استلام السيفيك ان شاء الله خلال الاسبوع القادم

**NaBeLeOn** · 19-03-2008 09:50 PM

يا جماعة ياريت النصائح الأساسية عند استلام السيارة و بداية استعمالها لان معاد وصول الدفعة فى الميناء الخميس 20/3 ان شاء الله و كام يوم بعديها عشان اجراءات الافراج الجمركى

انا حاجز لون سيلفر من الفطيم فرع الاسكندرية و اعتقد فى زميل هنا فى المنتدى كان حاجز معايا فى نفس الدفعة بس اللون الشامبين

دعواتكم ...

**veriano** · 19-03-2008 11:33 PM

أنا كمان هستلم زيك و قالولى يوم 25 مارس
ربنا يسهل انا كمان محتاج النصيحة

**mody_halawa** · 24-03-2008 04:41 PM

الف مبروك وربنا يباركلكم فيها

**shubz** · 30-03-2008 01:08 AM

أولا ألف مبروك يا جماعة. إجراءات الإستلام من القاهرة كانت سهلة بس العربية بتبقى مليانة تراب من جوا و من برة جامد و لما سألته قال لى أصل بنوع النقل بيبهدلوها. لو قدرت حاول تصر إنه ينظفهالك قبل الإستلام. أنا مع الأسف معرفتش عشان كان يوم خميس و كان أخر النهار و مكنتش عاوز أستنه يومين كمان.

**fahd_628** · 30-03-2008 01:12 AM

الف الف مبروووووووووووووووووووووو ووووك

**NaBeLeOn** · 30-03-2008 01:51 AM

shubz

الله يبارك فيك .. ياريت تفاصيل اكتر عن الاستلام

و هل فعلا موضوع الزيادة فى الاسعار ده حقيقي و لا اشاعات بس ؟
====
fahd_628

الله يبارك فيك

**NaBeLeOn** · 31-03-2008 05:35 PM

يا جماعة انا كنت بكلم التوكيل النهاردة و أكدوا حكاية الزيادة فى الاسعار للاسف :(

و قعد يقولى ان التوكيل هو اللى شال الجزء الاكبر من الزيادة بالنسبة للدفعات اللى كانت already محجوزة .. و ان سعر العربية هيعلى عن كده بكتير فى الدفعات الجديدة

عشان سعر الين ارتفع امام الدولار و شركة هوندا نفسها فى اليابان رفعت الاسعار من عندها عشان ارتفاع اسعار البترول و المواد الخام

السعر حاليا 143000 بالظبط

ده كلام سيد الجداوى مدير فرع الاسكندرية .. انا لسه لحد الوقتى مستلمتش مع اننا داخلين خلاص فى شهر ابريل :(

**shubz** · 31-03-2008 09:46 PM

بالنسبة للإستلام من القاهرة أنا رحت الأول المعرض فى المهندسين لإستلام الإفراج الجمركى و جواب المرور بعد ما دفعت باقى المبلغ. و بعدين الإستلام نفسه كان من مدينة نصر عند الجراج بتاع الجيش اللى أمام ميدان الساعة فى طريق النصر. يعنى حاول تروح بدرى عشان المندوب بيمشى على الساعة 4. اما تقابل المندوب هيوريلك ال options اللى فى العربية و أهمهم فك التعشيقة لو حبيت تزق العربية تحت أى ظرف. و كمان فى الكود بتاع الكاسيت و برضه هيوريلك الشنطة و الإستبن مع العدة. و فى الأخر هتمضى على إقرار إستلام و على بركة الله.

أما بانسبة للسعر ف دى معلومات مؤكدة و دا مش بس فى الهوندا و لكن الكورولا و الفكترا زادت كمان.