الحقيقة الموضوع دة بقالة كتير فى دماغى ..بس خلاص فعلاً حاسس اننا لازم نتكلم فية ...
اوضاع السواقة بقت غير طبيعية ...يمكن ناس كتيرة اتكلمت فى الموضوع دة فى مواضيع مختلفة ..بس كانت على عادات سيئة فى السواقة او حاجات بتنرفز ..
الحقيقة انا هتناول الموضوع من زاوية تانية إن بقى فى فعلاً حاجات متأصلة و ثابتة ولا تحتمل اى تغيير و متعارف عليها عند الجميع و عايشين معاها ..بسلام ! يعنى باختصار بقت نوع من انواع
(الثقافة ) ومفهوم واضح وظاهر و بنلمسة بشكل يومى متكرر .
فيا جماعة ...يا اللى لسة هاتتعلموا السواقة او اللى بيتعلم او حتى اللى بيسوق من زمان ياريت قبل اى حاجة منسبش الثقافات دى تبقى امر ُمسلم بية ..لازم كلنا نحاربها و نقضى عليها واحدة واحدة وإلا الوضع بيتفاقم كل يوم وهانضر نسوق جوة بيوتنا ارحم .
مش مهم تتعلم السواقة ..لكن الاهم انك تسوق صح ..لأن فيها انت مش لوحدك معاك اطراف كتير اوى ممكن تتأثر بيك ..و هايرجعلك فى الاخر ..وممكن انت نفسك تتأثر بيها بعدين
وعشان دورنا المهم لازم نتحدى هذة الثقافات (المترسبة ) بمرور الوقت جوانا و جوة اى حد .
يا ترى اية هى الثقافات دى ... ماتقلقش هى ظواهر بتشوفها و بتحصلك كل يوم بس لما الظاهرة تزيد و الجيل الجديد ياخدها و تتكر فى اليوم الف مرة ..خلاص بقت ( ثقافة ) .
و عشان الموضوع مايبقاش تقيل ..و عشان انا مش لاقى الصراحة تسميات مناسبة اكتر من دى لهذة الثقافات ..طلعت بالشكل دة ..
ثقافـــات سيئة يجب تغييرها
1- ثقافة (المشى جوة العربية) : اللى ماشى بالعربية فى اى شارع ..و فاكر انة ماشى بالعربية ..الحقيقة انة مش ماشى ..لازم تبص حواليك و تعرف متوسط السرعة فى الشارع دة اية .لآن فى سرعة نسبية بينك و بين كل العربيات يعنى مش كفاية انك تبقى ماشى و خلاص ..لازم على الاقل تلاحظ السرعة المتوسطة فى الشارع اللى انت ماشى فية ....البطىء لا يعنى ابداً السلامة فى كل الاحوال
انت كدة بتسبب ارتباك لكل اللى جاى وممكن ياخدك معاة
2-ثقافة ( َمليى الميلى ) : يعنى كل الناس ماشية خطوة خطوة و على قشر بيض ..اية لازمة ماتسبيش اى مسافة بينك و بين اللى قدامك ..يعنى لازم تملى الكام ميللى اللى ناقصين دوول بأكصامك الامامى ما يمكن ماتعرفش تظبطها كل مرة ..ما يمكن هو يوهمك انة هايتحرك و مش هايتحرك ..اية الفايدة !!!
3-ثقافة (الغرزة الفاضية ) : اللى مايعرفش التعبير دة ..يعنى تعدى العربية اللى قدامك و تيجى ادامها تانى ...طب لو اصلاً مفيش اى داعى و اللى بعد بعد اللى قدامك واقف بردو ..لييية !!! ربكت اللى قدامك و ياسلام لو خانتك و ماعرفتش تعملها صح ..وفى الاخر ..النتيجة اية .. زيرووووو !
