الموضوع: ما هى عيوب اوبل كورسا سيدان 2004 -2005-2006

أنا كنت عامل تقرير سريع كده عليها فى موضوع سابق أهه


العربية ممتازه ما شاء الله .. أولا شكل شبابى و الكبود عالى و صاجها تقيل .. أنا كان معايا سوزوكى سويفت كان أى حاجه تريح عليه الصاج يتطبق .. بجد الكورسا فرق شاسع .. كذا مره أتحك أجيب قطنه و ميه وترجع زى الأول .. يعنى الصاج مبيدخلش لجوه.

الموتور : السحب ممتاز جدا و موتورها ناعم و صوته قوى لما تقرص عليه.

الاستهلاك: عادى بالنسبه لعربيه 1600 سى سى .. يعنى متوسط 200 كم/الصفيحه جوه البلد.

الكماليات: جميع الكماليات .. تكييف .. سنترلوك .. باور ستييرنج .. 4 زجاج كهرباء .. 4 وحدات رفع .. مرايات كهربا.

مساحات التخزين: ممتازة جدا .. أربع حامل أكواب .. باكيتات فى الابواب .. درج التابلوه واسع جدا و مضاء .. مساحات تحت الكاسيت و فى التابلوة.

الثبات: ممتاز .. جبت بيها 160 بس للأسف . بس واحد صاحبى جاب 210 و بيقولى كانت كويسة.

العفشه: ناشفه الى حد ما .. يمكن عشان يخلوا العربية ثابته .. و يمكن عشان العربيه كنزة شوية .. ويمكن عشان الكاوتش عندى ماكسس (ناشف شوية).

التكييف: ممتاز جدا .. ميفرقش حاجه عن الكورى سواء فى البروده أو فى سرعة الوصول لدرجة البرودة.

أسعار قطع الغيار: كلها عاديه .. الفوانيس أسعارها بتدور حوالين 200 جنيه .. سير الكاتينه 60 جنيه .. سير الدينامو 90 جنيه .. بلية الكاتينة 220 جنيه .. فى موضوع عن أسعار قطع الغيار لو تحب تراجعه .. الغالى فيها اسطوانة الدبرياج و الديسك ب 900 جنيه .. و البلية ب 850 جنيه تقريبا.

العيوب: بتحتاج تغير اسطوانة و ديسك على فترات أقرب من العربيات التانيه .. يعنى حوالى 50 ألف كيلومتر .. و بيختلف حسب طريقة سواقتك .. أنا عربيتى داخلة على 80 ألف كيلو و لسه متغيرتش .. بس لما بقف واطلع كتير بحس انها بترج معايا شوية .. الكنترول باظت مع واحد صاحبى و جاب واحدة استيراد.

العربيه كتقييم عام .. أنا شايفها أحسن العربيات فى سعرها .. أنا قبل ما أجيبها كنت بفكر فى لانوس أو هيونداى .. انما دلوقتى بجد صعب جدا ان انا انزل منها على حاجه من دول (مع احترامى لهم).

اتمنى اكون افدتك و ربنا يوفقك لما فيه الخير.

الله بنور با كريم

المشاركة الأصلية كتبت بواسطة askafrawy

مش معاكك فى موضوع الثابات دة خالص عن تجربة للعربية

مبديئا العربية برازيلى فيعيدة كل البعد عن الالمانى من حيث التقفيل و الخامات
العيوب
تقفيل سئ جدا
عزل سئ جدا للموتور و تحس بعد سرعة 120 كم/ساعة انك قاعد جوا الموتور
طقم اسطوانة و ديسك انا بغيرهم كل 35000كم لانى بسافر كتير جدا و بحرق على الغيارات و ممكن اكون بحمل اكتر على الاسطوانة
المساحة الداخلية مش قد كدة و خصوصا الكنبة الخلفية
الخامات رديئة جدا و خصوصا التابلوه



المميزات:
الموتور بصراحة سحب ممتاز للعربية على الطريق
ثبات ممتاز على الطريق حتى سرعة 170 كم
استهلاك البنزين مقبول حوالى 8 لتر لكل 100 كم
التكييف مقبول و مش بياثر على سحب العربية

وممكن تبص على الموضوع دة
http://www.nilemotors.net/nile/178547-2003-2006-a.html

معلش هو حضرتك ليه بتقول على الخامات رديئه و خصوصا التابلوه .. أنا شايفها كويسه جدا التابلوه هو اه مش فخم .. تحس انه بلاستيك .. لكن عمره ما شقق مقارنه بالهيونداى أو قفع زى الكيا سيفيا مثلا أو طوس و لونه اتغير زى عربيات تانيه .. و لما بيتلمع بيرجع زى الجديد تماما.

فرش الكراسى و الابواب ممتاز برضه .. بس متغسلش فرش الابواب عشان بيطلع لما يتغسل.

السقف ممتاز من جوه و عمرى ما شفته واقع فى عربيا كورسا سيدان .. بعكس عربيات أوبل تانيه نادرا لما أشوفه مش ساقط فيها .

التكييف مش مقبول .. لأ ده على الأقل جيد جدا .. وبسيط و مالوش مشاكل .. بعكس عربيات تانيه أوبل برضه تكييفها معقد و نادرا لما تلاقيه شغال أصلا .

العربية لما تقارنها بالعربيات اللى فئتها .. أنا شايفها ممتازه و مناسبة للسوق المصرى و الجو بتاعنا.

طيب أنا بشكر حضرتك على ردك و عاوز أقابل حضرتك و تشوف عربيتى و تورينى الاماكن اللى حضرتك شايف تقفيلها مش كويس فى اللحامات و كابلات الكهربا .. و تشوف اداء التكييف و تقول لى ضعيف ازاى .. مع العلم ان العربية مش معايا من الزيرو و صاحبها الأول تقريبا مغيرش فيها حاجه و أنا زودت شحن التكييف مره واحده بس.