كان عندي شوية شغل في جامعة الزقازيق رحت بالعربية ( لوجان 2011)

الحمد لله العربية عديت بيها 1500 كيلو

طريق الزقازيق والزراعي عموما معظم الناس عرفينه اكنك في دريم بارك مطبات ومنحنيات وحالة ما يعلم بيها الا ربنا

اقفل زجاج اللوجان شغل التكييف ظبط الكاسيت بتاعك وانسي الدنيا

العربية بسم الله ماشاء الله كنت بعدي 140 وثبات ولا اروع بالذات في مطبات الهواء

استهلاك العربية للبنزين ممتاز

صوت ماتور العربية بينعم اكتر وبيوطي مع زيادة الكيلو مترات قبل الاف غير بعد الالف

امتصاص المطبات رائع عفشة ممتازة

عزل العربية رائع ( بصراحة انا مشيت بفيرنا علي الطريق ده وكنت حاسسس ان العربية مفتوحة من تحت وسامع كل حاجة ) بس ياجماعة ده عيب بجد الواحد من تعوده علي اللوجان بركب عربيات اصحابي دماغي بتوجعني بسرعة من صوت عزل عربياتهم دي بصراحة نقطة حق تقال علي اللوجان عزلها ممتاز

الفرامل بجد تسعفك في اي وقت ( غير اي عربية في نفس الفئة انتو اكيد عارفين قصدي ) لاني النهاردة ماشي ومعدي 120 وعايز اعدي العربية اللي قدامي النترا هو خد اشارة شمال ونا حبيت اعدي من اليمين وواحد تاني 128 علشان عايز يتكلم في التيلفون ياخد من اقصي الشمال لاقصي اليمين انا لقيت نفسي خلاص قربت منه خالص بس الحمد لله اني راكب رينو لقيت نفسي عادي بقف والم العربية بالفرامل ومفيش مشكلة بتاع 128 وشه راح الوان لانه عارف نفسه هو كده اللي غلطان بس انا متكلمتش مشيت علطول ( الحمد لله)

معلش طولت عليكم بس انا حبيت اقولكم علي الاخبار اول باول


نصيحة : ياريت محدش يجري بسرعة باي عربية انا عن نفسي بشد باللوجان بس علشان اعرف امكانيات عربيتي بس ان شاء الله ما جريش تاني الا في حدود المعقول يعني طريق زي طريق الزقازيق الزراعي ده اخره 100 بس انا استهبلت وعديت 140 الحمد لله ربنا سترها