4-ثقافة (المقطورة ) : اللى بياخد دوران ..الدوران دة لة بردو حارات يعنى ماينفعش تبتدية على الضيق و تنهية على الواسع ..انت مش فجاءة اكتشفت انك ساحب (مقطورة)بالعربية !! لآن اللى داخل (اليو تيرن ) دة معاك ممكن يكون عامل حسابة انة هايخدة معاك و مش هتأثر علية .
5-ثقافة (البوز فى الكوز) : ماشى بسرعة متوسطة او عالية ...اية لازمة تحط (بوز العربية بتاعتك اليمين ) فى (بوز العربية اللى قدامك الشمال) و تفضل على كدة ..!!!!
عدية و خلاص ..مش عارف استنى التوقيت المناسب ..او الفت انتباة انك عايز تعدى ..دة لو كنت عايز اصلاً ... ممكن يتضر يهدى هو او يوقف ساعتها (هاتنغزة) فى العربية بتاعتة و هاتجيلة فى زاوية الشنطة ودة وحشة اوى فى تصليحها و بيع العربية بعد كدة و كل حاجة ...وانت هايبقى عندك زاوية اكصدام و يمكن فانوس ... طب لييييية اصلاً وجع الدماغ دة !!!!
6- ثقافة (الانعزال ) : مركزززز اوى فى 3 او 4 سم حواليك و مش قادر تستوعب اللى جنبك نفسة يجى قدامك لية ..مع انك لو بصيت شوية من الزجاج اليمين عندك هاتعرف ان فى عربية عطلانة قدام ..و الراجل اللى جنبك..... غصب عنة مضطر يقطع عليك خلوتك مع نفسك !
7- ثقافة (الزفة الكدابة) : تن تننن تن تن تتتتن ..تن تن تتن . اية بقى ..ولا حاجة و كل فى فلك يسبحون وليس فى الامكان ابدع مما كان .. لا كلكسك فرق فى حاجة ولا حد فى ايدة حاجة يعملهاك ..الشارع هو دة اخرة و مفيش لك مكان جديد ..و السؤال لغير الله مزلة !!
8-ثقافة (تسجيل الحارة فى الشهر العقارى ) : لو اضريت انك تنقل الحارة اللى كنت ماشى فيها لآى ظروف حتى لو طارئة ..حد طلع قدامك ..العربية اللى قدامك هاتجبلك شلل رعاش .. اللى وراك مش هايسيبك تدخل حارتة ..لأنك ببساطة ماخدتش من ميعاد ..او كان الوقت مش مناسب ..او لآنك ماتعرفش انة اشترى الحارة دى امبارح و لسة مسجل فى الشهر العقارى !!!
9- ثقافة (ألاُفق الضيق) : شد وتسارع من 0 ل 100 ...و اختبارات عدد الاحصنة .. و الوصول بال RPM لحد 6000 شىء فعلاً ممتع و مثير ... بس للآسف الكوبرى واقف تماماً بعد 50 متر
ولما توصل هناك .... ياريت ماتضربش الجرس كتير .!!!!!!!!!!
10- ثقافة ( لعبة النطة الفطة ) الاولى سابقا : ما زالت الطفولة موجودة عند كل واحد و اثارها لايمكن محوها على مر العمر .. محاولة القفز بالعربية ..كل متر فى اشارة و الوقوف المطلق بعد المتر الواحد دة
شىء ممتع فعلاً بيخلى العربية تنط و تفط كل شوية ..و تقتلل جو الملل فى الاشارة و ترجعك لآيام الطفولة فى لحظة مع ذكريات (لعبة الاولى ) !!!!!!!!!!!! و تخلى كل اللى معاك فى العربية نفسهم يفتحوا الباب و ينزلوا و يسبوك تلعب مع اصحابك !
يا جماعة ماحدش يقولى دى عادات سيئة لآ ..دى ثقافة بقت متأصلة
يا جماعة اللى بيعمل كدة او يعرف حد يقولة
ارحمونا بقى ..كرهتونا فى النزول للشارع ..و كرهتونا فى العربيات .
يا لهوىىىى
سلام
المفضلات