السلام عليكم ورحمة الله وبركاته

كلام بيدور فى دماغى وفضفضة حبيت اشارك زملائى الكرام المحترمين اعضاء المنتدى فيها يمكن اكون غلطان او على حق الله اعلم بس انا كتبتها عشان اعرف هل الناس ده برضه اللى بيدور فى دماغها زيى ولا انا فيا حاجة غلط ولو ده فعلا بيدور فى دماغ الناس طيب ليه منتفقش بينا وبين بعض على وقفة قوية مع كل المشاكل اللى احنا فيها ونبقى ايجابيين فى حلها و اولها واهمها الاحترام المفقود وسوء النية المتبادل والاتهامات التى لا تنتهى بالكذب والتضليل .

الحقيقة ان فيه ناس كتير اصبحت بتستغل القسم للتشهير بناس تانية وتصفية حسابات او بيبث كرهه للعربية او غضبه سواء المبرر او غير المبرر من التوكيل , بينما اصبحت الفائدة الفنية هى اخر حاجة ممكن تلاقيها فى القسم دلوقتى بعد ما شيعنا المرحوم اللى اسمه الاحترام المتبادل وقربنا على السنوية بتاعته .

المشكلة دلوقتى ان اى حد لو دخل وكلمك او كلم اى حد تانى بقلة ادب او بتريقة او سخرية او ايحاءات باتهامات وعمل عليك مواضيع كاملة مش هتعرف تعمل معاه حاجة لانه لم يسبك او يكتب اى لفظ خارج انما باقى اساليب الحوار الهابط مسموح بيها وحضرتك المفروض تاخد كورس عند اللمبى عشان تعرف ترد عليه او تسكت وتعمل مش واخد بالك او تعمل زى اخواننا المحترمين السابقين اللى سابوا المنتدى واللى شكل ناس كتير حتسيبه قريب وانا منهم .

الناس زعلانة ان فيه ناس علاقتها حلوة بالاعضاء فى القسم وبالتوكيل فى نفس الوقت طيب هو احنا مش داخلين هنا عشان نساعد بعض فى الاساس سواء بالمعلومة او بالنصيحة او بخدمة على ارض الواقع طيب لو ربنا قدرنى ووصلت صوتك لحد فى التوكيل ابقى انا كده عميل ؟ طيب ولو انا فى كل مشكلة اتخانقت مع التوكيل عشان خاطر فرد واحد هل التوكيل هيعبرنى لو احتجناه عشان ناس تانية ؟ فهل عشان نحل مشكلة فرد ندخل كلنا نشتم وخلاص ونخسر اى مساعدة لبقية الاعضاء فى المستقبل الناس هتبقى مبسوطة ؟ ولا نحاول نساعد جميع الاطراف فى حل المشكلة بهدوء لو هو معرفش يحلها بنفسه ونوصل لحل يرضى كل الاطراف. بجد اول اشوف شخصيات ناقمة على ناس بتحاول تساعدهم وتساعد غيرها طيب لو الناس دى بطلت تساعد حد , كده الناس هترتاح وتبطل تتهمهم بالكذب والتضليل والعمالة للتوكيل ؟ بجد انا بحسدك يا ايمن على ان حبك لمساعدة الناس لغاية دلوقتى اقوى من كل الاتهامات والايحاءات اللى بتطولك كل يوم مع انى عارف ان لكل شىء اخر وللصبر حدود ولو ايمن ساب فى يوم من الايام المنتدى مش هتبقى مفاجاة ليا .

