سؤال غريب : ليه العربيات الملاكي مبتحطش غاز طبيعي

**Nile_Storm** · 20-03-2008 06:41 PM

انا بشوف التاكسيات و الميكروباصات بس هما اللي ماشيين بغاز
في عربيات ملاكي حاطه غاز
طبعا التهيوئات دي بيتجيلي كل ما احس ان البنزين قرب يغلي :(

**hazem_khidr** · 20-03-2008 06:53 PM

و مين قالك كده
في عربيات ملاكي مركبه غاز بس مش كتير
بس حقولك حاجه الغاز بتركبه لو بتستعمل العربيه كتير زي شغل التاكسيات و الميكروباصات كده
غير كده بياكل شنطه العربيه باكملها
غير كده مضر بالموتور .
و بصراحه اخاف امشي بالعربيه و انبوبه بوتاجاز شغاله فيها و ناس كتير كده.

**Ghamrawy** · 21-03-2008 12:36 AM

الموضوع كله انه بياكل الشنطة علشان حجم الاسطوانة كبير و كمان الغاز بيبقى حامى على الموتور و فى حاجات بتتاكل منه و على فكرة فى عربيات ملاكى بتنزل من المصنع مجهزة للعمل بالغاز الطبيعى على طول و افتكر ان هوندا عندها عربية كدا و كمان تقريبا سيتروين ،اما عن الاسطوانة نفسها فامتخفش خالص فهى بتتحمل الصدمات و الحرارة العالية و ضرب النار المباشر كمان

**Xpert** · 21-03-2008 01:06 AM

ببساطه .. نزاهه .. انا راكب ملاكي .. بتمشي بالبنزين .. احب ادوس .. الاقي اكسيليريشن ..
الغاز بيقصف عمر الموتور لأنه نيء في الحريق .. و انا كصاحب ملاكي المقابل مش مستاهل .. انما في الاجره الهدف منه تقليل تكاليف الوقود و بالتالي توسيع هامش الربح ..
انما الايام اللي جايه دي هاتخليك تفول مياه بعد كده ..

**fahd_628** · 21-03-2008 01:19 AM

فية يا باشا عربيات ملاكى ماشية بعاز بس مش كتيير

و فعلا موضوع الانبوبة دة مقلق عارف لو متركبة برة انا معنديش مانع بس دية فى مصر يعنى ممكن اى حاجة تحصل

+ انة مضر للمحرك و بيقلل الكفائة و صعب فى الدوارة الصبح

**Moh.Fahmy** · 21-03-2008 01:26 AM

و الله لو العربية نازلة من بلدها مصممة علي انها تشتغل بالغاز مش مشكلة انما المشكلة في التعديل اللي بيتم بعد كده لان الغاز بالرغم من انه اوفر بكتير الا انه بينعم الموتور و بيأثر في السحب
التاكسجية طبعا عارفين كده انما بيبقوا حاسبينها كويس انه كده كده بيعمل عمرة للموتور فمش حتفرق معاه بقي حته تنعيم الموتور و السحب دي و بعدين طب لو حل مشكلة السحب دي حيرازي مين بعد كده او احنا حنلاقي مين اللي حيرازينا بعد كده

محمد فهمي

**sab3aawy** · 21-03-2008 06:59 AM

سبب ان الغاز بيؤدى لتآكل المحرك بسرعة هى احتواؤه على نسب عالية من الكبريت والفوسفور، ومع درجة احتراقه المنخفضة التى تسمح بتكاثف بخار الماء فى المراحل الأخيرة من الإحتراق وشوط الطرد تتحد اكاسيد الفوسفور والكبريت مع بخار الماء الناتج من الحريق لتكون احماض الكبريتيك والفوسفوريك التى تلتهم اجزاء المحرك خاصة صبابات العادم ووش المكبس وشنبر الحريق مما يؤدى لسرع الإحتياج للعمارات