سلبيات تركيب فلتر رياضى على الموتور ؟؟

**khaled_sabry** · 29-09-2010 10:37 PM

من خلال بحثى فى مواضع المنتدى
توصلت اننا ممكن نركب فلتر رياضى لسيارات الكربراتير و الغاء العمه... و مشكلته الوحيده بس هى كيفيه تركيب الماسوره الخاصه بيه على رقبته الكربراتير
ماشى مش مشكله التركيب خالص
بس اللى عاوز اعرفه الزياده فى القدره الحصانيه دى بتبقى على حساب ايه ؟؟؟ اى تعديل بيتعمل بيبقى على حساب حاجه تانيه ... فاللى عاوز اعرفه الزياده دى بتبقى على حساب ايه
على فكره انا ناوى اركب الفلتر و احطه ورا شكبه العربيه .. يعنى حيبقى فى وش الهواء و كل لما اسرع بالعربيه حيدخله كميه هواء اكتر
بس لو راجعنا شكل العمه عندى حنلاقى ان ماسورتها معموله على جنب و قطر فتحتها صغير .. انا الموتور بتاعى 1200 cc

وبالتالى التعديل اللى ناوى اعمله حيدخله كميه هواء اكبر بكتر من اللى بيدخلها فى الوضع الحالى ... هل ده يأثر على عمر الموتور او اى حاجه تانى ؟؟؟
وهل الافضل انى اركب الفلتر فى وش الهواء و لا فى حته على جنب مداريه علشان الهواء يبقى داخله بس مش باندفاع شديد (زى مابيحصل دلوقتى فى العمه العاديه )؟؟
على فكره العربيه دى بسافر بيها مسافات طويله على سرعات عاليه فيهمنى اعرف تأثر مضاعفة الهوا اللى داخل ده
معلشى طولت عليكم

**khaled_sabry** · 29-09-2010 10:56 PM

صحيح شكل الحوض عندى زى كده

تلاحظو ان عمه الهواء ماسورتها على جنب ( مش فى وش الهواء ) و فتحتها صغيره

**khaled_sabry** · 30-09-2010 08:51 AM

ايه يا رجاله
هو تركيب الفلتر الرياضى مالهوش سلبيات خالص ؟؟؟
طيب بلاش السؤال ده حد يجاوبنى على السؤال التانى
احط الفلتر فى وش الريح فى مقدمه السياره وورا الشبكه على طول ( اكبر كميه هواء حتدخل و حتضاعف مع السرعه ) ..
ولا اركبه خلف الفانوس الشمال (ابعد نقطه فى الحوض عن الموتور ) بحيث مايتعرضشى لأندفاع الهواء المباشر ؟؟

**tamer_a7** · 30-09-2010 12:22 PM

صباح الفل الاول يا باشا تلاقي الناس بس كانت لسه نايمه خليني ابدء انا اجاوب وربنا يستر وتطلع الاجابه صح هههههه
مبدئيا هتختار مكان للفلتر يكون بعيد عن السخونيه يعني لو في وش العربيه يبقي عنب بس طبعا مش ورا الريداتير يبقي السخونيه كلها جايه منه
ممكن تعمل زي ناس كتير وتحطه تحت عن الاكصدام من قدام كده ياخد هوا بارد وزي الفل
هل ليه تاثير سيء طبعا لا لانه افضل واحسن في المواد بتاعته من الفتر الاصلي بتاع العربيه بس مهم اوي انك تتبع نظافته وتعتني بيه
كميه الهواء اللي داخله كده كده علي قد ما الماتور عايز يعني ما تخفش مش هيبقي فيه ضغط عليه من اندفاع الهوا انسي خالص الموضوع ده
بالنسبه ليك من شكل المسوره الصغيره اللي في الصوره دي (بتاعت العمه) انت الماتور هيتنفس الصعداء وهيقول الحمد لله كمان
انا من وجهه نظري المتوضعه انت انشاء الله هتتبسط اوي باداء العربيه

