الموضوع: إزاى أتصرف في المواقف ده

المشاركة الأصلية كتبت بواسطة egman

السلام عليكم ورحمة الله وبركاته

انا كنت بفكر فى موضوع وقلت اطرحه على اصدقائي فى المنتدى ونشوف رايهم اية بحكم الخبره فى القيادة والمواقف الحرجة .

اهم حاجة في الماوقف ديه كلها الهدوء ومتحملش هم إنك هتخبط أنت كده كده حالة العربية مش طبيعية فـاهم حاجة الخروج باقل الخسائر

ده اول موقف :

أعمل اية لو انا ماشي بالعربية على سرعه وجيت ادوس فرامل الاقي الدواسة واقعه او مافيش فرامل ؟

ماتستخدمش فرامل اليد إلا لما سرعتك تهدى خالص, لو استخدمها مع وجود أي حدفة فالدركسيون العربية هتعوم أو لاقدر الله تتقلب. المفروض تنقل ل غيار اقل وتقعد تعمل كده هتلاقي العربية سرعتها بتقل وإنت على التاني أو الأول وسرعتك هادية ممكن ترفع فرامل اليد المهم ماتفقدش اعصابك أو تتوتر ممكن برده من وقت للتاني تجرب تكارك فرامل. كمان الفرامل عمرها ماهتقع احتمال تلاقي المشوار طويل أو ضعيفة بس البدال مش بسلك زي البنزين أو الدبرياج

تانى موقف :
اتصرف ازاى كمان لو حبيت استخدم فرامل اليد بدل القدم طالما ان القدم مش موجودة وبردة فرامل اليد مش موجودة ؟

احنا قلنا بلاش فرامل اليد غير علي السرعات القليلة جدا بس في السرعات ده وإنت لسة علي الأول وعايز برده تقف ومفيش فرامل خالص لف بالدركسيون يمين وشمال لتقليل سرعة العربية أو الاصطدام أو حاول تتلافي الاصطدم وتحود من حولين الحاجة اللي قدامك. بس الكلام ده لما العربية تكون سرعتها قليلة عشان اللف المفاجئ أو مع تشنج ممكن العربية تعوم وتفقد السيطرة.

تالت موقف :

إنفجار إطار السيارة وانا ماشي ؟

امسك الدركسيون جامد واياك تضرب فرامل مفاجأة, شعر فرامل لو حبيت بس اياك تضرب فرامل جامدة العربية ممكن تعوم أو تتقلب لاقدر الله.

رابع موقف :

جيت وانا على سرعه اجيب الغيار الاعلى لم اجد دواسة الدبرياج لقيتها واقعه او السلك انقطع ؟

كده أنت مش هتعرف تمور أو تنقل أحسن حاجة تهدي وتاخد حارة على جنب وتبتدي تهدي. قبل ماالعربية هتقف هتعدتتنطط وتنطر وبعدين هتبطل المهم ساعة مايحصل كده تكون أنت مهدي علي جنب عشان متقفش في نص الشارع.

وارجو إبداء الرأى فى كل نقطة منفصلة ...

منتظر ردكم يا شباب ....

واهم حاجة الوقاية من الموقف ديه. بص على سلك الدبرياج. تمم علي زيت الباكم أو الفرامل كل شوية. تمم علي التيل لو حسيت إن الفرامل ضعيفة. حاول تشغل فرامل اليد لو مش شغالة. تمم على الكاوتش وغيره في معاده أو كل 3 سنين. تمم علي ضغط الهوا كل كام يوم عشان لو كان الهو مش مظبوط ممكن يخلي العربية تعوم في أي موقف من دول لاقدر الله.
وربنا يستر طريقك ويسترها معانا كلنا

كلام مظبوط ميه ميه
وانا اغبى موقف حصلى وعاوزكم تقولوا هاتتصرفوا ازاى فيه
ماشى بسرعه كنت 80 تقريبا وبعدين هديت شوية وانا بشيل رجلى من على الفرامل رباط الكوتشى اتلف على الدواسة يعنى الدواسة دخلت فى الفيونكة علشان كانت طويلة ورجلى معادتش طايلة البنزين ولا عارف احطها تانى على الفرامل هاهاها كان موقف غلس وربنا سترها

المشاركة الأصلية كتبت بواسطة egman

أ / john_samy_1

الف الف شكر لحضرتك وعلى اهتمامك وسرعه ردك .

