سوست ورق خلفى

**khaled_sabry** · 25-09-2010 10:58 PM

السلام عليكم و رحمه الله و بركاته
الحكايه ان عربيتي ( كورولا 1978 ) على سوست لى من قدام وورا على سوست ورق (زى العربيات البولونيز و اللادا و 125)
كنت ملاحظ من اول لما اشتريتها انها على اى مطب بتبقى ناشفه اوى ... يعنى العربيه بتطلع المطب و بعد المطب بتتهبد كلها من غير ما السوست دى تضغط لو ماكنشى حد راكب معايا ... كمان كانت عاليه و شكلها غلس من ورا
سألت اصحابى قالولى الموضوع عادى مع السوست الورق بتبقى ناشفه كده و لو الموضوع ده مدايقك شيل منها ورقه
المهم روحت لحداد سوست الناهرده الصبح بصلى عليها و قالى ان العربيه فى الوضع الفابريكه بتبقى محمله على ورقه واحده فى الاول و كام ورقه تحتها
اللى عندى بقى ان المالك الاصلى للعربيه كان حاطط ورقتين فى الاول (يعنى مزود ورقه زياده ) و باقيه الورق تحته زى ماهو

فخليته يشيلى الورقه الزياده دى و بالفعل العربيه بقيت فى مستوى واحد ورا و قدام و بقيت حنينه شويه فى المطبات وهى مش محمله و ثباتها زاد شويه

اللى انا خايف منه دلوقتى .. ان وزن العربيه على ورقه واحده ... فهل ده فيه خطوره لو لاقدر الله اتكسرت الورقه دى ( فى حالة لو كنت محمل ناس ورا وكلت مطب مثلا ) هل ساعتها حقدر اتحرك بالعربيه اصلا ؟؟
وهل لو اتكسرت الورقه دى حيبقى فيه خطوره على الصلايب و الكرونه مثلا ( عربتي دفع خلفى )
وهل اللى عملته غلط و لا لاء ... و هل الافضل انى ابدل السوسته التانيه بواحده اخرى طويله بحيث تبقى شايله العربيه مع الاولى ؟؟؟
و اسف على الاطاله
على العموم شكل العربيه اهه علشان تبقو متخلين الوضع
[aldl]http://www.mautofied.com/adphotos/10087160_200773018971.JPG[/aldl]

**khaled_sabry** · 26-09-2010 10:18 AM

انا جبت صوره علشان اقدر اشرح عليها سؤالى

اسئلتى كانت ... فى السابق كان فيه ورقه اضافيه بنفس طول الورقه رقم 1 و ده كان مسبب عدم اتزان للعربيه و علوها من الخلف
والورقه رقم 2 اصغر من الورقه رقم 1 ( حوالى 70 % من طولها)
دلوقتى انا شيلت الورقه الاضافيه دى ... هل حيبقى فيه خطوره لو الورقه رقم 1 دى اتكسرت لأن عليها الحمل الرئيسى
هل من الافضل استبدال الورقه رقم 2 باخرى لها نفس طول الورقه رقم 1 (لحماية رقم 1 من الكسر المفاجئ ) و هل ده حيرجل العربيه زى الاول ( مرتفعه من الخلف و عدم ثبات و نشوفيه جامده فى المطبات )

**khaled_sabry** · 27-09-2010 08:24 AM

السوست الورق ما انقرضتشى !!
لسه فيه عربات جديده بتطلع بيها زى اللادا و الماروتى و التيوتا افانز ... يعنى انا مش بسأل فى حاجه من ايام الفراعنه
ماحدش جرب ان الورقه الاولى تنكسر منه وهو ماشى ؟؟

**i_Am_Legend** · 28-09-2010 11:10 PM

انا مرة شفت عربي28_ تاكسى_اخد مطب مدور قوى وواسع جدا_العربية سوستها اتقطمت من النص_العربية وطيت قوى_والمساعدين_والمقصات_هى اللى شايلاها_الراجل روح بيها عادى جدا.

**i_Am_Legend** · 28-09-2010 11:14 PM

وللعلم_انا أى عربية بشتريها لازم_اروح أوطيها فورا_عن طريق الدق على السوست_وفردها_لازم_دة بيزود الثبات جدا_وبيخليها زى البطة المستريحة.

**khaled_sabry** · 29-09-2010 08:07 AM

المشاركة الأصلية كتبت بواسطة i_Am_Legend

انا مرة شفت عربي28_ تاكسى_اخد مطب مدور قوى وواسع جدا_العربية سوستها اتقطمت من النص_العربية وطيت قوى_والمساعدين_والمقصات_هى اللى شايلاها_الراجل روح بيها عادى جدا.

ال 28 سوستها كوبايه
انا سوستى ورق و كان سؤالى عن السوست الورق دى لما تنكسر من الاطراف

على العموم انا رجعت تانى عند الراجل و قولتله ركبلى الورقه اللى شلتها دى بس وطيلى العربيه
هو ركبها ووطاها ... بس بصراحه مش بنفس العلو اللى كانت بيه قبل السوسته دى

يعنى لما كانت العربيه من غير الورقه دى كان احسن ... بس اللى انا فيه اامن

**i_Am_Legend** · 29-09-2010 02:05 PM

يا باشا 128_سوست ورق خلفية_الكوباية قدام.

**khaled_sabry** · 29-09-2010 02:20 PM

المشاركة الأصلية كتبت بواسطة i_Am_Legend

يا باشا 128_سوست ورق خلفية_الكوباية قدام.

منكم نستفيد

يا باشا
على العموم انا قولت اخد بالاحوط و ارجع الورقه دى تانى ... مع توطيه العربيه من ورا علشان الثبات فى السفر
بس رجعت تانى العفشه ناشفه كأنى راكب عربيه ربع نقل