الموضوع: ايه هي مميزات و عيوب الريجاتا ؟

لا يا باشا انا رايى تشتريها و تركنها شوية تكون جمعتلك على ال3000 دول شوية كمان قدهم و تعمل حسابك فى باكو زيادة
يعنى ميزانية 6000 و تخلى 500 جنيه تحت ايدك ليه بقى
علشان تعمل سمكرة كويسة و برضو الراجل يكون صنايعى شديد و نضيف علشان يظبطتها ظبطتة تمام هيتكلم معاك فى مصنعية او شايفك مهندس بقى و هيعمل عليك شغل هيتكلم فى 1500
انت تنزل معاه على قد ما تقدر و تركبله الوش الخشب و تعرفة انك فاهم و تتابع معاه و كل يوم تنطله فوق دماغه و تنزل المصنعية معاه لحد 700 هتلاقيه اتنطنط و اتشقلب تبتدى تطلع انت واحدة واحدة معاه 800 و متزودش عن 900 طبعا ده يرجع لحالة العربية لو فيها سمكرة كتير طبعا هتعد معاك اما لو فى الخفيف يبقى ده تمامها
تستلم منها فى قفل البيبان ميكونش فيها عصرة
تستلم فى الشنطة تكون مسطرة و الكبوت مظبوط مش ملوح و مبين طروف الرفرف
تستلم منه الفوانيس الورانية يظبط مكانها صح و يظبط قفلة الشنطة عليهم بالملى
تستلم منه بقى العربية بقى متكونش فى حتة عالية ولا منفخة من تحتها و الحته العالية المنفخة تخليه يعملها بالصاروخ لانك هتلاقى تحتها معجون و فاضى ده علشان تعمل شغل نضيف يا باشا مش اكتر
خلاص انت استلمت تجيب بتاع الدوكو هوة كمان يستلم بقى
عينك مش زى عينة لو فى مرمة ولا حاجة بتاع الدوكو يقوله اظبط دى اعمل دى كده
تتفق مع بتاع الدوكو هوة كمان قبل كل شئ مصنعية كام و تنزل معاه و هوة بيجيب الخامات يا باشا متسيبوش ينزل يشترى خامات لوحدة
و نصيحة كده من اخ صغير ليك:- لما تشترى الخامات هات بوية مصرى و ورنيش مصرى
ليه بقى علشان لا قدر الله لو خربوش من الناس المؤذية اللى بنشوفهم متزعلش اوى تبقى هينة عليك
و المصرى النضيف حلو و الورنيش المصرى التمام اوميجا 3003
ده تمام و حلو و لمعته كويسة
مع الدوكو بقى احسنلك تبات عنده مش كل يوم تمشى و تجيله لا بات عنده
لانه ساعات بيكون شغال فى كذا عربية مع بعض فبيكروت و تقوله انا مش عاوز معجون كتير تخليه يصفى المعجون كويس علشان تحس بالعربية
و تخليه يقفل كويس قبل ما يرش سواء هيدى بطانة ولا ساعات الكابينة
قاعدة عامة بقى :-
فى التعامل مع الاتنين انا مسلمك العربية كذا اخدها منك امتى
علشان ميمطوحكش بعد المعاد تقولة انت الوقت ده هيناسبك تمام
هيرد طبعا و يقولك اه
تقوله تمام معاد يوم كذا كل يوم بعد تاخير ب20 او 50 جنيه من المصنعية تمام
للاتنين مش واحد بس علشان مياخروش المعاد و انت كده كده هتبقى لازقلهم
و حسسهم بانك فاهم كويس هتلاقى نتيجة حلوة انت شايف شغل قدامك و عارف انت بتعمل ايه و ربطتهم بحكاية التنقيص من المصنعية على التاخير
لما تيجى تحاسب السمكرى بقى
طالما مش هيشترى حاجة فالعربية زى دعامات سقف يعنى هيفصل صاج و قال هيشترى طالما مش هيشترى حاجة
تديله اقل من نص المصنعية فى الاول و لما يخلص العربية تديلة 200 جنيه كمان و تربط على كده متدفعش جنيه زيادة و تتفق معاه فى الاول على كده
و برضو الدوكو كده تدية جزء مش كبير تمام
هيقولك الخامات و بتاع انزل معاه و هاتها انت
بعدها لما يخلص شوية قبل البطانة او لما يخلص المعجون و التصفية
تديلة 100 و لما تطلع معاه الكابينة و يرش و تنزل و تمام تديلة الباقى و تخلى 200 جنية من باقيت حسابه مياخدهومش
طبعا العربية خلصت هترجع للسمكرى علشان يربط الاكصدامات و يظبط المرايات كاوتش باب اى بتنجان يظهرلك تبع السمكرى بعد ما العربية تتعمل يربط المرايات و يظبط و كله تمام تديلة بقيه حسابة و تروح للدوكو يرش الاكصدامات و يلمع العربية عدل و عدل اوى كمان و يرش الاكصدامات و يخدمها حلو باكتات الباب من برا هتلزق مستريك ولا حاجة لذيذة على الشنطة من ورا صغيرة كده اى حاجة تبعه يعملها و تمرمطه فيها و يخلص تديله الباقى بقى و شكرا
دى نصيحة واحد اتمرمط و شاف كتير من الصنايعية

