تسخين الشاهين

**eldeplomasy** · 17-03-2008 03:28 AM

انا الصبح لما بشغل الموتور بنتظر مثلا لحد الار بي ام يوصل ل800 لفة وبعدين ببدأ اتحرك

ولكن في الكتالوج مكتوب لازم استنى لحد ما توصل لدرجة حرارة 90 درجة فمش عارف انتظر ولا امشي ده اولا؟؟؟

ثانيا عندي احيانا كتير الار بي ام مبيرجعش لطبيعتة اللى هي 800 لفة خالص يعنى ممكن اوصل للمشوار اللى رحته وهو على بعد ساعة او اكتر والاقي الار بي ام لسه عند 1000 لفة او اقل شوية يعنى ما ينزلش لمستواه الطبيعي فهل دي ليه علاج؟؟؟

وهل ينفع الغيه خالص وهل بيتغير ولو بيتغير بيتغير كل قد ايه؟؟؟

وآسف للاطالة عليكوا وشكرا جزيلا

**فادى** · 17-03-2008 03:55 AM

مش لازم تستنى لحد ما الحرارة توصل ل90 درجة, دقيقة واحدة تسخين كافية جدا لجعل الزيت يصل الى درجة حرارة التشغيل و هنا يمكن التحرك بأمان و لكن الكفاءة هتبقى أقل شوية لحد ما المحرك يوصل لدرجة حرارته الطبيعية 90 و عشان كده الكتالوج كاتب انك متتحركش قبل ما الحرارة توصل ل90.
الفكرة انو البنزين بيتكثف على جدران المحرك البارد و الكفاءة بتقل عموما لأن المحرك يعمل بالحرارة فى الأساس.
و عشان كده بيقوم جهاز الحقن, عبر حساس حرارة بضخ المزيد من الوقود و فتح مجرى اضافى لدخول الهواء لتعويض الوقود المتكثف و حتى لا يتوقف المحرك , و لا يوجد طريقة لتعديل ذلك و لا داعى لتعديلها لأنها احدى مميزات نظام الحقن.
أما بالنسبة لموضوع الأربىام, فسوف تجد فى الكتاوج أن الأربى أم الطبيعى 850+- 50 على ما أذكر.
يعنى الأربى ام طبيعى يترواح بين 800 - 900 حسب ظروف التشغيل : الحرارة, الحمل على المحرك, و هتلاقى مثلا فى الشتاء انو الأربى ام مابين 850-900 فى الشتا, و فى الصبف ساعات بتوصل ل900, و ده طبيعى جدا, لكن لو الأربى ام أعلى من 900 و حرارة المحرك 90-95 يبقى فيه حاجة مش طبيعية.
و مادام انت بتقول انو أقل من 1000 لفة فده معناه انو 900 و لاحظ انو العداد ضيق, يعنى الفرق بين 1000 و 900 يكاد لا يلاحظ, و ده عدد اللفات الطبيعى حسب نوعية الوقود و حرارة المحرك و الحمل, و حتى حالة الهواء المحيط.

**eldeplomasy** · 17-03-2008 02:52 PM

شكرا جزيلا يا استاذ فادي على المعلومات الشيقة دي

بس كان عندي استفسار تاني وهو اني في الصيف لما بنزل واشغل العربية والموتور بارد بشغل المكيف على طول ففي ناس قالولي الموضوع ده غلط فايه راي حضرتك

مع العلم ان بعملها من ساعة ما جبت العربية ومفيش حاجه حصلت

وشكرا جزيلا

**فادى** · 17-03-2008 05:00 PM

"شكرا جزيلا يا استاذ فادي على المعلومات الشيقة دي

بس كان عندي استفسار تاني وهو اني في الصيف لما بنزل واشغل العربية والموتور بارد بشغل المكيف على طول ففي ناس قالولي الموضوع ده غلط فايه راي حضرتك

مع العلم ان بعملها من ساعة ما جبت العربية ومفيش حاجه حصلت

وشكرا جزيلا"

بص هو من الأفضل عدم التحميل على المحرك و هو بارد, لأن كفاءته بتبقى أقل, و الزيت لسه مسخنش و مخدش خواص التزييت كاملة, عشان كده بنفضل منحملش على المحرك و هو لسه بارد سواء عبر تشغيل التكييف أو تحريك السيارة.
يعنى من الأفضل تستنى دقيقة و بعدين تشغل التكييف. مش هيحصل حاجة و معظم الناس بتشغل التكييف أول ما بتركب العربية, بس يفضل تشغيله بعد فترة نصف دقيقة الى دقيقة, يعنى تحافظ على المحرك و يعيش معاك فترة أطول, لكن مفيش اى أضرار وقتية.

