الحبر هتشتريه من بتوع صيانة الطابعات و ملء الحبر و كده. حبر الطابعة ال ink jet سائل طبعاً و مش عارف الكيلو الأسود بكام و هتحقنه بسرنجة. كان عندي طابعة انك جيت من 9 سنين بس الله يرحمها
ممكن تنزل شارع الخليفة المأمون أمام سوق العصر هتلاقي محلات لحبر الطابعات فقط واحد منهم اسمه "أحبار اليوم"

رأيي الشخصي لو هتطبع كميات كبيرة + من غير ألوان يبقى تجيب طابعة ليزر لأن تكلفة تشغيلها أقل + اعتمادية أكثر

هاحكي لك تجربتي الشخصية اشتريت طابعة HP 1005 ليزر من اللي كانت منتشرة جداً من سنة و 4 شهور و طبعت بالكارتريدج الأصلي بتاعها أول مرة حوالي 700 ورقة و بعد ما خلص رحت لواحد صاحبي يملاها قدامي، بعدين طبعت حوالي 1100 صفحة فأحرجت أروح لصاحبي تاني لأنه مش هياخد فلوس
رحت اشتريت نصف كيلو حبر (حبر بودرة) و بدأت الشغل
لاحظ أني حسبت تكلفة ملء الكارتريدج بنفسي بيكلف 4.5 جنيه في المرة الواحدة
في حين أن أقل واحد برة بياخد 30-35 جنيه و ماتعرفش عمل إيه (هل ملأه للآخر؟ هل استبدل قطع غيار؟هل هيرجع لك في الميعاد اللي اتفقت عليه؟)
في ثالث مرة احتجت أعمل تنظيف للكارتريدج من الداخل و اتعرفت على مكوناته و ضبط و وظيفة كل حاجة فيه و مع الوقت أنا و واحد صاحبي عملنا تعديل في الكارتريدج الأصلي كمان عشان يتقل الحبر أكتر (الكتابة أصبحت بارزة و تحسها بإيدك)
و لتسهيل عملية الملء فقط (لو مش محتاج تنظيف من الداخل) عملنا فتحة في الكارتريدج من برة
في مرة اتخدش جزء داخل الكارتريدج اسمه الدرم rotating drum و غيرته لوحده بـ 50 جنيه من عند بتوع الصيانة
بعدين اشتريت كيس كيلو حبر ب، 90 جنيه و قسمته أنا و صديقي و شغال بيه لحد دلوقتي
مع الوقت احتجت أعمل تزييت لبعض أجزاء الطابعة نفسها من الداخل (عشان صوت تزييق خفيف) لكن احذر التزييت لو مش عارف بتعمل ايه في مقولة بتقول resist the urge to oil your printer
صاحبي اشترى كارتريدج جديد تقليد بـ 170 جنيه خلصه بعدين استعمل مكوناته كقطع غيار للأصلي، و الأصلي كان بـ 320 جنيه

المحصلة:
طبعت كمية ورق و كتب طبية كاملة (وش و ظهر طبعاً) تكفيني سنين قدام و عرفت مطبعة بتجلد الكتب hard cover بشكل احترافي و رخيص (8 جنيه للمجلد حتى 1000 صفحة ، و 10-14 جنيه لو هتكتب على الكفر بالمذهب)
طبعت بنفس الكارتريدج الأصلي من يوم ما اشتريته 12376 صفحة