المشاركة الأصلية كتبت بواسطة فادى
السرعة القصوى هى احدى مقاييس أداء السيارة, و احدى أهم مقاييس أداء السيارة.
و السرعة القصوى يمكن حسابها بطريقة تقريبية, كيف؟
أى محرك له منحنى للعزم على كل نقلة, العزم بيعلى ليصل الى نقطة قصوى و بعدين يبتدى ينزل.
و فيه منحنى أخر اسمه منحنى المقاومات, و ده منحنى تقريبى لأننا منقدرش نحسب المقاومات بدقة, يعنى مقاومة الهواء متغيرة, وزن السيارة متغير (محملة و لا شخص واحد, هذا الشخص بدين أم نحيف).
لو رسمت منحنى العزم عند أخر نقلة غالبا فى معظم السيارات (Direct Drive( أى نسبة 1:1 و منحنى المقاومات تقدر تحسب سرعة السيارة القصوى, لأنه لما يتغلب منحنى المقاومات(الذى يرتفع مع السرعة) على منحنى العزم(المتغير مع السرعة), اذن هذه هى السرعة القصوى للسيارة.
طبعا المنحنى تقريبى, لأن من الممكن تحسب حساباتك على أساس انو فيه شخص بدين فى السيارة, و الى راكبها يكون نحيف, أو انك تحسب على أساس انو الطريق مستوى, بينما الطريق مايل للأمام و يدفع السيارة. و عشان كده فيه سيارات بتجيب أعلى من سرعتها القصوى المكتوبة فى الكتالوج.
طيب ماذا لو كانت علبة تروس السيارة تحدد سرعتها عند حد معين؟ يعنى مثلا سيارة انجيكشن مزودة بقاطع أمان للوقود, الى بيقطع الوقود عند سرعة معينة للمحرك, (الكاربيراتير ممكن يوصل لأى سرعة) و كانت السرعة عند أخر نقلة (الخامس) عند 6000 أربى ام 165 كم/ساعة؟ , فى الحالة دى السيارة هتبقى سرعتها القصوى 165 كم/ساعة لأن منحنى العزم تم قطعه عند سرعة أقل من المقاومات التى تواجهها السيارة, بمعنى أن السيارة لو تم تزويدها بعلبة تروس أخرى أو نسبة تخفيض أخرى, لاستطاعت الوصول الى سرعة أعلى لكن سرعتها القصوى تم تحديدها بواسطة علبة التروس ربما لاعتبارات الأمان أو لتحسين التسارع.
موضوع العدادات فالشركات بتزعم انو السبب فى عدم التوافق بين العداد و السرعة الحقيقية للسيارة هو اعتبارات اقتصادية, لكن السبب الحقيقى هو الدعاية للسيارة و تحسين مظهرها العام, يعنى لما تدخل عربية تلاقى العداد أخره 160 و تدخل عربية تانية و تلاقى العداد أخره 220, هيبقى ايه انطباعك؟؟ مع افتراض انو السيارتين سرعتهم القصوى 160؟ طبعا هتحبذ السيارة الى عدادها لحد 220.