وى يعنى يعنى لو الضغط اقل 2 - 3 مش حيحصل حاجة الا اذا كانت العجلة نايمة

انا رأى لو خايف قوى من المطبات و كدة هات حاجة 4x4 صغيرة زى الجراند فيتارا او التيريوس و سعر التيريوس مناسب

**alrabeh** · 22-03-2008 08:57 AM

شكرا اخى فهد على مداخلتك
انا عاوزاركب سيدان مش 4*4 خاصة ان صالون الإلنترا واسع ومريح جدا
شكل العربيات كده مافيهاش حاجة كاملة
كل عربية لها مميزات ولها عيوب
بس اللى نفسى اعرفه جيدا من ملاك الإلنترا هل هذا الموضوع ممكن يخليهم نادمين على شراؤها ويفكروا يبدلوها بحاجة تانية عالية ولا أداؤها وامكانياتها يعوضوا هذه الجزئية
على فكرة تسليم غبور قالولى فى خلال أسبوع.....
والغريب ان الموديل الوحيد اللى فيه جنوط هو الموديل اللى ب 121000 جنيه شئ غريب جدا