الموضوع: هتشارك ولا هتقاطع ؟؟

من اسبوع كدا.. اتصال على البيت رديت لقيت واحده بتقولى احنا عايزين نتكلم مع حضرتك على الانتخابات.. قلت ماشى قالت ليك بطاقه انتخابيه وعارف مركزك الانتخابى قولت اه... طيب حضرتك عارف المرشحين..اه... طب هترشح مين
هنا بدات احس ان دا مكتب مرشح ولا حاجه عايز يشوف النظام قولتلها انتى بتتكلمى بالنيابه عن مين قالت شركه مستقله يا فندم قولتلها يعنى ايه قالت تانى شركه مستقله زى مايكون حد محفظهالها قولتلها عموما انا ما بنتخبش قالت طب حد عندكم مهتم قولتلها مش عايز اضيع وقتك محدش عندنا هينتخب وسلام سلام....
وفعلا انا مش هنتخب والاسباب معروفه.

المشاركة الأصلية كتبت بواسطة aly_hosny

انا اؤيد معظم ال حضرتك قولتله
الا اني من البداية كنت مع المشاركة
يعني احنا منبقاش مقصرين والتقصير كله يبقى على ال بيزور ويغش
انما انت لما متنزلش ما هو لا هيزور ولا هيغش وهيبقى عمل ال عليه

بس انا بصراحة شايف ان الحزب الوطني حتى لو مزورش هينجح لسبب انك لو نزلت دواير كتيير هتلاقي الحزب منزل ال الناس عايزاه
دايرة منوف مثلا الحزب منزل احمد عز وانا للاسف الشديد كليتي في منوف
خلي واحد هناك يجيب سيرته بكلمة بطالة الناس كلها هتقوم عليه لانه عملهم البحر طحينه
بيحبوه ومقتنعين بيه جدا
عندنا في بنها اهالي بنها كلهااااااااااااااا ايدت الراجل ال الحزب بيفكر يرشحه عشان هو شخصية محبوبة يعني الحزب لو رشحه هيكسب من غير تزوير

المحتمل ان الحزب يلجا في التزوير في الدواير ال مش لاقي حد ينزلو فيها ودا عشان ميحصلش زي المرة ال فاتت ويبقى فيه نسبه حتى لو بسيطة من الاخوان والمعارضة

أكيد فيه دوائر الحزب الوطني مسيطر فيها .. لكنهم يتعدوا على الصوابع

وفي الغالب بيكون النائب شاري الأصوات ، ده حتى عبد السلام محجوب الي المفروض إنه محبوب .. عمل احتفال في العيد ووزع تلاجات وبوتاجازات ؟؟!!

للأسف بعض فئات المصريين البسطاء أقصى طموحه 50 جنيه أو وجبة غداء ، ومتفرقش معاه مجلس شعب من مجلس أمة ، أهم حاجة لقمة العيش وخلاص ، وللأسف هوا ده الي بيخلي ناس زي دول يطلعوا

المشاركة الأصلية كتبت بواسطة factorialx

هقاطع لإن للأسف الوفد و الإخوان فوتوا فرصه كبيره و هي عدم إعطاء شرعية للبرلمان المزور القادم

لأن كده كده الإنتخابات هتتزور

فهقاطع

و مشاركة الوفد تعزز صورة حصول صفقة مقاعد برلمانيه كما حدث مع الإخوان في الإنتخابات السابقه

فيه مقولة إنجليزية شفتها في تعليق على موقع الدستور .. معلش هيا ممكن تكون فظة شوية لكن معناها كبير
"إذا تعرضت للاغتصاب فاسترخى و استمتع"

أنا شايف إن المقاطعة هيا تطبيق لهذا المثل ، لازم أفوت أي فرصة على الحزب إنه يظبط الانتخابات على مزاجه ، هو غالباً هيعمل الي هوا عايزه في الآخر بس العيار الي ميصيبش يدوش

ويا ريت لو حضرتك عندك مصادر على صفقة الإخوان في الانتخابات السابقة

تقبل تحياتي واحترامي

المشاركة الأصلية كتبت بواسطة tlrsiap

هي في كل الأحوال هاتتطبخ للأسف

لو قاطعنا فهو محضر معارضته المستأنسة
و لو ما قاطعناش فالتزوير هايشتغل

هوا كده كده هيبقى فيه تزوير ، بس لما يبقى قدام ناس كتير .. أكيد الوضع هيختلف شوية

مش زي انتخابات الشورى الي فاتت (كانت أول انتخابات بعد إلغاء الإشراف القضائي) .. والله المرشحين بتوع الحزب كانوا عاملين زفة للصناديق وعاملين يقولوا "الصحافة فين .. التـ........ أهو" فيه بجاحة أكتر من كده ؟؟!