**khaled_sabry** · 30-09-2010 02:27 PM

المشاركة الأصلية كتبت بواسطة tamer_a7

صباح الفل الاول يا باشا تلاقي الناس بس كانت لسه نايمه خليني ابدء انا اجاوب وربنا يستر وتطلع الاجابه صح هههههه
مبدئيا هتختار مكان للفلتر يكون بعيد عن السخونيه يعني لو في وش العربيه يبقي عنب بس طبعا مش ورا الريداتير يبقي السخونيه كلها جايه منه
ممكن تعمل زي ناس كتير وتحطه تحت عن الاكصدام من قدام كده ياخد هوا بارد وزي الفل
هل ليه تاثير سيء طبعا لا لانه افضل واحسن في المواد بتاعته من الفتر الاصلي بتاع العربيه بس مهم اوي انك تتبع نظافته وتعتني بيه
كميه الهواء اللي داخله كده كده علي قد ما الماتور عايز يعني ما تخفش مش هيبقي فيه ضغط عليه من اندفاع الهوا انسي خالص الموضوع ده
بالنسبه ليك من شكل المسوره الصغيره اللي في الصوره دي (بتاعت العمه) انت الماتور هيتنفس الصعداء وهيقول الحمد لله كمان
انا من وجهه نظري المتوضعه انت ان شاء الله هتتبسط اوي باداء العربيه

هيييييييييييه
واحد رد عليا ... الف شكر يا تامر باشا

الاول انا عربيتي كورولا موديل 1978 يعنى بقالها 32 سنه ماشيه على الارض و انا بحافظ عليها على قد ما اقدر
و بالتالى خايف اعمل حاجه ممكن الموتور مايستحملهاش ( نظرا لعمره) بينما المواتير الجديده عادى بالنسبالها (ماهى مواتير فى عمر احفاد متورى ) ... اللى اقصده مثلا حاجه زى التربو لو ركبتها عندى الموتور حيقعد سنه و يترمى بينما حيقعد مده اطول على اى عربيه تانى

المهم
انا بالنسبه لوضع الفلتر فاحلى حاجه عندى ان الحوض واسع و فيه اماكن فراغات كتير اوى رغم انى مركب كمبريسور تكييف بخراطيمه بس فيه مكان واسع برضه ... فانا ناوى باذن الله اركب الفلتر فى الجزء بين قربه الميه و الريداتير عندى ( لو بصيتت فى الصوره حتلاقيهم بينهم مسافه واسعه تكفى للفلتر ده ... و بكده يبقى فى وش الهواء و فى نفس الوقت بعيد عن تراب و طين الشارع

بس اللى مخوفنى موضوع اندفاع الهواء ليه ده ... لأنى فاكر قبل كده قريت موضوع عن واحد دور العربيه و هى واقفه فتح الكبود و جاب البلاور و شغله فى عمه الهواء
صاحب الموضوع كان سعيد اوى و بيقولك لاقيت العربيه صوتها على كأنى مركب تربو ... و كل الاعضاء اللى ردو عليه قالوله ان اللى عملته ده كان جنان و احمد ربنا ان الموتور ماطلعلكشى من الشكمان

طبعا حركه زى دى لو عملتها مع موتورى العجوز ممكن الاقيه نط فى حجرى
بس لما بفكر فيها لاقيت انى لما احط الفلتر فى وش الهوا كأنى عملت الحركه اللى الاخ ده عملها بس فى السرعات العاليه

معلشى انا موسوس بس انا الناهرده حشترى الفلتر باذن الله و حظبطله المواسير البلاستيك و اركبه بكره بأذن الله ... بس يارب ماتحصلشى مشكله لأنى مسافر اسكندريه يوم الاربعاء

... و عاوز اكسر ال 140 بقى (اقصى سرعه جبتها بالعربيه دى كانت 130 كم ... موتورى 1200 CC )