يا بشمهندس انا مغلطتش لما قولت اخوك الصغير انا 21 سنة فقط لا غير
بص انا هتكلم معاك فى كل حاجة الا الموتور علشان ده شغلانة و كل حاجة و على حسب حالتها لكن مش نقص معلومة ولا انى ببخل بيها
بص الصالون :- تابلوه الريجاتا ضعيف جدا و سعرة حوالى 950 جنيه استيراد بس حالة كويسة جدا
فلو التابلوه عندك سليم سيبة زى ما هوة متلعبش فيه و شوف انت محتاج فيه ايه و انا ابقى اقولك تعملها ازاى لانه ضعيف و حساس حبتين لو مسمار اتفك غلك مبيركبش تانى
الصالون من جوا سروجى كويس بس هيظبطلك الحكاية كلها و طالما انت بتشد بقى ادى الارضية من تحت خالص من من جوا الصالون لا من برا من تحت المواجهه للارض مادة اسمها بوتومين مادة سودا كده بس تمام
علشان الشتا بقى دى زى عازل علشان مفيش باروما تيجى فى الارضية من تحت تمام
تخلى السروجى يفك الكراسى بالكنبة مسمار عشرة الخنيقة اللى ورا دى و يفضيلك الصالون المهم لو كسر باكته من بتوع الباب من جوا تموته
كماليات الريجاتا عزيزة اوى عليها لكن قطع غيار سهل جدا
تخليه يعمل كسوة بلاستيك (مشمع) على الباب كده و يروق و يفك الموكيت بتاع الارضية و حضرتك تغسلة او تودية مغسلة بس انا بفضل اغسلة بنفسى و بايدى مش عيب لانها عربيتى و بعدين علشان ينضفن الموكيت ده بيشيل بلاوى
و الكراسى بقى ينجدها كده و ميعليهاش اوى علشان متحسش انك راكب جمل و الكنبة بقى يقفلها عدل و تخليه يشوف مكان المسمارين بتوعها لو مكسورين خده و روح لحداد و خليه يلحمة و الكراسى برضو لو حاجة مكسورة تتلحم طبعا السمكرى و الدوكو شغالين انت كل ده بتكسب وقت تمام
الكهربا بقى انا كنت كاتب انى عملت حادثة و الفانوس الورانى طار تكلفته الاجمالية بالوش بتاعه 235 جنيه
اما الفوانيس اللى قدام دى مش هقولك سعرها علشان متتخضش لان انا نوفا فالفوانيس فيها فريم نيكل كده فبسمع فيهم ارقام فلكية
انا بجيبهم بسعر مريح و مستوردين جداد
و تشوف بقى التوصيلات بتاعت الكهربا و يكون كهربائى نضيف الله يخليك علشان فى ناس بتفضل تعمل كبارى و انفاق جوا لحد ما تلاقى اختناق مرورى فى عربيتك من كتر التوصيلات الغلط بلاقى حاجات تعصب و الله فكهربائى نضيف هيظبط الدنيا و يلمع الفوانيس و يغسلها و يلفلك كهربا العربية كلها صح
مفتكرش ان الكهربا فيها مشكلة يعنى
العفشة بقى
بص انا بجيب كبالن استيراد و زى الفل ماشيين تمام اما المساعدين فانا زى ما قولت قبل كده لسه مغيرتهومش بس انا بجيب استيراد عامة و بتعامل مع واحد مش من القاهرة اصلا تعامل ثقة و هوة راجل محترم
فبظبط من هناك المقصات بس هى اللى جيبتها جديدة بس مش فاكر نوعها تركى ولا ايه تقريبا حاجة زى كده
و بعدين العفشة دور هنا فى المنتدى على موضوع اسمه اى حد معاه ريجاتا و حابب يعدلها او يظبطتها و شوف العفشة فيه دى محمد عاملها استاذ محمد ممدوح راجل فاهم بجد و عن تجربة شوف هوة متكلم ازاى على العفشة و هوة عاملها و بيقولى تمام يعنى
انا كده قولتلك كل حاجة الا عن المكنة او الماتور لان رايى لو هتعمل عمرة يبقى قبل الفيلم الهندى ده كله علشان متتجرحش ولا شحم على البوية و شغلانة
العمرة دى مصاريف شد تانية لوحدها يا باشا انا العمرة بتاعتى كلفتنى 3500 تقريبا بشوية الفكة و الشغل ده قفلت 4000 الا 100
فشوف لو فى حاجة تانى عاوزها انا تحت امرك

