الموضوع: سكودا فليشيا انا هاولع في نفسي و في العربيه بسبب الحراره

المشاركة الأصلية كتبت بواسطة koko2002

الحل الجذري والأكيد والله مش حتعمل حاجة تاني هو إنك تغير المروحة لأن المروحة الأصلي بتاعتها مش بتغطي إلا ربع الريداتير فقط أنا مرة رحت لواحد كهربائي وعرضت عليه المشكلة بعد أن صرفت أكثر من 4000 جنيه على كل الحبشتكانات المعروفة وكان عنده في الورشة مروحة قذرة كده مرمية على الأرض لكن حجمها كبير يعني مغطي الريداتير عندي بالكامل وقللي حنجرب نركبها ونطلع على الصحراوي وفعلا من ساعتها الحرارة معدتش 90 بس مع التكييف ممكن تكون 91 أو 92 بالكتير ومع السرعات العالية - جرب الحل ده صدقني مش حتندم وابقى طمني على النتيجة وربنا يوفقكك

ممكن يا باشا تقولي المروحه دي بتاعة عربيه ايه و عاوز ادي لحضرتك معلومه المروحة الي راكبه 6 ريشه بقميص و في مروحه تانيه للسربنتينه من اودام و لا اجيب مروحة سرعتين اصلي بتاعة فليشيا

المشاركة الأصلية كتبت بواسطة scaniax

السلام عليكم ورحمة الله و بركاته
سخونة الفيلشيا دى اسهل حاجة فى الدنيا ممكن تتحل بصابع رجلك الشمال طول ما دورة التبريد اللى راكبة هى الاصلى يعنى من غير ما نركب ردياتير ماركة ام حسن او مروحة ام اربعة و اربعين
باختصار
1 العربيه لما تغير وش السلندر لازم الميكانيكى يركب جوانين و يتأكد انه حط سيليكون كفايه و يربط مسامير الوش قوى علشان يضمن ان مفيش هوا هيدخل الماكينة و بعد اسبوعين ترجع تانى للميكانيكى يربط عليهم تانى جامد و تبقى دى اخر مرة و خلصنا من وش السلندر .

2 الوصلة اللى خارجة من الموتور فى دورة التبريد فيها ثيرموستات داخليه خلى الميكانيكى يفكها و يتأكد انها سليمة ( الثيرموستات دى غير بتاعة الردياتير ) غالبا الثيرموثتات دى شغلها انها بتقفل دورة التبريد لما بتكون العربيه بارده فى الشتا مثلا علشان العربيه تسخن معاك بسرعة و مع الزمن بيتكون عليها املاح و بتحتاج تتحط فى ميه نار او تتنضف شوية او تتغير و اللى احسن من كده انك تشيلها خالص و تقفل الوصلة من غير ثيرموستات داخلية بس خد بالك ابقى سخن 5 دقايق زياده فى الشتا .

3 لو انت يا حلو اخدت خبطة فى فارغة الفيتيس و العربيه بتجيب زيت من تحت يبقى الماكينة بتاعتك بتاخد هوا و ده كمان يسخن العربيه مووووت و يعملها حالة هبل فى الجبل اه و الفارغة دى اغلى حاجة فى العربيه ب 750 جنيه و انت و شطارتك فى الحرفيين .

4 لو انت فاكر انك راكب بى ام و محمل العربيه كهربا كبيرا قوى و حاطط جى ام و زيرو باور و زينون الاسكودا ما تستحملش ضغط الكهربا العالى الا اذا عليت كهربة الموتور و ظبطت ضغط هوا الماكنة غير كده تسخن .

5 لو اخدت خبطة قدام فى الوصلة المعدن اللى خارجة من الردياتير و داخلة الماكينة و دى غالبا لما بتتخرم بتتخرم خرم رفييييع خالص و تعرفها بسفنجة فيها شوية بيريل تنزل الرغاوى على الماسورة و العربيه دايرة لو عملت فقاقيع يبقى الماسورة مخرومة و دى تمنها 50 جنيه .

6 بالنسبة لمروحة الردياتير لو مالقيتش بتاعة الفيليشيا اجرى على او واحد بتاع قطع غيار 128 و هات مروحة 128 على فكرة هى هى و مفيش اختلاف خالص و على ضمانتى انا كنت ماسكهم الاتنين و هما جنب بعض و مش لاقى اى فرق وعلى فكرة هى اوفر و امتن من الاصلى و زى ما قولت نفس الاداء .

خد بالك لازم تروح لميكانيكى كويس فى تظبيط الكهربا علشان عليها عامل كبير
اخوكم فى الله
احمد سمير

السيد احمد
معلش سؤالين
1- انا مغير وش السلندر بس جايب و احد اوريجنال من ارتوك نفسها التوكيل و مركب جوان اصلي من التوكيل هل لو وش السلندر جديد زيرو يعني اركب جوانين ليه
2 - فارغة الفتيس فعلا بترشح زيت بس خفيف جدا و بزوده كل سنه مره ايه علاقه فارغة الفتيس بالموتور مع ما هو الاتنين منفصلين من جوا مع العلم ان الفتيس كله مستعمل ب 700 جنيه