المشاركة الأصلية كتبت بواسطة yousef1978
أقل واجب عربية همر ههههههههههههه:
حضرتك مش أفدتني فقط
لا حضرتك جبت المفيد
أنا شغال في الإمارات وبأجهز نفسي للعودة لأرض الوطن بعد ما لمينا الزبالة اللي كانت مموتانا ومكرهانا عيشتنا
والحمد لله ممكن أشتري عربية غالية لكن أنا مش عاوزأصرف تحويشة سنوات الغربة في عربية وأضطر أرجع تاني أضيع ما تبقى من عمري وشبابي خارج مصر
وعلشان كده عايز عربية رخيييييييييصة جدا
وصيانتها هاااااااااااااادية خالص وممكن أي ميكانيكي يصلحهالي ولو مفيش ميكانيكي هأضطر أروج لعجلاتي وخلاص
وطبعا تكون واسعة لأني متعود على السيارات الواسعة هنا
ومصارييف الترخيص والذي منه معقولة - يعني الموتور 2000 سي سي فما تحت
وطبعا تكون بتمشي ببنزين ثمانين وسبعين كمان لو أمكن ولو بتمشي غاز او جاز أو مية يبقى مفيش مانع - وطبعا الإستهلاك مش مشكلة قوي لأن سعر الوقود هيكون معقول
أهم شرط طبعا إنها تتحمل المطباااااااااااااات الصناعية والطبيعية وبين بين ومش كل يومين أبات عند العفشجي وهو بيربطلي العفشة علشان ما تفلتش مني
أنا بصراحة - طبعا هتقول ده شحات وعينه فارغة - باحب السيارات ذات مركز الثقل المنخفضة - يعني ممكن تكون عالية في طبعها لكن الإطارات بتاعتها داخله جوه جسم العربية بقدر الإمكان - يعني مش زي الدفع الرباعي او العربيات اللي أصلا منخفضة ولابعين في تعليق الإطارات بحيث تترفع - لأنه كل ما كان مركز الثقل - مركز الثقل وليس السيارة - منخفض كل ما كانت أكثر ثباتا وإتزانا
لو حضرتك فاكر القصة بتاعة الراجل النحوي - ولا مؤاخذة راح يشتري حمار - فقال للبائع :
اريد حماراً لا بالصغير المحتقر ولا بالكبير المشتهر ،إن أقللت علفه صبر ، وإن أكثرت علفه شكر ، لا يدخل تحت البواري ولا يزاحم بي السواري ، إذا خلا في الطريق تدفق ، وإذا أكثر الزحام ترفق
فقال له البائع : دعني إذا مسخ الله القاضي حماراً بعته لك.
أنا الصراحة بأفكر في البويك سكاي لارك أو الفولفو أول التمانينات وكنت فكرت قبل كده في البي إم الكبيرة فئة الخمسمائة والسبعمائة القديمة لكن خفت من قطع الغيار - ولو ما قدرتش في الآخر هأضطر أشتري 132 - 1600 أو التمبرا استيشن وأمري إلى الله
طولت على حضرتك - لكن شاكر لك إهتمامك - ولو عندك نصيحة فأنت اهل كرم وغحنا نستحق هههههه
سلام عليكم ورحمة الله وبركاته