بص يا باشا اول حاجة صوت المكنة و تكبس سنة بنزين حلوة كده و تسمع فى صوت ترزيع ولا تنقير فالمكنة كده لو صوت تنقير طقم شنبر عدل
تانى حاجة العمة بتاعت العربية فيها خرطوم رفيع من ناحية الوش كده شوفة هوة اصلا خالعة ولا مركبه
لو مركبة اخلعه انت و حط صوباعك فى الفتحة بتاعت العمة و الخرطوم و شوف هتطلع مهببة ولا عادية و شوفها بتعرق زيت ولا لا يعنى فى دخان اسود مزيت كده مطرح البتاعه دى
تشوف شكل الموتور نفسة كده فى مواتير بيبان على شكلها النضافة و يا سلام لو تاخد معاك مفتاح بوجيهات و تفك بوجيه كده و تشوف مطرحة مهبب ولا فيه زيت لو بيجيب زيت يبقى الموتور خفيف طبعا انت كل ده بطلع عين ام الراجل و انت بتقلب فى العربية و افتكر انى قولتلك تبص على العربية ازاى
خلاص بقى خلصت تقوم واخد الرجل صاحب العربية و فى بنزينة فى مدينة نصر لما تاخد الاوتستراد فى بنزينة قدام كده على اليمين المهم ان البنزينة دى بتقيس كبس الموتور
تقيس الكبس بتاع الموتور و تشوفه هيطلع كام عامة 79 او 80 بتبقى مكنة معقولة تمشى بيها شوية حلوين و بتعمر بعدها لان المكنة التمام اقصى كبس ممكن تجيبة 85 مسمعتش عن مكنه عدت لكن لو لاقيت الكبس فى الضياع و حالة العربية متوسطة قوله شكرا و اتحجج بالكبس و الحالة العامة و حاول تنزل فالسعر لو الحالة العامة مش سيئة اوى او لو الاساسات سليمة و شغلها كله صاج يعنى تنزل معاه جامد قوله انا هعمر و بتاع و اللى هتنزله مصلحة ليك
لو مرضيش انت الكسبان و فى الحالتين انت الكسبان يا هتاخدها بسعر كويس يريحك و يخليك تشد صح و تعمر كمان يا مش هتاخدها و توجع قلبك و كده كده انت فى السليم انا كانت قدامى ريجاتا و الله حلوة لو اعرف كنت قولتلك بس انت كنت كاتب ان قدامك شوية و بعدين لو ملقتش عربيتى هدية يا باشا متغلاش

المشاركة الأصلية كتبت بواسطة eng_ahmed_90

شكرا يا ابوحميد بما انك اخويا الصغير
و لما اجيب العربيه ان شاء الله تعالي
هخليك تتابع معايا اثناء شد العربيه تمام
سؤال اخير يا ريس عن المحرك
و انا بشتري اعرف ازاي ان المكنه كويسه ؟
اصل عندنا شويه بصمجيه مش صنايعيه
فلازم ابقي عارف برضه الدنيا ماشيه ازاي

اجى فين يا هندسة اجى بور سعيد ياراجل حرام عليك انا فاكرك قريب هنا ده انت طلعت مشوار هههههههههههههههه على العموم معاك من هنا حلو اوى :b4_033:

اه عمه فلتر الهوا بيبقى فيها خرطوم كده
هوة ده اللى انا بتكلم عليه و عموما انا معاك لو فى اى حاجة و يارب اكون عرفت اقول حاجة تفيدك