**eldeplomasy** · 18-03-2008 03:15 AM

طيب انا عايز اخد رايكوا لان الميكانيكي زهقني كل ما يشفني يقلي تعالى اشيلك الثرموستات اللى بيقفل مبيدخلش ميه على الموتور علشان يسخن اسرع بيقلي لما يتشال الموتور يعيش اكتر لان السخونة على العربية وحشه وبيقلي هي هتطول بس في الاول شوية على ما تسخن فمش عارف اشيلها ولا اخليها وشكرا

**fahd_628** · 18-03-2008 03:18 AM

انا رأى تخلى الثرموستات لأن لو خليت درجة الحرارة واطية المحرك مش حيعمل بكفائة 100 % كفائتة حتقل شوية

بالنسبة للتسخين انت مش لازم تستنى كل دة انت ممكن تسخن نصف دقيقة او دقيقة و بعدين تمشى بس على مهلك بالراحة فى الأول لغالية ما درجة الحرارة توصل للطبيعى و بعدين امشى زى ما انت عاوز

**eldeplomasy** · 18-03-2008 03:30 AM

يعنى انفض للميكانيكي الزبالة ده وشكرا جزيلا

**fahd_628** · 18-03-2008 03:32 AM

استنى برضة اراء الناس التانية احسن

**فادى** · 19-03-2008 01:57 AM

"طيب انا عايز اخد رايكوا لان الميكانيكي زهقني كل ما يشفني يقلي تعالى اشيلك الثرموستات اللى بيقفل مبيدخلش ميه على الموتور علشان يسخن اسرع بيقلي لما يتشال الموتور يعيش اكتر لان السخونة على العربية وحشه وبيقلي هي هتطول بس في الاول شوية على ما تسخن فمش عارف اشيلها ولا اخليها وشكرا"

بص ثرموستات التسخين مصمم أصلا للبلاد الباردة, و مش مفيد أوى فى مصر و البلاد الحارة عموما, و لكن ليست له أضرار, و لما بيعمل مشكلة جرت العادة انو الميكانيكية يشيلوه لأنه ملوش فائدة حقيقية هنا فى مصر, بس متشيلوش لأنه ملوش أى ضرر على المحرك, السخونة الزائدة عن 92-95 عندك هى الى ليها ضرر على المحرك.
و فيه ميكانيكية بيشيلو الثرموستات الأصلى بتاع الشاهين(ثرموستات المروحة) اى بيشتغل عند 92, و بيحطوا ثرموستات 82, و ده غلط لأنه بيقلل كفاءه المحرك, عموما مادامت السيارة مبتسخنش عن الحد المسموح بيه (فى الشاهين عندك النقطة الى بين ال90 و ال130) فلا خطر على المحرك.
و لاحظ انو مع تشغيل الأنوار مؤشر الأمبير بيزيد زيادة بسيطة جدا, ده طبيعى و لا تجعله يقلقك.

**فادى** · 19-03-2008 02:49 PM

و لازم تاخد بالك من حاجة مهمة, ثرموستات التسخين(بالبلدى ثرموستات الكوع) مهم جدا فى البلاد الباردة للأسباب التالية:
- عند ادارة المحرك, يكون الفرق بين درجة حرارة المياه و درجة حرارة المحرك كبيرا, لذا ليس من المفيد ترك المياه تتدفق الى المحرك بل يجب اغلاق دائرة المياه, حتى لا يؤدى فرق الحرارة الى الضغط على المحرك و لكنها لن تصل الى درجة كسره.
- يحافظ الثرموستات على درجة حرارة المحرك المثالية لضمان أفضل أداء, لأنه فى البلاد الباردة قد تقل الحرارة أثناء السير بالسيارة عن الحرارة المثالية (92 درجة), و يقل معها أداء السيارة لذا نعمد الى اغلاق دورة مياه التبريد حتى يعود الى حرارته الأصلية.
كل هذه التطبيقات لا تفيدنا كثيرا فى بلادنا الحارة, و لكنها تفيد فى تسخين المحرك بشكل أسرع فى الصباح.لذا من الأفضل ألا تستغنى عنه الا لو تسبب فى مشكلة, و مادمت تستخدم الماء المخصص لدورة التبريد(مياه خضرا) , فلا تقلق منه و لكن حاول ان تبتعد عن استخدام المياه العادية فى التبريد لأنها تؤثر عليه.