لازم في الانتخابات دي يلاقوا حد يقفلهم !

المشاركة الأصلية كتبت بواسطة baskota

كان نفسى اشارك بس للأسف يوم مارحت اعمل البطاقة الانتخابية
كان يوم مبارة مصر فى النهائى لقيت القسم خلص الفترة الصباحية
وقالولى تعالى بالليل
وبما ان القم الى انا تابعة ليه فى مكان شبه هادى جدا مروحتش بالليل طبعا
وكمن عاشن كنت بتفرج عالمبارة :-)
خليها لانتخابات الرئاسة بقا

فيه إشاعة اليومين دول إن الانتخابات ممكن تكون بالرقم القومي .. يا رب تكون صح

وبعدين انتخابات الرياسة مش محتاجة بطاقة انتخابية .. كلنا بايعناه واخترناه :b4_282:

المشاركة الأصلية كتبت بواسطة khaled_nowaihy

الانتخابات للأسف بتتعمل تحصيل حاصل
طبخة محبوكة بيقعدوا يجهزوها وبيعتمدوا على الأغلبية الكاسحة من الجهلة والفقراء + البلطجية يدعمهم الانتهازيين والمتسلقين من المثقفين
بلا غم

هوا ده الواقع فعلاً

بس لما الناس المثقفة وفاهمة تكبر دماغها وتسكت .. يبقى مين الي هيغير البلد ؟؟

لازم نضحي براحتنا ونتبهدل شوية في سبيل حياة أفضل .. لو مش عشانا يبقى عشان ولادنا

المشاركة الأصلية كتبت بواسطة mrwho1982

نفس الحالة اللي انا فيها

حتي في البيت كنت متابع اول باول قناة الجزيرة وكنت مشغلها علطول

يس دلوقتي بقيت مشغل قناة القران بتاعة مشاري او national geographic

وخراب يادنيا عمار يا دماغي وبضحك وعايش الحياة لاني هاعيشها مرة واحدة ومش طالبة عكننة

وانا بردو بتحصلي الكابة دي لما بفتح موقع مصراوي كل يوم نصيبة جديدة نفسي في يوم افتح الاقي حاجة عدلة الواحد نفسه اتسدت داخليا وخارجيا
انا سمعت من ناس في ايطاليا ان لما حسني مبارك بيجي السفارة بتتصل بالناس عشان يجو يمسكو شوية يفت ويعملو اي منظر وبيدوهم فلوس حاجة تكسف السفارة تقريبا الوحيدة اللي لما تخشها اكنك داخل حمام
تتخيلو ان الموظفين في السفارة مابيتكلموش لغة البلد ازاي معرفش واصلا عشان تروح تعمل اي حاجة ليها تسعيرة بجد حاجة لا تطاق ولا جوه ولا بره
انا و الله كنت بفكر اعمل حاجة بس مش عارف انفذ ولا لا حسني مبارك جي كمان كام يوم روما بفكر اروح امسك يافطة عليها صورته واعمل عليها علامة اكس وزي ماتيجي تيجي بس خصارة الوقت اللي يضيع مع واحد زي ده

المشاركة الأصلية كتبت بواسطة Abdo_Eldesokey

غريب أوي الموضوع ده يا ميدو

المنصورة أوفر أوي في الانتخابات السنة دي ، البلد بقت عاملة زي صفحة الإعلانات من كتر دعايا المرشحين

ولا كمية الستات الي نازلة الانتخابات دي

الواحد حاسس إنه لو فتح التلاجة هيلاقي طالعله منها مرشح

ويا ريت تشاركنا بأسباب عدم مشاركتك في الانتخابات

عندك حق فعلا دعايه الانتخابات صوه ولوح مخبيه البلد خالص ومعلقين صوره فى كل حته.... بس انت اخدت بالك من المرشحه الى اسمها شاه دى الوحيده الى محدش بيقطعلها صور ...
بخصوص مش هشارك ليه
مش هشارك عشان محدش من العالم دى داخل عايز يخدم الناس عشان كدا ما يستحقش انزل من بيتى وانتخبه
مش هشارك عشان شغل تقفيل اللجان وقله الادب والمشاكل كانك رايح حرب.
مش هشارك عشان 90% من الى هيشارك هيطلعلهم سبوبه من الى ماشيين معاهم يعنى نظام عك فى عك كله
مش هشارك عشان مش هيحصل تغيير ومخدش يقول يمكن لان يمكن اه بس بعد ما الروس الكبيره تتقلع.