الحقيقة اللى انا شفتها بعينى فى موقف معين ليا مع المهندس امر انه راجل بمجرد انى اتصلت بيه بدون سابق معرفة بالراجل اهتم جدا جدا بمشكلتى وكانت مشكلة مش بسيطة وحلها لى وحسيت اد ايه هو قلبه على شغله مش بتاع اقلب الزبون واعمل له اى حاجة والسلام بالعكس وكل ده لا هو كان يعرفنى ولا ايمن حتى كلمه قبلها زى ما ناس كتير هتظن وكل ده بمجرد مكالمة هادئة جدا وعرضت عليه المشكلة باحترام ولا زعقت ولا دخلت على المنتدى وعملت مواضيع عشان اضغط عليهم لانى فى الاخر انا عاوز مشكلتى تتحل مش انى اعمل مشاكل ,هل المفروض انى اخد منه موقف سلبى فى اى موقف حصل وخلاص عشان الناس تفرح ؟ وحتى فى موضوع تعديل علبة دركسيون الواجا احترمته اكتر لما اتصل بالراجل صاحب المشكلة واعتذر له طيب المفروض نخسر واحد زى ده ؟ حتى لو حصل تقصير وده وارد و كلنا بنقصر كلنا برضه بنحفظ لصاحب المشكلة حقه وبنلتمس له كل العذر لو التوكيل قصر معاه ولما التوكيل بيحاول يحل برضه لازم نديه حقه , واحد ممكن يقول ده حقى انهم يعملوا لى كل حاجة ومحدش يتشكر على جهد هما بيخدوا فلوس عليه هقول طبعا كلامك صح مية فى المية بس فى لوس انجلوس مش فى مصر كلها مش توكيل عز العرب .

الناس اللى بتخرب قسم بروتون حاليا وهى مش فاهمه ان كده خسارة ليهم هيعرفوا بعدين ان اللى خلى قسم بروتون كده هم اعضاؤه المحترمين اللى معظمهم هجر المنتدى وهم اللى خلوه قسم متشاف ومتميز وهم بجهدهم ومشاركاتهم واضافتهم اللى خلوه يجبروا التوكيل انه يعمل مواضيع للتواصل مع مدير الصيانة فيه وهم اللى خلوا التوكيل يجيب خصم متميز لهم على سعر عربياتهم وهم اللى خلوا التوكيل يديهم خصم على الاستيكر فى الصيانات وكان المفروض ان اللى يدخل بعدهم اولا يحافظ على الارث ده ويكمل المشوار انما اللى حصل العكس القدام مشيوا والبقية منهم على وشك والمستوى هبط والقسم فى النازل فهل تعتقدوا ان المنتدى لو اتقلب شتيمة وتصفية حسابات حتى المزايا القديمة هتستمر ؟ اشك .
وصدقونى مادام كيرف القسم فى النازل كيرف العروض والخصومات برضه هيبقى فى النازل واحنا كلنا الخسرانين سواء استفادة فنية او مادية .
لانه زى ما كريم منير قال هيبقى منتدى فتكات او ثرثرة على النيل موتورز .

يا جماعة نصيحة اخيرة لو عاوزين القسم يقوم تانى يبقى بايدينا احنا ومواضيعنا بس قبل كل ده لازم كلنا نقف وقفة قوية مع اى واحد يتجاوز فى حقنا سواء بالايحاء او بتلقيح الكلام او بالاتهامات المرسلة ولو ده مش غلط طبقا لقواعد المنتدى ده غلط فى حق اى انسان محترم ومحدش هيجيب حقنا غيرنا وده اننا لما نشوف اى اساءة لازم نرد وبقوة وبدون غلط -السكوت معدش نافع- ولو كلنا فعلا وقفنا مع بعض الطيب هيطرد الخبيث فلو حضراتكم قررتم السكوت يبقى خلاص ده المسمار الاخير فى نعش القسم ولو قررتم نكون ايجابيين فى المشكلة الواقعة حاليا هتبقى دى فعلا بداية العودة.

يارب اكون وصلت لكم اللى عاوز اقوله ويارب ميكونش مصير الموضوع زى مصير كل المواضيع السابقة اللى اتعملت برضه بغرض اعادة احياء المنتدى وكان مصيرها الفشل للاسف.

نداء اخير لكل الاعضاء المحترمين اللى انا متوسم فيهم خير ,عمر المنتدى ما هيرجع تانى الا باتحادنا وايجابيتنا وعدم السكوت على اى تجاوز مهما كان لان سكوتنا وتساهلنا لغاية دلوقتى على الاشخاص اللى دمرت المنتدى هو اللى وصلنا للمستوى ده ولو ده حصل انا متاكد اننا هنقدر نرجع كل زمايلنا اللى فعلا افتقدناهم بعد ما سابونا ونرجع المنتدى احسن مما كان.

قسم بروتون هل ممكن يرجع تانى ؟ سؤال صعب اوى للبروتوناوية فهل من مجيب.