وواضح من مستوى الرد انك ما شاء الله على خبره عالية وقد اية انا الموضوع ده كان بيحيرنى وكنت بفكر فيه وقد اية انا استفدت من رد حضرتك .

طيب واية راى حضرتك فى تصرف زى انى ابطل العربية من المفتاح فى حالات الفرامل هل ده مؤثر ولا رد فعل غلط ولا اية النظام ؟

شكرا جدا لذوقك.
بلاش موضوع التبطيل ده عشان لو بطلت أنت مش بتكون متحكم في أي حاجة وبعد كام دوسة فرامل دورة الزيت بتكون خلصت الزيت اللي فيها والفرامل هتكون حجرت أو بقيت واقفة مكنها مبتنزلش. ممكن تبطل العربية قبل ماتبطل هي منك في حالة الدبرياج اللي مش شغال بعد ماتكون هديت وعرفت هتقف فين عشان تحمي تروس الفتيس.


ويعنى اية اجيب او اعمل غيار عكسي وومكن يفيدنىا و يعمل ايه ؟


أنا معرفش إيه غيار عكسي ( مارشدير مثلا وانت ماشي علي الأول ديه تدمر الفتيس وتكسر التروس ) بس أنا هقولك علي حاجة تجربها وإنت ماشي مثلا علي سرعة معقولة وفطريق هادي شيل رجلك من البنزين وانزل نقلة. هتلاقي سرعة العربية قلت لو نزلت كمان نقلة السرعة هتنزل أكتر طبعا صوت العربية هيعلى بس مش هيعد كتير خصوصا إنك هتكون شايل رجلك من البنزين.
كمان حاجة الفتيس دايما بيكلبش العربية لو أنت عايز. فيه حاجة أنا مفتقدها جدا في المنوال لو نازل من علي كبري وعيز تحد سرعة العربية. هات غيار تالت مثلا وشيل بنزين هتلاقي العربية حتى علي المنزل سرعتها مش بتزيد جامد عن سرعة معينة بدل متعود تهدي بالفرامل ( عشان تريح الفرامل ). الخلاصة إن الفتيس ممكن يهدي سرعة العربية بس من غير متدي بنزين.


وكمان لو انا على سرعه عالية وكل حاجة فصلت من دبرياج وكل الفرامل انا بفرض اسواء الظروف ؟

فالحالة ديه هتعمل حادثة لاقدر الله لانك مش هتكون راكب عربية ده أنت هتكون راكب خردة . لو أنت راكب عربية وشاكك في كل الحاجات ديه متنزلش بيها أحسن لغاية متظبط كل ده. فرامل اليد هي فرامل طوارئ لو مش شغالة مفيش فرامل طوارئ للطوارئ. ساعتها شغل الانتظار ( لو الزرار شغال ) و نط من العربية ( لو الباب فتح أو جرب من الإزاز ) وبعدين روح ولع فيها .
صعب جدا كل ده يبوظ مع بعضه وعربيتك سليمة أو أنت مهتم بصيانتها. وبرده السواقة الهادية وإنك تسيب مسافة معقولة هيخليك تتلافى 90% من الحوادث ان شاء الله.

المشاركة الأصلية كتبت بواسطة mahmoud5777

كلام مظبوط ميه ميه
وانا اغبى موقف حصلى وعاوزكم تقولوا هاتتصرفوا ازاى فيه
ماشى بسرعه كنت 80 تقريبا وبعدين هديت شوية وانا بشيل رجلى من على الفرامل رباط الكوتشى اتلف على الدواسة يعنى الدواسة دخلت فى الفيونكة علشان كانت طويلة ورجلى معادتش طايلة البنزين ولا عارف احطها تانى على الفرامل هاهاها كان موقف غلس وربنا سترها

ههههههههههههه
الحمد لله إن ربنا سترها. عشان كده يقولك البس جزمة مريحاك وانت سايق وتلاقي سواق التاكس أول مايركب يلبس شبشب السواقة ( والستات بيعملوا كده لو نازلين مشوار وعايزين يلبسوا كعب عالي )